‘Kayup sum arkapxañasawaʼ
1. ¿Kunjamatsa suma yatichirïsna?
1 Jesusaxa janiw rabinonakar yatichaskän uka yatiqañ utanakar sarkänti, ukampisa yupaychañ tuqitxa wali uñtʼat jaqïnwa. Jiwasanakatakix wali askipuniw Jesusan yatiyatanakapat qillqasitapaxa, kunattix jupjam suma yatichiriñ munstan ukhaxa, sarnaqäwipat yatiqasisa ‘kayup sum arkapxañasawa’ (1 Ped. 2:21).
2. ¿Jesusjam jaqinakar munasiñatakixa kunas yanaptʼistaspa?
2 Jaqinakarux munasirïnwa. Jesusax jaqinakat wal khuyaptʼayasïna ukatwa yatichäna (Mar. 6:30-34). Yatiyktan uka chiqanakanxa jaqinakax “wal tʼaqhisiski” ukatwa Diosan Arupat jankʼaki istʼapxañapax wakisi (Rom. 8:22). Kunjamsa Jehová Diosax jupanakat llakisi ukat kunja llakkañas sarnaqäwinakapax ukanakat lupʼikipañaw yatiyaskakiñatakix yanapistaspa (2 Ped. 3:9). Ukatxa, jaqinakax jupanakat llakisitasa amuyapxi ukhaxa, kuntï yatiyktan ukarux iyawsapxiwa.
3. ¿Kawki chiqanakansa Jesusax yatiyirïna?
3 Taqi chiqan yatiyirïna. Jesusaxa taqi chiqanwa suma yatiyäwinakxa yatiyäna (Mat. 4:23; 9:9; Juan 4:7-10). Ukhamarakiwa, luräwinakasansa irnaqtʼäwinakasansa suma yatiyäwinak parltʼañatakix wakichtʼatäñ munaraktanxa. Yaqhip jilat kullakanakaxa Bibliat apstʼat qillqatanaksa jan ukax Diosan Arupsa apasipxapuniwa, ukhamatwa irnaqäwipansa, yatiqañ utansa, viajkasasa jan ukax alasir sarkasasa ukat yaqha chiqanakansa yatiyañatakix wakichatäpxi.
4. ¿Yatiyir sarkasax kunjamatsa Diosan Apnaqäwipat sum qhanañchsna?
4 Diosan Apnaqäwipatpunwa yatiyäna. Jesusaxa Diosan Apnaqäwipatpunwa suma yatiyäwinak yatiyirïna (Luc. 4:43). Jiwasanakaxa janisay Diosan Apnaqäwipat parlasa qalltkchiñänixa, ukampis uka Apnaqäwit yatipxañapax wali wakiskiriwa uk janiw armañasäkiti. Aka qhipa urunakanxa kuna jan waltʼäwinakas jukʼampi utjaski ukanakatsa parlkchiñänixa, jiwasax ‘suma aski arunaka yatiyirïtanwa’ ukxa amtapxapuniñäni (Rom. 10:15).
5. Sum yatiyañatakixa, ¿kunjamsa Bibliar uñjañasa?
5 Diosan Arupatpunwa arsurïna. Yatiykasaxa Diosan Arupatpunwa arsurïna. Janiw jupan amuyupataki parlirïkänti (Juan 7:16, 18). Diosan Aruparux manqʼäkaspas ukham uñjirïna, Supayan yantʼatasa Diosan Aruparupuniw istʼirïna (Mat. 4:1-4). Jiwasatix sapür Biblia liytʼañäni ukat yatichäwinakaparjam sarnaqañäni ukhaxa jaqinakarus sum yaticharakiñäni. (Rom. 2:21). Yatiyir sarkasax kuna jisktʼanakay utjchispa ukarux Bibliampipuniw qhanañchapxañasaxa, wakisirjamächixa Bibliatwa liytʼarapiñasa. Janiw jiwasan amuyunakasaki parlañ munktanti jan ukasti Diosan Aruparuw atinistanxa ukwa jaqinakax qhan amuyapxañapa.
6. ¿Jaqinakan chuymapar purtʼañatakix Jesusax kamachirïnsa?
6 Yatiyäwipampixa chuymaruw purirïna. Jilïr sacerdotenakampi ukat fariseonakampixa templo uñjirinakaruw Jesusar katuntanipxañapatakix khitapxäna, ukat jan katuntanipxatapatxa, ¿kunatsa jan katuntanipkta? sasaw jisktʼapxäna, jupanakasti sapxarakïnwa: “¡Janiw kunapachas khitis uka jaqjamax parlkiti!” sasa (Juan 7:46). Chiqasa, janiw aliq yatipxañapatakikix yatiykänti, jan ukasti istʼirinakapan chuymaparuw purirïna (Luc. 24:32). Ukham chuymar purtʼañatakixa jakäwinakat apstʼat uñtasïwinakampiw yatichirïna (Mat. 13:34). Janirakiw jaqinakarux walja yatichäwinakampix qarjaykänti (Juan 16:12). Jehová Diosarupuniw jachʼañchirïna janiw jupa pachpa jachʼañchasirïkänti. Kunjams yatichasktan uk amuyasiñäni ukat ukhamarjam yatichañäni ukhakiw Jesusjam suma yatichirïsnaxa (1 Tim. 4:16).
7. ¿Kunatsa Jesusax yatiyañatakix chʼamachasiskakïnxa?
7 Uñiskatasa, jan yäqkatas chʼamachtʼasiskakïnwa. Walja milagronaksa lurkchïnxa waljaniw jan yäqapkänti (Luc. 10:13). Familiapasa “luqhiptxataynawa” sapxänwa (Mar. 3:21). Ukampisa, Jesusax chʼamachasiskakïnwa. Ukham jan walinakan uñjaskasasa suma chuymanikïskänwa, kunattix chiqa yatiyäwinakakiw jaqinakar qhispiyaspaxa ukwa jupax yatïna (Juan 8:32). Jiwasanakaxa Jehová Diosan yanaptʼapampix janirakiw qarjkañäniti (2 Cor. 4:1).
8, 9. Jesusjam sarnaqañatakixa, ¿suma yatiyäwinak yatiyañ laykux kun lurañas wakisispa?
8 Yatiyañ laykux taqi kunsa jaytanukünwa. Jesusaxa yatiyañ laykux yänaksa jaytanukünwa (Mat. 8:20). Jan qarjasaw yatiyirïna, awisax jaypʼukamapuniw yatichäna (Mar. 6:35, 36). Taqi luräwinakap phuqañatakixa jukʼa tiempokiw utjäna ukwa jupax yatïna. Aka qhipa urunakanxa, “juka tiempokiw utjxistu” ukatwa Jesusat yatiqasisax tiempsa, chʼamsa, yänaksa yatiyañ laykux churañasaxa (1 Cor. 7:29-31).
9 Nayra patak maranakan jakasir cristianonakax Jesusat yatiqasipxäna ukatwa sum yatiyapxirïna (Hech. 4:13). Uka kikparakiw jiwasanakax taqinin uñtʼata jachʼa Yatichirit yatiqasisax sum yatiyaraksnaxa (2 Tim. 4:5).