¿Familiamax qhispiyasiñatakix wakichasiskiti?
1 Biblian profecianakap phuqasitapax uñachtʼayistuwa aka ñanqha pachan tukusiñapax jakʼankxatapa. Janïr Uma Juiciox jutkäna uka tiemponakjamarakiw aka jan wali tiemponakaxa (Mat. 24:37-39). Noen tiempopan utjkän uka ñanqha pachan tʼunjäwipat qhispiyatänwa, kunattix ‘Diosan munañaparjamaw sarnaqäna’ (Gén. 6:9). Ukat familiaparux Diosamp sarnaqapxañapatakiw chʼamañcharakpachäna, kunattix taqiniw qhispiyasipxäna. ¿Kunjamsa Noé chachat yatiqasisax familiasampi aka ñanqha pachan tʼunjäwipat qhispiyasiñatakix wakichasiraksna?
2 ‘Chiqa arunak parlirïnwa.ʼ Noesti pusi tunka jan ukax phisqa tunka maranakaw jan jaytasa ‘chiqa arunak parläna’ (2 Ped. 2:5). Markachir masinakapasti, jaqir tukupxäna uka kutkatasir angelanakan mayjtʼayatäsinsa jan ukax janisa, yatiyäwipatxa sawkasipxpachänwa. Jichhürunakanxa, ukhamarakiw yatiyasktan ukarux jan yäqapkiti ukat sawkasipxarakiwa ukaw uñachtʼayistu aka tukuy urunakax jakʼankxatapa (2 Ped. 3:3, 4). Ukampis jichhürunakanxa, Noen tiempopan kunanakatï paskänxa ukat sipansa walja jaqinakarakiw chiqpach yupaychäwir mantasipki (Isa. 2:2). Ukhamax jiwaspach qhispiyasiñatakisa ukat khitinakatï istʼapkistu ukanakar qhispiyañatakisa, jan jaytas yatiyaskakiñasawa (1 Tim. 4:16). Ukhamasti awk taykanaka, ¡kunatsa jankʼak yatiyañasaxa uk wawanakasar luräwinakasampi arsutanakasampi yatichapxañäni! (2 Tim. 4:2.)
3 “Ukhamwa taqi kunsa luräna.” Qhispiyasiñatakixa, Noempi familiapampix Jehová Diosan mayitanakaparuw sum istʼapxañapäna (Gén. 6:22). Jiwasax ukhamarakiwa Amuyasiri Chiqapa Uywatan mayitanakaparu ukat Biblian mayitanakaparux ‘jaysasiñatakix jankʼakipxañasa’ (Sant. 3:17, Traducción del Nuevo Mundo). Kunjamsa awkipax Jehová Diosan markapan iwxanakaparjam lurirïna ukwa mä familian jilïr wawanakapax amtapxäna. Sañäni, kunjamtix iwxtʼaskixa ukhamarjamaw sapa semana familiapampix Bibliat yatxatirïna ukat sapa seman tukuyarakiw familiapar yatiyir irpirïna. Ukhamaraki wawanakapampix sapa maynimp yatiyir mistsuñatakiw chʼamachasïna. Awkiparu ukham mayitanakarjam ‘taqi kunsa lurir’ uñjasax wawanakapax wali yanaptʼataw uñjasipxäna, ukat wawanakapatxa suxtanpachaw Jehová Diosar taqi chuyma luqtapxi.
4 Akatjamatwa aka ñanqha pachan tʼunjäwipax jutani (Luc. 12:40). Ukhamasti, Noé chachat yatiqasiñäni ukat iyawsäwiniñäni ukhaxa, familjamax qhispiyasiñatakix wakichatarakïñäniwa (Heb. 11:7).