Familian askipataki

1. ¿Kunatakis israelit familianakarux sábado urun samarañax yanaptʼäna?

¹ Wali munasiñapatwa Jehová Diosax sábado urun samaraña leyxa uttʼayatayna ukat ukax israelit familianakan askipatakïnwa. Uküruw israelitanakax kuna lurañanakatsa samartʼapxäna ukat Jehová Diosan khuyaptʼayasiñapata ukat kunjamsa Jupamp apasisipki ukanakat lupʼiñatakis tiemponipxäna. Awk taykanakax wawanakapar Diosan kamachinakap yatichañatakis tiemponipxarakïnwa (Deu. 6:6, 7). Ukhamaw sapa semanax sábado urun Jehová Diosan markapax Jupar yupaychañatakix tiemponipxäna.

2. ¿Sábado urun samaraña leyix kunsa Diosat yatichistu?

² Ukampis Jehová Diosax janiw sábado uru imañxa mayxistuti. Ukhamäkchisa uka leyix akwa Diosat yatichistu: kunatï markapatakix askïki ukpun Jupax munäna (Isa. 48:17, 18). Jichhürunakanxa, jiwasan askis munatapxa, Familiana Diosar Yupaychañataki Aruma sat wakichäwi tuqiw uñachtʼayistu.

3. ¿Kuna amtampis Familiana Diosar Yupaychañataki Arumax uttʼayasi?

³ ¿Kuna amtampis Familiana Diosar Yupaychañataki Arumax uttʼayasi? Taman Librot yatxatañataki sat tantachäwixa, 2009 enero phaxsitwa kuna arumatï Yatiyañataki Diosan Yatichäwipa ukat Yatiyañatak Tantachäwix apaskäna uka pachpa aruman apasiñ qalltasiwayi. Ukhamat familianakax semanan mä aruma, Diosar yupaychañataki tiempo apstʼasipxañapataki ukat familjamax Diosar yupaychañ tuqit suma wakichtʼatäpxañapataki. Ukatwa, Bibliat familiamp yatxatapkäna uka arumxa kuna urutï Taman Librot yatxatañataki sat tantachäwir sarapkäna uka arumar jittʼayapxañapatak chʼamañchtʼasïna, ukhamat uka tiemponxa Bibliata ukat kunatï familiatakix wakiski ukarjam yatxatapxañapataki.

4. ¿Familiana Diosar Yupaychañataki Aruma sat wakichäwix mä horakïñapati? Uk qhanañchtʼam.

⁴ Taman Librot yatxatañataki sat tantachäwir sarapxirïktan ukhaxa, waktʼayasiñatakisa ukat ukar sarañatakisa tiempow munasïna. Uka tantachäwix mä horakis apaschïnxa, waljanix niya arumpachaw tiempo apsusipxañapäna. Uka tantachäwi jittʼayasitapatxa, jichhax uka tiemponxa Jehová Diosaruw familjam yupaychsna, ukhamasti Familiana Diosar Yupaychañataki Aruma sat wakichäwix janiw mä horakïñapäkiti, jan ukasti kunas familiatakix wakisi ukat qhawqha tiemponïpxis ukarjamaw qhawqha tiempos uka wakichäwix apasini uk amtapxañapa.

5. ¿Qalltat tukuykamati grupjam yatxatañax wakisispa? Uk qhanañchtʼam.

⁵ ¿Qalltat tukuykamati grupjam yatxatañax wakisispa? Wawani familianakasa ukat jan wawani matrimonionakas Biblian yatichäwinakap juntuk yatxatapxi ukhaxa, maynit maynikamaw chʼamañchtʼasipxi (Rom. 1:12). Ukat familpachax sumarakwa apasipxi. Ukatwa Familiana Diosar Yupaychañataki Arumanxa Biblian yatichäwinakapatpun yatxatapxañapa. Ukampisa sapa mayni familiatxa, sapakis yatxatapxarakispawa. Amuytʼañataki, familpacha grupjam yatxatañ tukuyxasaxa, familiax juntukïskchisa sapa mayniw sapaki yatxatasipkaspa, inas tantachäwinakatak wakichtʼasisa jan ukax revistanak liyisasa. Ukat yaqhip familianakanxa uka arumax televisión janiw naktayapkiti.

6. ¿Kunjamsa Familiana Diosar Yupaychañatak Aruma sat wakichäwix apasispa?

