“Jan khitirus axsaramti”
1. ¿Kunjamsa Jeremiasjam axsarayasiraksna?
1 Kunapachatï profetäñapatak Jeremiasax uttʼayatäkäna ukhaxa, uka luräwix wali chʼamäkaspas ukhamwa jupax amuyäna. Ukampis wali munasiñampiw Jehová Diosax akham sasin säna: “Jan khitirus axsaramti” sasa. Ukhamatwa kuntï lurañapäkäna uk phuqañatak chʼamañchtʼäna (Jer. 1:6-10). Jiwasaxa niya ukhamarakwa yatiyir sarañatakix axsarayassna ukat kunsa jaqinakax sapxistani uk amuyasaw awisax yatiyir jan sarxsnati. ¿Kunas jan axsarañatak yanaptʼistani? ¿Ukat kuna askinaksa jikxatañäni?
2. Wakichtʼasiñaw jan axsarañatak yanaptʼistaspa sasinxa, ¿kunatsa sissna?
2 Wakichtʼasiñasawa. Sum wakichtʼasiñaw jan axsarañatak yanaptʼistani. Amuytʼañataki, kuna tuqitpunsa jaqinakax jisktʼapxistu uk janïr yatiyir sarkas amuytʼañäni ukhaxa, kunjamsa qhanañchsna uk yatxañäniwa (Pro. 15:28). Ukhamasti, kuna tuqinakatsa yatiqañ utana jan ukax yatiyktan ukhas jaqinakax parlapxistu ukxa, Familiana Diosar Yupaychañataki Aruma sat wakichäwinwa yatsupxsna (1 Ped. 3:15).
3. ¿Kunatsa jan axsarañatakix Jehová Diosar atinisiñax wakisi?
3 Jehová Diosaruw atinisiñasa. Jan axsarañatakix Jehová Diosaruw atinisiñasa, kunattix Jupax “nayaw jumampïskta” sistuwa (Isa. 41:10-13). Jïsa, janipuniw khitis ukham yanaptʼkistaspati. Ukampis jan walin jikxatasisas qullan ajayun yanapapampix wali sumwa qhanañchsna, sasaw Jesusax säna (Mar. 13:11). Ukatwa Jehová Diosar qullan ajayup mayiskakiñasa (Luc. 11:13).
4. ¿Kuna askinaksa jan qhiparas yatiyasax jikxatsna?
4 Askinakwa jikxatsna. Kunäkipans yatiyaskakiñäni ukhaxa, janiw axsarxañäniti ukat taqi chuymarakiw uk lurañäni. Khitinakatï qullan ajayump phuqtʼatäpki ukanakaw ukham yatiyapxi (Hech. 4:31). Ukhamtï lurañänixa, kuna yantʼanakantï jutïrin jikxatasiñäni uk atipjaskakiñäniwa. Ukat Jehová Diosan yanapapampix janiw axsarxañäniti ukat Juparus jukʼampiw atinisxañäni ukat iyawsäwisax jilxattarakiniwa (Isa. 33:2). Ukhamarusa, kuntï lurktan ukax Jehová Diosatakix askïtap yatisaxa, wali kusisitaw jikxatasiñäni (1 Ped. 4:13, 14). Ukatpï jan axsarasa ukat taqi chuyma Diosan Apnaqäwipat yatiyaskakiñasaxa. Ukat ak amtapuniñäni: Jehová Diosaw yanaptʼaskistani.