Lupʼiñaw taqi chuyma yatiyir sarañatakix wakisi
1. Kuna luräwtï lurañapäkäna uk jan qhiparas phuqañatakixa, ¿kunas Jesusar yanaptʼpachäna?
1 Jaypʼut chhaypthapiñapkamaw Jesusax usutanakaru qullaskatayna ukat jaqinakat ñanqha ajayunaksa alisuskarakitayna. Ukat qhiparmanthix Jesusar jan jikxatapxatapatxa arkirinakapax thaqhiriw sarapxäna ukat jikxatasax akham sasaw sapxäna: “Taqiniw thaqasipktam” sasa, milagronak luraskakim sirjamaw ukham sapxäna. Ukampis Jesusax janiw uk luraskakiñatak qhiparkänti, kunattix Diosan suma yatiyäwinakapwa nayraqat yatiyañapäna. Ukatwa jupanakarux akham säna: “Yaqha jakʼankir chiqanakar sarapxañäni Diosan arunakap parliri, ukatakirakiw jutta” sasa. ¿Kunas luräwip phuqañatakix yanaptʼpachäna? Alwat sartasisin Awkipat mayisiña ukat lupʼiñaw yanaptʼatayna (Mar. 1:32-39). ¿Kunjamsa uk lurañax jiwasar yanaptʼistaspa?
2. ¿Kunanakat lupʼiñasa taqi chuyma yatiyaskakiñatakix yanaptʼistani?
2 ¿Kuna tuqits lupʼiñasa? Jaqinakasti “wali llakitäpxänwa, tʼaqhisitäpxarakïnwa jan awatirin ovejanakjama” ukwa Jesusax amuyäna (Mat. 9:36). Jesusjamarakiw jiwasax qhawqsa jaqinakax suma yatiyäwinak istʼañ munapxi ukat kunja jankʼakis yatiyañaxa, uk amuyañasa (1 Cor. 7:29). Ukatxa, Jehová Diosan luräwinakapata ukat kunjamasa Jupaxa uka tuqitwa lupʼiñasa, ukat kunja askis Jupan Qhañachiripäñaxa ukat Biblian chiqa yatichäwinakap yatiqawayktan ukxa janiw jaqinakax yatipkiti, uka tuqinakats lupʼiraksnawa (Sal. 77:11-13; Isa. 43:10-12; Mat. 13:52).
3. ¿Kunapachas lupʼiñax walïspa?
3 ¿Kuna pachas lupʼiñasa? Yaqhipaxa, Jesusjamarakiw lupʼiñatakix wali alwat sartasipxi, wali chʼujukïski ukha. Ukat yaqhipasti, janïr ikintkasaw lupʼiñ yatipxaraki (Gén. 24:63). Ukat janisay tiemponïkstanxa, lupʼiñatakix tiempo apstʼasnawa. Yaqhipax autot sarkasaw lupʼipxi, yaqhipasti chiküruw manqʼtʼasis sapaki lupʼipxi. Ukat walja jilat kullakanakaruxa, mä jukʼa tiempokïchisa, janïr yatiyir mistkas lupʼiñawa qhana ukat taqi chuyma yatiyañatakix yanaptʼatayna.
4. ¿Kunatsa lupʼiñasa?
4 Lupʼiñampi mayisiñampiw Diosar taqi chuyma luqtaskakiñatak yanaptʼistani ukat kunas taqi kunat sipansa jakäwisanxa wali wakiskirixa uk amuytʼasiñs yanaptʼarakistani. Ukatxa yatiyaskakiñatakis chʼamañchtʼarakistaniwa. Jesusarutï lupʼiñax wal yanaptʼawaychïnxa, jiwasarux ukhamarakwa yanaptʼistani.