“Nayan yugoxa apapxam”
1 Wali llakinakan ukhamarak jan waltʼäwinakan phuqantat pachan jakastanxa, ukampisa, Jesusan wali munasiñan jawsäwipar istʼañäni ukat yugop apañäni ukhaxa samarañwa jikxatañäni (Mat. 11:29, 30). Ukhamarak Diosan arupat yatiyktan ukhaxa, janiw kusisiñak jikxatktanti jan ukasti samaraña jikxataraktanxa: Diosan Apnaqäwipat yatiyasaxa jaqinakaruw samarañ jikxatapxañapatak yanaptʼtanxa ukhamat Jesusan phisna yugop jiwasjam apapxañapataki (Mat. 24:14; 28:19, 20).
2 Yatiyañax kusisiyistuwa. Jesusax janiw siskänti jathi qʼipisxaru jupan qʼipipamppach apañasxa. Jan ukasti, jiwasan jathi qʼipis qʼipnuqasa ukat jupan phisna qʼipipa apaña sañ munäna. Chiqpachansa ukhamäskapuniwa, janiw llakisiñasa ni akapachan jan suytʼäwinïtapasa aynachtʼaykistuti, janirakiw yänak jikxatä sasin wal chʼamachasktanti (Luc. 21:34; 1 Tim. 6:17). Chiqasa jan tiemponiw jakastanxa jakañatakis irnaqañasawa, ukampis Jehová Diosar luqtañaw jiwasatakix jukʼamp wakiskirixa (Mat. 6:33). Yatiyir sarkasax yatiyañaxa janiw mä jathi qʼipjamäñapäkiti jan ukasti chʼamachkirïñapawa ukatakixa kunas wali wakiskirixa ukwa sum amuyañasa (Fili. 1:10).
3 Chiqpachansa, kunarutï munastan ukatxa parlapuntanwa (Luc. 6:45). Cristianonakax Jehová Diosarux wal munastanxa, ukat kuntï Apnaqäwipax apankani uka arsutanakapasa kusisiyistuwa. Ukatwa ‘sumankañ arunaka ukhamarak suma aski arunakat’ yatiyasax wal kusistanxa, ukat sapür llakinakasatsa armasiraktanwa (Rom. 10:15). Kunapachatï kuns jukʼamp lurtan ukhaxa, tiempompix wali sum lurxtanxa ukat ukham lurasax kusisiraktanwa, ¿janich ukhamäkixa? Ukatwa kunapachatix jukʼamp yatiyir sarktan ukhaxa wal kusisiraktanxa. ¡Ukat yatiyäwisar maynix istʼani ukhax wal chʼamañchtʼistani! (Hech. 15:3.) Jan yäqatasay jan ukax uñisitasay uñjaschiñänixa, jiwasatakix Diosar yupaychañax mä chuymachtʼäwiwa, ukat amtapuniñäni kuntï lurasktan ukxa Jehová Diosarux kusisiyiwa ukat kuna askinaktï jikxatkañäni ukax Jehová Diosan bendicionaparakiwa (Hech. 5:41; 1 Cor. 3:9).
4 Jesusan jawstʼäwiparu iyawsañänixa, chiqpachapuniw jupamp chika Jehová Diosan Qhanañchirinakapjam kusisiñäni (Isa. 43:10; Apo. 1:5). ¡Chiqpachansa janiw kunas ukham kusisiykistaspati!