Jan qarjtas Diosan arunakapat yatiyapxañäni
1 Awisax kun lurañas chʼamakïspawa. Apóstol Pablox jan waltʼäwinakar atipjasarakiw kimsa tunka maranaka Diosatak irnaqtʼawayäna (2 Cor. 11:23-29). Ukhampachasa, janiw Pablox qarjtkänti (2 Cor. 4:1). Uka suma irnaqäwip phuqañatakixa, Jehová Diosan chʼamaparuw atinisïna (Fili. 4:13, NM). Yaqhanakan yatiqasiñjam sum phuqasax akham sänwa: “Jumanakax nayjam sarnaqapxam kunjamtï nayax Cristjam sarnaqktxa ukhama” sasa (1 Cor. 11:1).
2 Jichhürunakana. Uka kikparakiw walja jilat kullakanakasax jichhürun familia taypina, irnaqir masinak taypina ukat yatiqir masinak taypinsa sawkasita, jiskʼachata, uñisita ukham uñjasipxi (Mat. 10:35; Juan 15:20). Inas jumax ukham jikxatasiraksta. Jan ukax usutas jikxatassta, ukat kuna jan wali lupʼïwinak pʼiqiru mantipansa apsuñax chʼamakïspawa, jan ukasti kuna yantʼanakas iyawsäwisarux aynachtʼayañ munarakispawa. Ukhaman jikxatasisaxa, kunjamsa Diosan nayra jan ukax jichha luqtirinakapax jan waltʼäwinakar atipapxi ukanak amuytʼañaw wakisispa (1 Ped. 5:9).
3 Yaqhasti akarakïspawa: Diosan arunakap jan qarjasa yatiyaskakiñasatakix ‘taqi armanaktix Diosax churkistu ukanakampi’ jarkʼaqasiñasawa (Efe. 6:10-13, 15). Diosar chʼama mayisiñax wali wakiskiriwa, jan waltʼäwinakar saykatañatakix Diosaw qullan ajayup churistani (2 Cor. 6:4-7). Ukampis jan waltʼäwinakamp jan atipjayasiñatakixa, Diosan iwxtʼanakaparjam lurañasaw wakisi, ukaw kuntï lurañ amtktan uk phuqañ yanaptʼarakistani (Sal. 119:24, 85-88). Ukat kunjamtï mä wawax awkipan apayanit cartap wasitat wasitat liytʼkixa, ukhamarakiw jiwasax sapüru Biblia liyiñasa, ukaw Jehová Diosamp sum apasiñ yanaptʼistani. Ukat Bibliat sapa kuti yatxatañaxa jan waltʼäwinakar suma amuyumpi saykatañatakiw yanaptʼistu, ukhamat Diosat jan jithiqtañasataki, ukat Jupampi irpayasiñatakiw yanaptʼarakistu (Pro. 2:10, 11).
4 Jan qarjtkañäni ukhaxa, bendicionanak katuqañäni. Dios tuqit yatiyasax jan qarjas irnaqaskakiñänixa, Pabljamarakiw Jehová Diosan chuymap kusisiyañäni, ukatsti jiwasasa, istʼirinakasasa bendicionanak katuqapxarakiñäniwa (Pro. 27:11). Ukhamaxa, Diosan arunakapat jan qarjtasa yatiyasipkakiñäni, ukhamatwa iyawsäwisax chʼullqhïni ukat yantʼanakar atipjañäni. Ukatxa ‘tukusir qurit sipansa jukʼampi jila alanïniwa’ (1 Ped. 1:6, 7).