Yatiyañaxa, Diosar taqi chuyma munasitas uñachtʼayi
1. ¿Jesusax munasiñat kuns luräna?
1 Jesusarux munasiñapaw jaqinakar Diosan arunakap yatiyañapatakix wiytäna. Aka Uraqinkkäna ukhaxa, Jehová Diosar munasitapax qhanaw amuyasïna, ukwa akham sasin uñachtʼayäna: “Kuntix Awkix siskitu uk lurta, akapachax nayan Awkir munataxa yatiñapataki” sasa (Juan 14:31). Jesusan arkirinakapjamaxa, yatiyir sarktan ukhax Jehová Diosar munasitas uñachtʼaytanxa, ukaw jiwasatak wali aski churäwixa (Mat. 22:37; Efe. 5:1, 2).
2. Jehová Diosar munasitasaxa, ¿kunjamsa yatiyañatakix yanaptʼistu?
2 “Sutimax jachʼañchatäpan.” Kunapachatï Jehová Diosan Apnaqäwipat kawki chiqansa yatiyaskaktan ukhaxa, Diosar munasitaswa uñachtʼayasktanxa ukat ukham lurasax sutipwa jachʼañcharaktanxa (Sal. 83:18, NM; Eze. 36:23; Mat. 6:9). Kunjamtï Jesusax yatichäwipan Diosan sutip jachʼañchkänxa, ukhamarakiw jiwasax yatiyktan ukhax Jehová Diosan sutip jachʼañchtanxa ukat munañap lurasiñapsa wal munaraktanxa (Mat. 26:39).
3. Jan aynachtʼañatakixa, ¿kunjamsa Jehová Diosar munasitasax yanaptʼistaspa?
3 Munasiñax jan aynachtʼañatakiw yanaptʼistu. Jehová Diosar munasiñax kunayman jan waltʼäwinakar saykatañwa yanaptʼistu (1 Cor. 13:4, 7). Jesusax kunayman jan waltʼäwinakanwa uñjasïna, ukanakax Diosar luqtäwipanxa aynachtʼayasapänwa. Ukampis munasiñapa ukat Jehová Diosar taqi chuyma luqtañ munatapaw jan waltʼäwinakar saykatañ yanaptʼäna (Mar. 3:21; 1 Ped. 2:18-23). Jiwasax kunayman jan waltʼäwinakanwa uñjasiraktanxa, ukampis Jesusjam Jehová Diosar munasiñäni ukhaxa, janiw aynachtʼkañäniti. Wali sum amuykiptʼasa Jesusat yatiqasiñäni ukhaxa, jakäwisan jan payachasisaw taqi chuyma Diosar luqtañäni. Awisax familian jarktʼatäsa usutäsa chuymankipstatäsa jan ukax jaqinakan jan yäqatäsasa aynachtʼañjamäspawa, ukampis ukanakax Jehová Diosar munasiñ uñachtʼayañxa janiw jarktʼkistaspati, jaqinakar jukʼamppach kunaymanitsa yatiyaskakiñäniwa.
4. Diosar munasktan ukanakaxa, ¿kuna suma luräwinïtansa?
4 Diosan munasiñap uñachtʼayañaxa jiwasatakix mä jachʼa bendicionawa ukat uka munasiñax chʼamanïtapsa yatiyir sarasaw uñachtʼayaraktanxa (1 Cor. 13:13). Ukhamasti Jehová Diosan sutipax jachʼañchatäkani uka urux niyaw jakʼachasisinki, ukatwa jiwasan ‘munasiñasax jukʼampi utjañapa’ (Fili. 1:9; Mat. 22:36-38).