⁶ ¿Kunjamsa apasiñapa? Janiw sapa kutis jisktʼampi ukat qhanañchtʼampipuniñapäkiti. Yaqhip familianakaxa, kawkïr tantachäwitï semanan apaski ukar uñtasitwa Familiana Diosar Yupaychañataki Arumxa wali askirjam waktʼayapxi. Amuytʼañataki, familpachaw Biblia liytʼapxi, tantachäwinakatakiw mä juk’ waktʼayasipxi ukat kunjamsa yatiyir sarasax yatiyapxäni uksa yatsupxaraki. Jukʼamp amuytʼanakax 6 jananwa jikxatasi.

7. Askirjam apasiñapatakixa, ¿kunsa awk taykanakax lurapxaspa?

⁷ Askirjam apasiñapatakixa, ¿kunsa awk taykanakax lurapxaspa? Kawkhantï munasiñax utjki ukat sumak jikxatasipxaspa ukanwa wawanakax yatiqapxi. Tiempotï sumächixa, uta anqansa yatxatapxaspawa ukat qhawqhay samartʼañax wakischini ukarjamaw samartʼapxarakispa. Yaqhip familianakaxa, yatiqañ tukuyatarux kun manqtʼasiñatakis waktʼayapxarakiwa. Inas awk taykax wawapar kuna jan wali luratanakapat chiqañchañ wakischini, ukampis janiw Familiana Diosar Yupaychañataki Aruman uk lurapxañapäkiti. Jan ukasti, inas yaqha uru jupa saparuk chiqañchañax wakischispa, ukhamata jilat kullakanakap nayraqatan jan phinqʼachañataki. Familiana Diosar Yupaychañataki Arumaxa, janiw chʼama laqʼxjtayirjamäñapäkiti, jan ukasti yupaychktan uka kusisit Diosan kusisiñapwa uñachtʼayañapa (1 Tim. 1:11, NM).

8, 9. ¿Kunsa familia pʼiqtʼirix lurañapa?

⁸ ¿Kunsa familia pʼiqtʼirix luraspa? Familiana Diosar Yupaychañataki Arumanx kunsa lurasini ukat kunjamsa apasini uk janiräkipan waktʼayasini ukhaxa, taqiniw wali askirjam yatxatapxani (Pro. 21:5). Uka tuqitxa warmipax kuns amuyi uk jisktʼarakispawa (Pro. 15:22). Ukat awisax wawanakar jisktʼañax wakisirakispawa. Ukhamtï luranixa, kunsa yatxatañ munapxi jan ukax kunas jupanakar llakisiyi uk sum amuyani.

⁹ Awisax awikix janiw walja tiempo wakichasiñap wakiskaniti. Kunattix inas familiax sapa semana mä qillqatat yatxatañ munapxchispa, ukhamatwa jupax sapa kuti yaqha wakichäw jan waktʼaykaniti. Ukat inas sapa wakichäwi tukuyataruxa, Diosar yupaychañ tuqitxa kunas familiapatakix wakisi ukarjamaw jutïr semanatak waktʼayarakchispa. Yaqhipaxa, kuna tuqinakatsa yatxatapxani ukxa mä lista lurtʼasipxi ukat kawkhantï taqinis uñjapkaspa ukharuw lipʼkatayapxi. Uk uñjasax familiankirinakax wal suyapxi ukat wakisirjamäki ukhax wakichtʼasipxarakiwa.

10. ¿Khitinakatï sapäsipki ukanakaxa kunsa Familiana Diosar Yupaychañataki Arumanx lurapxaspa?

¹⁰ ¿Nayax sapakïsax kunsa luriristxa? Khitinakatï sapäsipki jan ukax familiapan jupa sapaki Diosar luqtapki ukanakaxa, Familiana Diosar Yupaychañataki Arumanxa, sapakiw Bibliat yatxatapxañapa. Uka wakichäwinx akanak lurañaw wali wakiskirixa: Biblia liyiña, tantachäwinakatak wakichtʼasiña, Yatiyañataki ukat ¡Despertad! sat revistanaka liytʼaña. Ukxarux yaqhip jilat kullakanakaxa, jukʼampwa Bibliat yatxatapxi. Ukat awisaxa yaqha jilat kullakanakaruw jupamp chik Bibliat yatxatañataki jawstʼapxaraki.

11, 12. Sapa semana Familiana Diosar Yupaychañataki Aruman yatxatasax kuna bendicionanaksa katuqsna, uk mä qhawq arstʼam.

