Yatiyirinakjamax nayrar sartasipkakiñäni
1 Kunapachatix luqtirinakapax yupaychañ tuqit nayrar sartasipki ukat suma saytʼata cristianor tukupxi ukat suma yatiyäwinak yatiyañatakis wali yatxattʼatäpxi ukhaxa alaxpachankir Awkisax wal kusisi. Pablox irpir chuymani Timoteoruw chʼamañchäna, nayrar sartatapax taqinin uñjatäñapataki (1 Tim. 4:13-15). Ukatpï, yatiyañataki suma yatxattʼatäkstansa, taqiniw jaqinakar sumpach yatiyañatakix chʼamañchasiskakiñasa.
2 Amtäwinakasa. Nayrar sartaskakiñatakixa amtäwinakanïñasawa. ¿Kawkïrinakäspasa? Sañäni, Diosan Arupa mä espadjam sum apnaqañataki chʼamachasiñäspawa (Efe. 6:17). Ukhamaraki kunjamsa jukʼamp sum yatiyaraksna uka tuqit amuytʼasiñaw wakisispa, sañäni callenakana, telefonotsa jan ukax qhatunakansa; jan ukax wasitat jaqinakampi sum parltʼir kuttʼasax kunjamsa sum lursna. Yaqha suma amtäwixa akäspawa, Bibliat yatichañ qalltañatakisa ukat sapa kuti kuttʼasa yatichañatakisa, jukʼamp chʼamañchtʼasiñäspawa.
3 Yanaptʼanaka. Taman tantachäwinakapaw yanaptʼistaspa, chiqpachansa, Yatiyañataki Diosan Yatichäwipa sat tantachäwimpi, ukat Yatiyañataki Tantachäwimpiw yatiyirinakjam nayrar sartaskakiñataki uttʼayataxa. Jiwasatix tantachäwinakataki wakichtʼasiñäni, sarañäni, ukat yatiqatanakasarjam lurañäni ukhaxa, jukʼamp bendicionanak jikxatarakiñäni (2 Cor. 9:6).
4 Jiwaskamax yanaptʼasiraksnawa (Pro. 27:17). Yatiyir masisax yatiyaski ukhaxa amuyumpi istʼañasawa, ukaw nayrar sartañatakix yanaptʼistaspa. Ukatsti Librot Yatiqañataki Taman Tantachäwip irpir chuyman jilataw yaqhampi yanaptʼayistaspa. Ukhamaraki mä precursoras jan ukax mä yatxattʼat yatiyiris sum yatichañataki ukat kusisiñ jikxatañataki yanaptʼistaspa ukhaxa wal yuspärtanxa. ¿Librot yatiqañataki tantachäwisanxa janit mä machaq yatiyirix utjki? Jupar jakʼachasisinxa jiwasamp chika yatiyir mistuñapatakiw yanaptʼsna.
5 Jichhürunakanxa taqi luräwinakat sipansa yatiyir sarañaw jukʼamp wakiskirixa. Jehová Diosar ‘yupaychkasaxa’ ‘suma sacrificio churañasaxa’ (Heb. 13:15). Ukham nayrar sartañataki chʼamachasiskakiñänixa Timoteo luqtirjamarakiw mä suma irnaqirjam Diosan nayraqatapankañäni “jan kunatsa pʼinqasiñani, chiqaparu Tatitun arunakap parlasinaraki” (2 Tim. 2:15).