Jesusan jiwäwip amtañatak jawstʼäwi
1. Marzo phaxsit 21 urunak saraqataruxa, ¿kunsa Diosan Apnaqäwipat yatiyirinakax Uraqpachan lurañäni, ukat kunatsa?
1 Jehová Diosan Qhanañchirinakapaxa, Diosax jaqinakaru jachʼa munasiñap uñachtʼaykäna uk amtañatakiw 2009 maran abril phaxsit 9 urunak saraqatarux Uraqpachan tantachasipxañäni (Rom. 5:6-8). Bibliat jukʼamp yatxatañ munirinakax jiwasamp tantachasiñap muntanxa, ukhamat Jesusan jiwäwip amtañataki, ukatakix marzo phaxsit 21 urunak saraqkïpanwa aka Uraqpachana invitacionanak lakirañ qalltasini.
2. ¿Invitación lakirkasax kuns amtañasa?
2 Akanak amtañamawa. Invitacionan uñstki uka dibujonakata, jisktʼanakata ukat Bibliat apstʼat jiskʼa tʼaqanakatsa sum qhanañchtʼañamawa. Sañäni, nayrïr jana uñachtʼayasaxa, akham sasmawa: “Aka invitación jaytawayañ munayäsma ukhamat abril phaxsin jueves 9 uru 2009 maran nänakamp chika Jesusan jiwäwip amtañataki” sasa. Ukxaruxa, invitacionan pʼiqiñchäwipa ukat jisktʼanak uñstki ukanak liytʼarapïta. Ukat familiamasa ukat jumamp chik jutkani ukanakasa, wali suma katuqatäpxätaw uka arumaxa, sañamarakiwa.
3. ¿Khitinakarutï invitación jaytkañäni ukanakat jan armasiñatakix kun lurañasasa?
3 Taman yatiyañapäki uka chiqanakax jachächi ukat janirak utankapkchiti ukhaxa, inas irpir chuymaninakax uka utanakarux jaytasiñapawa sasin sapxarakchini. Seman tukuy urunakaxa, revistanakampi yatiykasax invitacionanakax lakiratarakïniwa. Bibliat yatiqañ munirinakaru, Bibliat yatiqirinakaru, familiaranakaru, yatiqañ utankir masinakaru, irnaqir masinakaru, utam jakʼankirinakaru ukat yaqha uñtʼatanakarus uka invitación jaytañxa janiw armañamäkiti. Pasïr maranxa, mä kullakasax familiapat kimsa tunkaniruw uka arumatak invittʼatayna, ukat sapa kutiw amtayäna kunatsa Jesusan jiwäwip amtañax wakisi uka tuqita. Uka arumax pä tunk phisqaniw jutapxatayna, ¡uk uñjasax wal kusisïna! Ukat pusiniw Bibliat yatiqañ qalltxapxäna.
4. ¿Kunsa jichhjatpach amtañasa ukat kunatsa?
4 Jichhjatwa amtañama. Waljaniw marzo ukat abril phaxsin jukʼamppach Diosar luqtañataki tiempo apstʼasipxani. Kawkïr wawamatï jan ukax Bibliat yatiqirimatï nayrar sum sarantaskchixa, Diosan jan bautisat yatiyiripäñ qalltaspawa. Jichhjatpachwa uka phaxsinakan Diosar jukʼamppach luqtañatak tiempo apstʼasiñatakix amtañama, ukhamat Jehová Diosan ukat Jesusan jachʼa munasiñapat taqi chuyma yatiyañäni (Juan 3:16; 15:13).