Llaktʼatanakatak chuymachtʼäwi
1 Nayrapachanakatpachsa janipuniw jichhürjamax ukham chuymachtʼäwix munasirïkänti. Ukatwa, Apnaqir Jesucristosan sarnaqäwiparjam arkasaxa “llaktʼatanakaru chuymachañataki” chʼamachastanxa (Isa. 61:1).
2 Kunjamsa parlañasa. Yatiyäwisampi jaqinakar chuymachañatakixa kunatï jan llakisiyirjamäki, kunatï chʼamañchkaspa ukanakwa suma amuytʼampi parlapxañasa. Akapachan tʼaqhisiñanakata, ukat akapachankir kʼari yatichäwinak tuqit jila parlañat sipansa, Qullan Qillqatanakan chiqa yatichäwinakapatwa jukʼamp parlañasa, ukhamaraki Diosan arsutaparjamaxa jutïrpachax kunjamäxanisa uka suytʼäwisatwa parlapxañasa. Ukhamaxa, ¿janit Armagedonat parlxañäni? Parlaskañäniwa. Kunattix yatiyir sarasaxa, ‘Jehová Tatitun suma amtäwip marampi [año de la buena voluntad de parte de Jehová, NM]’ ukat ‘kawkïri uruntix jiwasan Diosasax uñisirinakasat phuqsuskani uka’ urumpi yatiyañasawa. Ukampisa janiw Armagedonax kunjamänis uka tuqit parlasaxa Diosan Apnaqäwipat suma yatiyäwinakapxa chhaqtayañasäkiti (Isa. 61:2; Eze. 3:18; Mat. 24:14).
3 Utat ut sarasa. Usuntaña, jiwaña, ukat qullqit pistʼaña utjipan llaktʼat jaqinakampix sapüruw jikistanxa. Ukhamaxa, kunjamtï Cristox mä llaktʼat warmit ‘khuyaptʼayasïnxa’ ukhamwa Diosan luqtirinakapaxa llaktʼat jaqinakampi jikisisax khuyaptʼayapxañapa (Luc. 7:13; Rom. 12:15). Llakipat yatisaxa inas yatiyirix Bibliat mäysa jan ukax pä qillqatsa liytʼarapchispa, ukampis “jankʼakïñapaw istʼañataki”, mä arunxa, uka llaktʼat jaqiruwa sum istʼañasa (Sant. 1:19). Ukham nayraqat sum istʼasaxa, uka jaqir chuymachtʼañatakisa wakichatäñäniwa.
4 Ukat kunapachatï wakisini ukhaxa, akham sasmawa: “Chʼamañchtʼäwi arunakwa Bibliat liytʼarapiñ munsma” sasa. Wali amuytʼampiw parlañasa, janiw sapa pantjasitapatxa pantjastaw sasax qhanañchañasäkiti. Chiqpachansa, Qullan Qillqatanakampi chuymap qhanartayañataki, chuymachtʼañataki ukat chʼamañchtʼañatakiw sartanxa. Ukatakixa, suma yanaptʼäwinakax Razonamiento a partir de las Escrituras sat libron 144-148 jananakapanwa jikxatasi, “Estímulo” siski uka chiq thaqtäta. Ukhamarak Consuelo para los deprimidos sat tratado churasaw uka llaktʼat jaqimpix uka qillqat uñakiptʼapxasma.
5 Llaktʼatanakar thaqhasa. ¿Janit familiaramasa, utam jakʼankirisa, yatiqir masimasa jan ukax irnaqir masimasa llakitäki? ¿Janit utapar sarasin Bibliampi chuymachtʼankasma? Kunats llakitäpxi uk yatisaxa, utan sum wakichtʼasiwayasinwa sarasma. Yaqhip jilat kullakanakaxa chuymachtʼañatakixa cartanakwa qillqapxi jan ukax telefonotwa jawsapxi. Ukampis chiqpachanxa, jaqi masisar munasitas laykuwa khuyaptʼayañäni, ukat Qullan Qillqatanakampis horasapar chuymachtʼarakiñäni (Luc. 10:25-37).
6 Diosat parlir sarkasaxa, aynachtʼatanakaruwa chuymachtʼañasaraki ukat llaktʼatanakarusa chʼamañchtʼañasarakiwa, ukat jan kuna suytʼäwinïpki ukanakarus jutïritwa parlañasa. Ukham chuymachtʼatäñwa jaqinakax taqi chiqan munapxi. Ukhamax jutïritak Diosan arsutanakapatxa wali kusisit chuymampi yatiyañasawa, ukhamatwa suma chuyman jaqinakarux chuymachtʼañäni, ukhamarak suytʼäwinïpxañapatakis yanaptʼarakiñäni. Kunja wakiskiris llaktʼatanakar chuymachtʼañax uk amtapxapuniñäni.