Bibliat apstʼat qillqatanakxa jan ina chʼusar aptʼapxañäniti
1. ¿Kunjamsa Jehová Diosan churäwinakaparux uñjañasa?
1 Kunapachatï Jesusax mä milagro tuqi manqʼañ utjayäna ukhaxa, jiltʼanak apthapipxam sasaw säna (Mat. 14:19-21). Ukhamaxa, ¿kunjamsa Jehová Diosan churäwinakaparux uñjañasa? Taqi chuyma luqtir mayordomo tuqi churkistu uka qillqatanakxa wali askit uñjañasawa, ukwa Jesusax yatichistu. Akham sistuwa: “Yuspagarapxarakim” sasa (Col. 3:15; Luc. 12:42; Mat. 24:45-47).
2. ¿Kunjamatsa revistanak jan jiltʼayasksna?
2 Revistanaka. Awisax inakiw resvistanakax jilaraskistu. ¿Kamachsnasa? Sapa kuti jilarayasstan ukhaxa, inas jukʼak mayiñax wakischispa. Jichhax nayrïr phaxsinakat jiltʼaskchistu ukhaxa, ¿kamacharaksnasa? Chiqasa, revistanakan yatichäwinakapax wali askïskakiwa. Ukhamax uka revistanakamp yatiyañatakixa, yatiyañ tuqit irpir chuymanirus jan ukax yaqha irpir chuymanirus jisktʼasiraksnawa.
3, 4. Tantachasiñ Utan qillqatanak apskasaxa, ¿kunanak amtañas wakisispa?
3 Yaqha qillqatanaka. Kuna qillqatampis jutïr phaxsix yatiyasini uk yatisaxa, janïr maykasax qhawqhas utan utjistu uk amuyañasawa. Jan utjkani ukhakiw Tantachasiñ Utat apssna. Semanan qhawqhas munasini ukhaki mayiñax askipunïspawa. Tukusini ukhakiw jukʼamp mayiraksna.
4 Jumataki mayiskäta ukhaxa, kawkïritï munaski ukak mayiñamawa. Uka qillqatarux sutim qillqtʼasiñamawa, ukhamatwa kawkïris jumanki uk yatïta. Maysa tuqitxa computadoran CD-ROM Watchtower Library ukax utjstam ukat Yatiyañataki, ¡Despertad! uka revistanakax utjxarakstam ukhaxa, marpachatak utjki uka revistanak (volúmenes) mayamp mayiñax janiw wakisxaspati.
5. Kunapachatï yaqhanakar qillqatanak jaytktan ukhaxa, ¿kunsa jan armañasäki?
5 Kunjamsa yaqhanakar churañäni. Yatiyir sarktan ukhaxa, yaqhipax wal yatxattʼañ munapxi, ukhamasti jupanakaruw qillqatanak jayttanxa. Chiqansa Jehová Diosan Qhanañchirinakapaw uka qillqatanakatxa qullqimp yanaptʼañasaxa. Ukampis yaqhanakaru qillqatanak jaytktan ukhaxa, jumax aka Uraqpachan apasiski uka yatichäwirux qullqimpi yanaptʼarakismawa sañxa janiw armasiñasäkiti.
6. ¿Bibliat apstʼat qillqatanakasax kunatsa wali askixa, ukat ukanakampix kun lurañas wakisispa?
6 Jesusax janiw jaqinakar manqʼañaki churkänti, jan ukasti Diosan arunakap yatichañaw jupatakix nayrankäna. Ukat akham sänwa: “Janiw jaqix tʼantʼa sapampikiti jakkani, jan ukasti taqi kuntix Diosax siski uka arunakampiw jakarakini” sasa (Mat. 4:4). Ukhamasti, Bibliat apstʼata qillqatanaka utjkistu ukanakax wali askiwa. Ukanak tuqirakiw wiñay jakañsa jikxatsna (Juan 17:3). ¡Bibliat apstʼat qillqatanakxa jan ina chʼusar aptʼapxañäniti!