Yatiyir sarañaxa Diosar yupaychäwisanwa chʼamañchtʼistu
1. ¿Diosat yatiyir sarasax kuna askinaksa jikxatsna?
1 Jehová Diosar kusisiyañ laykuw suma yatiyäwinak jan armasis yatiyir sartanxa, ¿janich ukhamäki? Ukampisa, “Tatitun arunakap parlam” siw Biblianxa, uka iwxar phuqasax ukhamarakiw Diosan bendicionap katuqtanxa, Diosar yupaychäwisansa wali chʼamañchtʼata ukat jukʼampi kusisitaw jikxatasiraktanxa (2 Tim. 4:2; Isa. 48:17, 18). Diosat yatiyir sarañaxa, ¿kunjamatsa wali chʼamañchtʼata ukat kusisita jikxatasiñasatakix yanaptʼistaspa?
2. ¿Kuna tuqinakatsa yatiyir sarañax yanapistu?
2 Chʼamañchtʼata ukat bendicitaraki. Jan waltʼäwinakat llakisiskañat sipansa, Diosan Apnaqäwipan utjkani uka bendicionanakat jan armasiñatakiw Diosat yatiyir sarañax yanaptʼistu (2 Cor. 4:18). Ukat Bibliankki uka yatichäwinak yaqhanakar qhanañchktan ukhaxa Diosan arsutanakapar taqi chuyma atinisiñasatakiw yanapistu, ukhamarakiw Bibliankki uka yatichäwinakatsa wal yuspärtanxa (Isa. 65:13, 14). Ukat kunapachatï Jehová Diosar jukʼampi uñtʼañapataki ukat ‘akapachampi’ jan chikachasiñapataki maynir yanaptʼtan ukhaxa, akapachan munañanakapampi jan apayasiñasataki taqi chuyma amtatasaw amuyasiraki (Juan 17:14, 16; Rom. 12:2).
3. ¿Kunjamatsa yatiyir sarañax Jesucristot yatiqasis sarnaqañatakix yanaptʼistu?
3 Maysa tuqitxa, Diosat yatiyir sarañax Jesucristot yatiqasis sarnaqañasatakiw yanaptʼistu. Sañäni, kunapachatï taqi jaqinakaru yanaptʼañataki chʼamachastan ukhaxa altʼat chuymanïñwa yatiqtanxa (1 Cor. 9:19-23). ‘Wali llakita, tʼaqhisiyata jan awatirin uwijanakjama’ jaqinakampi parltan ukhaxa, jupanakat khuyaptʼayastanwa ukat wal yanaptʼañ munaraktanxa (Mat. 9:36). Janiw ukakïkiti, jaqix janis istʼkistpan yatiyktan ukarus janis yäqapkpan, ukampis yatiyaskakiñäni ukhaxa jukʼamp aguantañ yatiqañäni ukat mayninakar taqi chuyma yanaptʼasax wali kusisitarakïñäniwa (Hech. 20:35).
4. ¿Diosat yatiyir saratamatxa kamstasa?
4 ¡Yatiyir sarañax jiwasatakix mä bendicionawa! Kunattix Jehová Diosarukiw ukham lurasax jachʼañchtanxa. Yatiyir sarañax chʼamañchistuwa. Jïsa, khitinakatï taqi chuyma ‘suma yatiyäwinak taqinir yatiyasipki’ ukanakax walja bendicionanak katuqapxi (Hech. 20:24)