“Yuspärasiripxam”
1 Kunapachatï Jesusax lepra usun tunka jaqinakar qullkäna ukhaxa, maynikiw yuspärasir kuttʼäna. Ukatwa Jesusax jisktʼäna: “¿Janit tunkanïki kʼumarachatanakaxa? ¿Kawkinkapxisa llätunkanixa?” sasa (Luc. 17:11-19). Alaxpachankir Jehová Dios Awkisan “taqi kunatix askïki ukhamarak chiqäki” uka suma churäwinakaparuxa wali askitwa uñjañasa ukhamaraki yuspärañasarakiwa ukwa aka qillqatax uñachtʼayistu (Col. 3:15; Sant. 1:17).
2 ¿Kuna suma churäwinakapatsa yuspärañäspa? Qhispiyistu ukata, uka qhispiyäwiwa Jehová Diosan taqi suma churäwinakapat sipansa jukʼamp askixa (Juan 3:16); ukhamaraki jupar jakʼachasiñasatakiw yanapistu (Juan 6:44); mä wawakiw suman jakasiraktanxa (Sal. 133:1-3), ukham yaqha suma churäwinakapax waljaw utjaraki. Nayra israelitanakaxa, taqi kuntix Jehová Diosax jupanak layku lurkatayna ukanakatxa, armasipxänwa, wali llakkañäspawa ukham jan yuspärasirïksna ukhaxa (Sal. 106:12, 13).
3 Yuspärasiripxañasawa. Uka lepra usun jaqinakatxa, ¿qhawqhanis Jesusan khuyaptʼayasïwiparux wali askit uñjapxäna? Chiqpachansa tunkanpachaw askjama uñjapxpachäna, ukampisa maynikiw yuspäräna (Luc. 17:15). Jichhürunxa taqi chuymasampi yatiyir sarasaw yuspärasirïtasxa uñachtayaraksnaxa. Taqi kunti churkistu ukanakat alaxpachankir munasir Awkisaru yuspärañaxa, jupjam wali munasiñampi ukat waxtʼasir chuymampi yaqhanakar parlañasatakiw yanaptʼistani (Luc. 6:45). Kunapachatï Diosan ‘muspharkañ luräwinakapat’ ukat ‘khuyapayasiñapat’ jaqinakaru parlañäni ukhaxa, Diosar yusparañasasa ukat munasiñasasa jilxattarakiniwa (Sal. 40:5).
4 Yuspärasir chuymanïpxañapatakiw yanaptʼañasa. Kunapachatï wakiski ukhaxa Bibliat yatiqirinakasarusa ukat wawanakasarusa yuspärasiripxañapatakiw yatichañasa. Awk taykanakaxa taqi chiqanwa yuspärasirïñ yatichapxaspa, sañäni, Jehová Diosan luräwinakapat familpach amuykiptʼasaw wawanakapar yanaptʼapxaspa (Rom. 1:20). Bibliat yatichktan ukhaxa yatiqirirux jisktʼaraksnawa akham sasa: “¿Aka yatichäwix Jehová Diosat kamsistusa?” sasa. Jukʼamp sum uñtʼxasaxa, Jehová Diosaru munasiñapasa ukat chuymapar kusisiyañ munatapasa jilxattarakiniwa.
5 Aka qhipa urunakanxa suma churäwinakar jan yäqiri, mä arunxa jan yuspärasir jaqinakaw utji (2 Tim. 3:1, 2). ¡Ukat luqtirinakapax yuspärasirïtap layku taqi chuyma yatiyir sarapxatapatxa Jehová Diosax wal kusispachaxa! (Sant. 1:22-25).