Bibliat yatiqirinakarux munasiñampi yanaptʼañäni
1. ¿Bibliat yatiqirinakar yanaptʼañatakix kunas munasi?
1 Bibliat yatiqirinakar bautisasipxañapkam yanaptʼañatakix janiw Bibliat sapa semana yatichañakix wakiskiti. Kamisatix mä taykax wawanakapar wali munasiñampi munartʼaskixa, ukhamwa apóstol Pablox machaq arkirinakarux munasiñampi uñjirïna. Jiwasax ukhamarakiw Bibliat yatiqirinakar Diosar yupaychañ tuqit jiltapxañapatak yanaptʼañ munasax wali munasiñampi uñjapxarakiñasa (1 Tes. 2:7-9).
2. ¿Kunatsa Bibliat yatiqirinakarux munasiñampi uñjañasa, ukat kunjamatsa?
2 Munasirïpxañäni. Kunapachatï Bibliat mä yatiqirix yatiqataparjam sarnaqxi ukhaxa, Diosan kamachinakaparjam jan sarnaqir jaqinakatwa jithiqtxaraki (1 Ped. 4:4). Inas familiaranakapax uñisxapxarakchi (Mat. 10:34-36). Ukampis jiwasaw jupanakarux munasiñampi katuqtʼaraksna. Uka tuqitxa, experienciani mä misionero jilatax akham siwa: “Bibliat yatichañ tukuyasax janiw mäki tʼijsuwayañamäkiti. Wakisirjämani ukhax jupanakampix mä jukʼa parltʼasiwayañamapuniwa” sasa. Bibliat yatiqirimar kunjamat yanaptʼañatakis jankʼakïñamawa. Sañäni, ¿usutächi ukhax janit telefonot jawstʼkasma jan ukax visitʼkasma? ¿Tantachäwinakan Bibliat yatiqirimamp chika janit quntʼaskasma? ¿Wawanïchi ukhax janit wawanakapar uñjañ yanaptʼkasma?
3. ¿Bibliat yatiqirinakax taman chʼamañchtʼat jikxatasipxañapatakix kuns lursna?
3 Jilat kullakanakax yanaptʼapxarakiwa. Diosan Arupat yatiyasksta ukat yatiqiriman utapax jakʼankchi ukhaxa, ¿janit mä rato visitʼkasma ukat mayni jilat kullakanakar uñtʼaykarakisma? Wakisirjamäni ukhaxa, mayni yatiyirinakaru jan ukasti irpir chuymaninakarusa, jumamp chika Bibliat yatiqirimar yatichir sarañatakix invittʼañamawa. Ukhamaraki, yatiqirimaru Bibliat sapa semana yatichsxsta ukhaxa, tantachäwinakar sarañapatakiw chʼamañchtʼañama. Jilat kullakanakampi tantachtʼasisax chʼamañchtʼata ukat Diosar yupachañ tuqits mä familiankkaspas ukhamwa jikxatasini (Mar. 10:29, 30; Heb. 10:24, 25).
4. ¿Wali munasiñampi yanaptʼasax kuna askinaksa katuqañäni?
4 Mä awkix wawanakapar yupaychañ tuqit jan qarjtas yanaptʼi ukat wawanakapax Jehová Dios tuqit saytʼasis chiqa thakinjam sarnaqasipkaki ukhaxa, wali kusisitapuniw jikxatasi (3 Juan 4). Jiwasatï Bibliat yatiqirinakasaru wali munasiñampi yanaptʼañänixa uka awkjamarakiw wali kusisit jikxatasiñäni.