¿Suma nayranïpxtanti?
1. ¿Suma nayranïñax kun sañs muni?
1 Kuntï nayrasamp uñjktan ukarjamaw kuns lurañ yattanxa, ukatwa “nayramatix wali sumächixa, taqi janchimaxa wali suma qhananïniwa” sasin Jesusax siskäna uka arunakapax wali askipunixa (Mateo 6:22). Nayrasatï Diosar yupaychañ tuqit ‘sumänixa’, Diosan munañap lurañaw nayrankani. Mä arunxa, Diosan Apnaqäwipaw jakäwisanx nayrankani, ukat janiw yänak thaqhañasa yaqha luräwinakas yatiyir sarañatx jarktʼkistaniti.
2. ¿Kunanakas Diosar yupaychañx jarktʼistaspa, ukat kunas yanaptʼistaspa?
2 ¿Suma nayranïtanti? Propagandanak uñjasasa istʼasasa jan ukax mayninakar yänakanïtap uñjasasa, jupanakjamäñ munxaraksna. Ukhamax kuna amt phuqañatakisa jan ukax kun alañatakisa, janïr tiempo, qullqi, chʼamassa ina chʼusar aptʼkasaxa, sum ‘amuytʼasiñasawa’, ukat akham jisktʼasiñasarakiwa: ‘¿Ukanakax Diosar sumpach luqtañatakix yanaptʼitanit janich?’ sasa (Luc. 14:28; Fili. 1:9-11). Diosan Arupat jukʼamp yatiyaskakiñatakix kunjamatsa kunatï jakañatak munaski ukanakampix kusisitakïsksna uk amuytʼasiñasapuniwa (2 Cor. 13:5; Efe. 5:10).
3. Mä kullakax kunatï jakañatak munaski ukamp jakañatakiw jakäwip mayjtʼayäna, ¿kunsa experienciapax yatichistu?
3 Mä precursor regular kullakaxa jan jurnälpach irnaqtʼasakiw qullqinisapäna, ukampis jurnälpach irnaqtʼañatakiw amtawayatayna. Ukat qhipat sum amuytʼasisax akham satayna: “Janiw khitis pä patronarux sirvkaspati, kunanaktï munkt ukanak armtʼasxañajaw wakisïna, ukat kunatï jakañatak munaski ukanakampix kusisitakïñ yatiqañajarakïnwa. Yänakax janiw wiñayatakïkiti, ukanak jikxatañ layk chʼamachasitajax inamayakïtap amuyasiyäta” sasa. Jakäwip mayjtʼatap laykuw jupax kunatï munaski ukampik jakasiñatak yaqha irnaqäwin irnaqxäna, ukaw precursorjam irnaqaskakiñatak yanaptʼäna.
4. ¿Kunatsa jichhürunakan suma nayranïñasax wali wakiskirixa?
4 Qhipa urunakankxatas yatisaxa suma nayranïñasax wali wakiskiripuniwa. Sapa urutjamaw aka ñanqha pachan tukusiñapax jakʼankxi, ukhamarak suma Uraqin jakasiñ urus niya puriniñampirakiwa (1 Cor. 7:29, 31). Ukhamax Diosan Arupat yatiyañ nayrar uchañäni ukhaxa, jiwas pachpas ukhamarak khitinakatï istʼapkistu ukanakas qhispiyasipxarakiniwa (1 Tim. 4:16).