¿Diosan Arup jukʼamppach yatiyañatak tiempo apstʼassnati?
1. ¿Kunatsa jankʼaki yatiyir sarañasax wakisi?
1 Diosan Apnaqäwipat suma yatiyäwinak jukʼamp yatxatañ munirinaka utjatap amuyasaw Jesusax yatiyapxañapatak arkirinakaparux akham säna: “Cosecha apthapiñax waljawa, [...]. Mayipxamaya yapunirux jukʼamp irnaqirinaka khitaniñapataki” sasa (Mat. 9:37, 38). Jichhax cosecha apthapiñ tukuya urunakankxtanwa, ukatwa jankʼaki irnaqir sarañasa. Ukhamasti, jukʼamppach yatiyir sarañ munstan ukhaxa Diosaruw yanaptʼa mayisiñasa (Juan 14:13, 14).
2. Jesusan mayitaparjamaxa, ¿kunsa yaqhip jilat kullakanakax lurawayapxi?
2 ¿Jukʼamppach yatiysnati?. Jehová Diosan yanaptʼapampix walja jilat kullakanakaw precursorjam irnaqañ qalltawayapxi (Sal. 26:2, 3; Fili. 4:6). Ukat maran mä phaxsi jan ukax jukʼampwa waljanix precursor auxiliarjam irnaqañatak chʼamachasiwayapxi, ukham irnaqtʼasax nayraruw sarantasipki. Ukham irnaqtʼasin wali kusisit jikxatasisaxa, yaqhipanakax precursor regularjam irnaqañ qalltañatakiw amtapxi (Hech. 20:35).
3. Wasitat precursorjam irnaqtʼañatakixa, ¿kun lurañamas wakisispa?
3 ¿Wasitat precursorjam irnaqtʼasmati? Precursorjam wali kusisita irnaqtʼatamat amtasiskpachätawa. Wasitat precursojam irnaqtʼañatakixa, ¿oracionan Diosar mayistati? Precursorjam irnaqañ jaytañatak jan waltʼäwi utjkäna ukax inas askichatäxchi, ukhamächi ukhax precursorjam wasitat kusisit irnaqxasmawa (1 Juan 5:14, 15).
4. ¿Kuna suma luräwis utjistu?
4 Cosecha apthapiñ horasan tukusiñapax jakʼankxiwa niyaw tukusini (Juan 4:35, 36). Ukatwa taqini wal amuykiptʼasiñasax wakisi, kunjamatsa tiempo jukʼamp apstʼassna ukat kunjamatsa jukʼamppach yatiyir sararaksna ukanak sum amtañataki. Ukat janipun kunjamatsa tiempo apstʼasiñjamäkaspa ukhaxa, ¿janit wali sum yatiyañatak chʼamachasksna? (Mar. 12:41-44.) Tiempomatix utjaskchixa, Jehová Diosamp yanaptʼayasisa precursorjam irnaqtʼaskakim. ¡Uka suma irnaqäwitxa janipun qhiparamti! (Sal. 110:3.)