Wasitat kuttʼasin sum parltʼañatakix wakichtʼasiñasawa
1. ¿Kunjamsa Diosan Arupat yatiyañax jilxattañapäna?
1 Diosan Apnaqäwipat ‘qhispiyasiñ arunak’ sum yatiyapxañapatakiw Jesusax arkirinakapar wakichtʼäna (Mat. 4:23; 9:35). Jesusax Palestina tuqinaksay yatiykchïnxa, janïr alaxpachar kuttʼkasax Diosan Apnaqäwipat yatiyañax jilxattaniwa, ukat taqi akapachankir jaqinakar nayar ‘arkir tukuyapxäta’ sasaw arkirinakaparux säna (Mat. 28:19, 20).
2. ¿Kunjamatsa Jesusan arunakaparjamax phuqsna?
2 Jesusan arunakaparjama phuqañatakixa, khitinakatï Diosan Apnaqäwipat yatiqañ munapki ukanakar wasitat visittʼañasaw wakisi ukhamat taqi kuntix Jesusax yatichkäna ukar phuqapxañapatak yanaptʼsna. Ukatwa wasitat kuttʼasin sum parltʼañatakix wakichtʼasiñasäspaxa.
3. ¿Kunjamatsa qalltatpach jaqinakar wasitat visittʼañatakix chʼamachäsna?
3 Amtañamawa. Yaqhip yatiyirinakax qalltatpachwa mä jisktʼa utanir jisktʼapxi ukat uka jisktʼan qhanañchäwipxa kuttʼankä ukhaw yatiyäma sasin sapxaraki. Kuttʼasaxa Kunsa yatichi sat librot yatichäwipat chiqaki uñxattʼayasinxa Bibliat yatichañ qalltapxi.
4. ¿Wasitat kuttʼañatakix kunatsa machaq revistanak mistsuniñap jan suyañäkixa?
4 Jichhasti revistanakaxa kimsa phaxsin mä kutikirakiw mistuni ukampis janiw jaya tiempot kuttʼañasa sañ munkiti. Jan ukasti, kuna revistay utanin utjchi uka revistan mä yatichäwip parltʼañasa ukhamat yatiqañ munataparux yanaptʼsna.
5. ¿Kunatsa mä amtanïñax wali askixa?
5 Mä amtanïñamawa. Janïra mä jaqir visitʼkasaxa, tiempo apstʼasisax qillqtʼasitam wasitat uñakiptʼañama ukat kuns jikxatañ munta uks amuyañamarakiwa; sañäni, kawkir qillqattï jaytawaykäyäta ukxa uñakiptʼarakismawa jan ukasti kuna tuqitsa parltʼawayta uka tuqit qhanañchir Bibliat apstʼat qillqatsa jaytarakismawa. Jumatï pasirin mä jisktʼa jaytawaysta ukhaxa, uka jisktʼaru qhanañchañamawa. Kuna tuqitsa parlawayta uk sum amuytʼayañatakix Bibliat apstʼat mä jiskʼa tʼaq liytʼañatakiw chʼamachasïta.
6. ¿Wasitat kuttʼasax kun jikxatañsa muntanxa?
6 Kunsa jikxatañ muntanxa. Chiqpachansa, mä jaqir Bibliat yatichañ muntanxa. Mä jilataxa wasitat kuttʼasax Bibliat yatiqañapatak mä chachar parltʼäna ukampis jupax janiw munkänti. Ukatxa uka jilatax jichhak mistsuski uka revistanakamp kuttʼasax uka chacharux akham säna: “Jaqinakampi parltʼasax Bibliat apstʼat mä jisktʼaruw qhanañchasipkäyätxa”. Uka jilatax uka chachan arstʼatapar sum istʼäna, ukat Bibliat liytʼarapïna ukhamarak jaqinakar yatichañataki wakichatäki uka qillqatat mä tʼaqa liytʼarapisaxa, Bibliat yatichañ qalltxäna.
7. Bibliat yatichañ qalltañatakixa, ¿kunjamsa wakichtʼasiñax yanaptʼtamxa?
7 Jiwasatix wasitat kuttʼañatak tiempo apstʼasisa sum wakichtʼasiñänixa, yatiyäwisanxa jukʼamp kusisiñ jikxatañäni ukat ‘khitinakatï wiñay jakañatak wakichatäpki’ ukanakarus yanaptʼarakiñäniwa (Hech. 13:48).