Dios sapaki taqe kunjjar apnaqkäna ukhajja, janiw kuna jan waltʼayasiñas utjkänti, mä wawak jakasiñaw utjarakïna.

¿Kunatsa Diosan Reinop apnaqjjañap muntanjja?

Jaqejj aka oraqen utj-jjäna ukhajja, taqe kun Luriri Dios sapakiw taqe kunjjar apnaqäna, Jupan sutipajj Jehová satawa, wali munasiñampiw apnaqarakïna. Ukatwa jaqenakatakejj mä suma jardín Edén cheqan luräna, ukanjja manqʼañajj jilarkiriw utjäna. Ukan trabajiñas wali kusiskañänwa (Génesis 1:28, 29; 2:8, 15). Jaqenakatï Diosamp apnaqatäsipkakispäna ukhajja, wali sumaw jakasiskaksnäna.

Jan manqʼapjjañapäkäna uka achwa Adanajj katjjasiski, ukjja Eva warmipaw churäna — Adanampi Evampejj janiw Diosamp apnaqatäñ munapkänti.

Bibliarjamajja, kutkatasir mä angelaw Diosajj apnaqañatak janis derechonïkaspa ukham parläna, uka angelajj Supaya sasin uñtʼatawa. Jaqenakajj Diosamp jan apnaqatäpkaspa ukhajj jukʼamp sumaw jakasipjjaspa sasaw uka angelajj säna. Adanampi Evampejj Supayatwa yateqasipjjäna, ukatwa Dios contra saytʼapjjäna (Génesis 3:1-6; Apocalipsis 12:9).

Jehová Dios contra saytʼapjjatapata, Jupampi jan apnaqatäñ munapjjatapatjja, Adanampi Evampejj Paraíso oraqet jaqsutaw uñjasipjjäna, wiñay jakañsa aptʼasipjjarakïnwa (Génesis 3:17-19). Tiempompejja, wawanakapas ukham jan walinwa uñjasipjjarakïna. Bibliajja, Adán chachan juchachasitap laykuw “juchajj akapachar mantani, jiwañajj uka juchan utjatapatwa mantaniraki” sasaw qhanañchi (Romanos 5:12). Ukampis jaqenakan pantjasirïpjjatap laykojj yaqha jan waltʼäwiw utjaraki, ‘jaqejj chʼamanïtapatwa masinakapar jan walinak lurawayi’ (Eclesiastés 8:9). Mä arunjja, jaqenakajj jupanak pachpaki apnaqasipjje ukhajj jan waltʼäwinakajj taqe cheqanwa utji.

JAQEW APNAQAÑ QALLTI

Nemrod chachaw wali jachʼa jachʼa tukut saytʼatäski. Jupa qhepäjjansti, jaqenakaw mä jachʼa torre lurasipki — Nemrod sat mä chachajja Jehová Dios contraw saytʼäna.

Bibliarjamajja, Nemrod sat mä chachaw nayrïr kutejj jaqenakar apnaqañ qalltäna, jupajj Jehová Diosan gobiernop contraw saytʼäna. Ukhat jichhakamajja, walja gobiernonakaw jaqe masiparojj munañaparjam apnaqawayapjje. Ukatwa khä 3.000 maranak nayrajj Salomón reyejj akham sasin qellqäna: “Uñjaraktwa tʼaqhesiyatanakan jachapjjatapa, ukampis janiw khiti chuymachiris utjkiti; tʼaqhesiyirinakapajj chʼamampiw apnaqapjje” sasa (Eclesiastés 4:1).

Jichhürunakanjja uka pachpakïskiwa. Organización de las Naciones Unidas ukajj 2009 maran informkäna ukarjamajja, jan suma gobiernonak utjipansa “jan waltʼäwinakajj akapachan utjkaspa” ukhamwa jaqenakajj amuyapjje.

MÄ SUMA GOBIERNOW MUNASI

Jaqenakajja suma gobiernonak utjañapa ukat mä gobiernon sum apnaqañapwa munapjje. Taqe kun Lurir Diosajja, mä suma gobiernow utjani sasaw arsuwayi.

Fotonaka: jaqen gobiernatapajj akanakwa utjayawayi; 1. Mä qʼañu callenwa Asia toqenkir mä warmejj qontʼatäski, jupajj jachaskir wawapwa ichjjasiski; 2. Chuymankipstat mä chachaw hospitälankaski, jupajj wali usutaw ikiñ patankaski; 3. Soldadonakaw armanakap mä guerran disparasipki; 4. Marcha luririnakaw wali colerata arnaqasisipki, yaqhepanakajj pancartanak aptʼatäpjjewa; 5. Mä warmimpi jiskʼa phuchapampiw utap anqäjjan saytʼatäsipki, jupanakajj mantañ punkupan vidrio tʼunsutwa uñjasipjje; 6. Mä markaw jewqʼemp phoqantatäski, luza cablenakas waljaw utjaraki — Suma gobiernonakas janipuniw jaqenakan jan waltʼäwinakap askichañ puediwayapkiti.

Diosajj mä Reino, jan ukajj mä gobierno uttʼayi. Uka gobiernow akapachankir taqe gobiernonak lantejj aka oraqjjar apnaqani, “wiñayan wiñayapaw uka reinojj utjarakini” (Daniel 2:44). Walja millón jaqenakajja, uka Reinon jutañapatakiw padrenuestro sasin uñtʼat oracionan mayisipki (Mateo 6:9, 10). Ukampis Diosajj janiw uka Reinon Reyipat uttʼayatäkaniti, jan ukasti aka oraqen maynejj jakkäna ukaruw Reyïñapatak uttʼayawayi. Ukhamajj ¿khitirus Diosajj ajlliwayi?