Jisktʼäwinaka

◼ ¿Tantachasiñ Utan jaqichasiñataki arstʼäwinïñ munasaxa kuna tuqitsa casarasirinakax irpir chuymaninakampi parltʼapxañapa?

Kunapachatï casarasirinakax Biblian kamachinakaparjam mä Tantachasiñ Utan jaqichasiñ amtapki ukhaxa, wal Jehová Diosar jachʼañchapxi. Ukhamatwa yaqhanakasa, kunjamas Diosan markapanxa jaqichasipxi ukxa uñjapxaraki. Ukhamasti, kunapachatï Tantachasiñ Utan jaqichasiñ munapxani ukhaxa, irpir chuymaninakaw sum uñjxapxañapa, ‘taqi kunas sum lurasiñapataki’ (1 Cor. 14:40).

Tantachasiñ Utan jaqichasiñ munasaxa, janïräkipanwa casarasirinakax mä carta tuqi irpir chuymaninakar mayipxañapa. Ukan tantachasipki uka mä taman uñjasipki uka irpir chuymaninakat pʼiqtʼirinakaruw cartax apayasiñapa. Ukat kuna urus jan ukax kuna horas apasini ukxa sum qhanañchapxañapa, ukampis irpir chuymaninakax janiw tantachäwinakxa jittʼayapkaspati, uk amtapxañaparaki. Ukatxa, casarasirinakax panpachaniw Diosan kamachinakaparjam jan ukax Biblian yatichäwinakaparjam sum sarnaqapxañapa.

Ukat Jehová Diosan sutip jan qʼañuchañatakixa, janïräkipanwa jaqichasirinakax kunanaksa lurañ amtapxi ukanak qhanañchapxañapa. Chiqansa irpir chuymaninakax janiw jupanakakix kuns amtasin lurayapkaniti, ukampis jan walinakax utjirjamäni ukhaxa, jaqichasirinakaw amuytʼasxapxañapa. Mayax akäspawa, Tantachasiñ Utanxa qʼuchuñataki Melodías del Reino satäki, uka musicakiw utjañapa, janiw yaqha musicanakax uchaskaspati. Ukat kunjam kʼachachtʼatänisa, qunuñanakas kunjam uchtʼatänisa ukxa sum amuytʼapxañapa. Ukat inas fotonak jan ukax video apsuñas wakischispa, ukampis janiw jiljasiñapäkiti, uka jaqichäwix ukanakampi mayjtʼayataw uñjasxaspa. Inas ensayañax wakischispa, ukampis janiw tantachäwinak jitnaqayañax wakiskaspati. Ukat janirakiw kuna invitacionas Tablerurux uchasiñapäkiti. Wakisini ukhaxa Yatiyañataki tantachäwinwa, mä jaqichäwiw aka Tantachasiñ Utan utjani sasa yatiyasiñapa.

Wakisirjamäni ukhaxa inas jan bautisatanakar invitación luqtañax wakischispa, ukampis khitinakatix Dios contra kuns lurapki jan ukax jan wali sarnaqirit uñtʼatäpki ukanakar jawstʼañax janiw wakiskiti. Ukatxa uttʼayat mä irpir chuymaniw utjchi ukhaxa arstʼañapa. Chiqansa jupanakaw yatichapxaspa siw Biblianxa, uka wakiskir urunxa jupanakaw Bibliampi sum amuytʼayapxaspa (1 Tim. 3:2).

Uka jaqichäwin jan walinakax utjaspa ukhaxa, arstʼir irpir chuymanis jan walinwa uñjasirakispa, ukhamasti kunanak lurañsa casarasirinakax amtapxi ukanakxa juparux yatiyapxañaparakiwa. Uka jilatax janïräkipanwa jaqichasirinakampix parltʼani, inas kunjamas panin sarnaqasipki uka tuqitsa jisktʼarakchispa, ukat casarasirinakax jan kun imtʼasaw sum qhanañchapxañapa. Inas maynix yaqhampi nayrax jaqichatächïna, ukampis jichhax Bibliarjamas jan ukax marka kamachinakarjamas jaqichasispati ukwa uñachtʼayañapa (Mat. 19:9). Mä arunxa, divorciasit papelanakwa irpir chuymanir sum uñachtʼayañapa.

Kunapachatï jaqichasirinakax irpir chuymaninakampi jan kun imtʼasa sum parltʼasipki ukhaxa, wali sumaw jaqichasipxi, taqinitakis wali kusiskañawa (Pro. 15:22; Heb. 13:17).