Diosan suma yatichäwinakap yatiyapxañäni
1 Qurir uñtat wali suma yatichäwinakaw Diosan Arupan utji (Sal. 12:6; 119:11, 14). Mä kutixa, Diosan Apnaqäwipat uñachtʼäwinakampi kunayman tuqit yatichañ tukuyasaxa, akham sasaw Jesusax arkirinakapar jisktʼäna: “¿Jumanakax taqi akanakxa amuyapxtati?” sasa. Ukat jïsa sataxa akham sarakïnwa: “Kunapachatix mä ley yatichirix Diosan reinopata sum yatxi ukaxa utan jaqjamawa. Jupasti suma imat yänakapatxa yatiwa machaq yänaksa, mirqʼi yänaksa apsuniñxa” sasa (Mat. 13:1-52).
2 Kunapachatï Bibliat yatiqañ qalltktan ukhaxa, walja yatichäwinakwa yatiqtanxa, ukanakaw mirqʼi yänakampi sasixa. Ukat jukʼamp nayrar sartañataki, wali amuyumpi Biblian yaqha suma yatichäwinak jikxattan ukanakaxa, machaq yänakampi sasirakiwa (1 Cor. 2:7). Ukatxa ‘Amuyasiri Chiqapa Uywatawa’ yaqha suma yänak jikxatañxa yanaparakistu (Mat. 24:45, MT).
3 Jiwasatakix machaq yatichäwinakas mirqʼi yatichäwinakas wali wakiskiripuniwa. Ukatwa Diosan Arupat wali amuytʼani ukat suma yatichirïñatakix wal chʼamachastanxa ukat wali munasiñampirakiw uka yatichäwinakxa yaqhanakar yatiytanxa.
4 Jesusax kunsa luräna. Jupatakix Diosan uka suma yatichäwinakapax wali askïnwa, ukatwa yaqhanakar yatiyañatakix wal chʼamachasïna. Wali qaritpachasa Diosan arunakapatxa yatiyaskakïnwa (Juan 4:6-14).
5 Khä urunakanxa waljaniw Diosar jan uñtʼasax llakkaña jakapxäna, jupanakar munasiñatwa jakañ churiri yatichäwinakxa yatiyäna (Sal. 72:13). Ukham aynachtʼatanakat khuyaptʼayasisaw “walja yatichäwinak yati[chäna]” (Mar. 6:34).
6 Jupat yatiqasiñasawa. Kunjamtï Jesusax Diosan suma yatichäwinakap wali sum uñjkänxa, ukham uñjañasarakiwa, ukaw jaqinakar Bibliat yatichañxa yanaptʼistani (Pro. 2:1-5). Qaritpachasa, taqi chuymaw uka suma yatichäwinakxa yatiyañasa (Mar. 6:34). Chiqapuni Diosan suma yatichäwinakapar munasiñäni ukhaxa, janiw jayraskañäniti, jan ukasti waljanir yatiyañatakiwa wal chʼamachasiñäni.