Jilat kullakanakasan Diosar jan yupaychir chachaparusa jan ukax warmiparusa, ¿kunjamsa yanaptʼsna?
1. Diosar jan yupaychirimpi jaqichatäpki ukanakaxa, chachapasa jan ukax warmipasa Diosar yupaychxaspa ukwa munapxi, ukampis janiw jupanakakix uk munapkiti, ¿kunatsa ukham sissna?
1 Jehová Diosar jan yupaychirimpi jaqichatäpki uka jilat kullakanakaxa, chachapasa jan ukax warmipas Diosar yupaychxaspa uk wal munapxi. Ukampis janiw jupanakakix uk munapkiti, jan ukasti tamax munarakiwa, kunjamtï Jehová Diosax munki ukhama: “Jupax taqinin qhispiyatäñapwa muni, kunatix chiqäki uk uñtʼapxañaparaki” (1 Tim. 2:4). Ukampis ¿kunjamsa jiwasax jupanakar yanaptʼsna?
2. Jilat kullakanakasan Diosar jan yupaychir chachaparu jan ukax warmipar yanaptʼañatakixa, ¿kunas yanaptʼistaspa?
2 Nayraqatxa, kunsa jupanakax taqi kunats amuyapxi ukhamwa amuyañasaraki. Waljanixa, familiapar wal munasipxi ukat kunjamsa suma chachäspa jan ukax suma warmïspa ukatakis chʼamachasipxarakiwa, ukat inas yaqha yupaychäwinipxarakchi. Maysa tuqitxa, inas jupanakax Jehová Diosan Qhanañchirinakapat mä jukʼak yatipxchi jan ukax kuntï amigonakapax jan walinak jiwasat sapxchi ukak yatipxarakchi. Ukat kuna tiempotï familiapampïñatak utjkäna ukxa Diosar yupaychañatakiw jilat kullakanakax uka tiempo apsusipxi, ukwa Diosar jan yupaychapki ukanakat yaqhipax jan walit uñjapxi. Taqi ukanak amuyañawa jilat kullakanakasan Diosar jan yupaychir chachaparusa jan ukax warmiparusa respetompi ukat munasiñap uñjañatak yanaptʼistani, ukat jupanakamp jikisiñäni ukhax jan axsartʼasaw parlañäni (Pro. 16:20-23).
3. Jilat kullakanakan Diosar jan yupaychir chachaparusa jan ukax warmiparusa, ¿kunjamatsa jukʼamp sum yanaptʼsna?
3 Maynin askippun thaqapxañäni: Biblian chiqa yatichäwinakapar iyaw sañapatakix qalltanxa luräwinakasampiw uñachtʼayañasa, janiw mäki Bibliat parlañasäkiti (1 Ped. 3:1, 2). Kunatï maynitakix askïki ukwa thaqañasa. Kullakanakaxa jilatanakan warminakaparuw yanaptʼapxaspa, jilatanakasti kullakanakan chachanakaparuw yanaptʼapxarakispa. ¿Kunjamsa?
4. ¿Kunjamsa maynin askip thaqatas uñachtʼaysna?
4 Jilatan warmiparusa jan ukax kullakan chachaparus janïr uñtʼkstaxa, kunsa lurañ amtaskta ukxa jilatampi jan ukax kullakampiwa parlañama. Ukampis qalltantï jan kuns yatiñ munirjam amuyañänixa, chʼamachasiskakiñamawa. Ukat suma arunakampi parltʼaskakiñäni ukat munasiñampi uñjaskakiñäni ukhaxa, inas kuna jan walinaktï Jehová Diosan Qhanañchirinakapat amuykäna ukax mayjtʼchispa (Rom. 12:20). Sum amuytʼasiri yaqhip jilat kullakanakaxa, familpacharuw manqʼtʼasiñatak utapar jawstʼapxi, ukhamat jupanakar sum uñtʼañataki ukat jiwasat jan wali jan amuyapxañapataki. Ukat Biblia tuqitpun parlañat sipansa kunanakay jupar llakisiychi uka tuqinakatwa parlapxi. Kunapachatï Biblian yatichäwinakapat istʼirjamäni ukhaw Diosan Arunakapan yatichäwinakapat parlaskäta. Ukat tamankir yaqhip jilat kullakanakar uñtʼxasinxa invittʼatax inas mä tantachäwir jutchispa, ukhamatwa jupax kuntï chachapas jan ukax warmipas yatiqaski uk uñjani. Ukampis janipuni Bibliat yatiqañ munkchixa, walik ukham warmimarusa jan ukax chachamarusa yanaptʼasktaxa sasaw sissna.
5. ¿Kunsa irpir chuymaninakax lurapxaspa?
5 Taqinit sipansa irpir chuymaninakaw kunjamanakatsa Biblian yatichäwinakapat parltʼapxaspa uk amuyapxañapa. Khititï qalltan Bibliat jan istʼañ munapkäna ukanakaxa, inas hospitalan jikxatasisa jan ukax wali usut jikxatasisa Biblian chuymachtʼäwi arunakap istʼañ munapxchispa. Ukat kunapachatï familian maynix jiwxi ukhaxa, kunjamsa familiankirinakaparux chuymachtʼapxi uk istʼapxañapatakiw irpir chuymaninakax Diosar jan luqtiriru invittʼapxaspa.
6. ¿Kunatsa jilatan warmiparu jan ukax kullakan chachaparu yanaptʼañasa?
6 Kunapachatï mä jilatan warmipasa jan ukax mä kullakan chachapasa Diosan arunakap iyawsxaspa ukhaxa, jupanakatakix wali kusiskañapunïspawa. Ukat Jehová Diosasa, angelanakapasa ukat tamankir jilat kullakanakas kusisipxarakispawa (Luc. 15:7, 10). Ukampis maynitï jan istʼirjamäkchixa, kusisiraksnawa, kunattix chʼamachasitasax Jehová Diosaruxa kusisiyarakiwa, “jupasti janiw munkiti khitin chhaqañapsa, jan ukasti muniwa taqininsa Diosar kutkatañapa” (2 Ped. 3:9).
[6 janan qhanañchäwipa]
Biblian chiqa yatichäwinakapar iyaw sañapatakix qalltanxa luräwinakasampiw uñachtʼayañasa, janiw mäki Bibliat parlañasäkiti