¹¹ ¿Familiana Diosar Yupaychañataki Aruma sat wakichäwi apasax kuna bendicionanaksa katuqsna? Jehová Diosar taqi chuym yupachktan ukhaxa, jukʼampwa Jupar jakʼachastanxa. Ukat familpach Diosar yupaychapxi ukhaxa, jupanakpachas sumarakwa apasipxi. Uka bendicionatxa akham sasaw mä chacha warmix saraki: “Panpachaniw precursorapxta ukat janirakiw wawanikpti, ukhamasti Familiana Diosar Yupaychañataki Arumxa wali kusisitapuniw suyapxta. Ukat uka wakichäwi apasax jukʼampwa Jehová Diosarux jakʼachasipxta ukat panpachanis jukʼamp sumwa apasipxta. Kunürutï uka wakichäw apañax waktʼapkitu ukhaxa, alwat sartasin akham sasaw panpachanix sasipxta: ‘¿Kunsa jichhürux lurañäni uk amttati? ¡Familiana Diosar Yupaychañataki!’” sasa.

¹² Kuna arumas familjam Diosar yupaychapxani uk amtañaxa, wali askirakiwa jan añcha tiemponïpki uka familianakatakixa. Mä kullakaxa sapakiw pä yuqall wawanakapar uywi ukat precursorjamarakiw irnaqtʼaski, jupax akham siwa: “Nayraxa, Bibliat familiamp yatxatañxa janiw sum apapxirïkayätti. Awisakiw mä jukʼa yatxatapxirïta, kunattix wali qaritaw jikxatasiyäta. Ukatwa Familiana Diosar Yupaychañataki Arumat yuspärañatak qillqanipxsma. Jichhaxa, sapa semanaw yatxatasipkta ukat bendicionak katuqapxaraktwa”.

13. Kunjamsa Diosampix apasisktan ukxa, ¿kun lurasas uñachtʼayañäni?

¹³ Kunjamtï sábado urun samaraña leyix familianakan askipatakïnxa, ukhamarakiw Familiana Diosar Yupaychañataki Arumaxa, munasiri Awkisan mä aski churäwipawa (Sant. 1:17). Nayraxa, kunsa israelitanakax sábado urun lurapxäna ukarjamaw kunjamsa Jehová Diosampix apasipxäna uk uñachtʼayapxäna. Jichhürunakax ukhamarakiwa, Familiana Diosar Yupaychañataki Aruman kunsa lurasktan ukarjamaw kunjamsa Jehová Diosampix apasisktan uk uñachtʼayañäni (2 Cor. 9:6; Gál. 6:7, 8; Col. 3:23, 24). Familiamantï uka wakichäwix apasiskchixa, salmonak qillqirjamaw akham sapxäta: “Nayasti Diosaruw jakʼachasï, ukaw nayarux kusisiyitu. Tatay, jumaw arxatirixätaxa” sasa (Sal. 73:28).

[5 janan qhanañchäwipa]

Familiana Diosar Yupaychañataki Arumaxa, janiw chʼama laqʼxjtayirjamäñapäkiti, jan ukasti yupaychktan uka kusisit Diosan kusisiñapwa uñachtʼayañapa

[6 janan recuadropa]

QHANAR UCHAÑATAKI

Familiana Diosar Yupaychañataki Aruman yatxatañatak amuytʼanaka

Biblia:

• Semanan Bibliat liyiñatak waktʼistu uk mä qhawqha liytʼaña. Biblia liykasax inas mayn maynix Biblian qillqatäki uka jaqinakan aruparjam liytʼanipxchispa

• Biblia liyisax mä dramar uñtataw lurapxarakisma

• Uka semanan kawkïr jaljanaksa Bibliat liyiñax waktʼi, ukwa janïr wakichäw apaskipan taqinis liysupxaspa ukat uka tuqitwa maya jan ukax pä jisktʼa qillqtʼasipxaspa. Ukat familpachaw qhanañchäwip yatxatapxaspa

• Sapa semana Bibliat apstʼat mä jiskʼa tʼaqa mä tarjetar qillqtʼasiña ukat pʼiqir yatsuñataki ukat qhanañchtʼañataki chʼamachasiña. Uka tarjetanak tantasin qhawqha tʼaqanaksa amtasta uk yatiñatakix sapa semanan uñakiptʼaña

• Biblian grabacionanakap istʼaña ukat Bibliamp arktaña

Tantachäwinaka:

• Familpacha tantachäwinakatak mä qhawq wakichtʼasiña

• Jutïr semanatak waktʼayatäki uka qʼuchunak yatsuña

• Maynitï familian Yatiyañataki Diosan Yatichäwipa sat tantachäwin arstʼañ waktʼchi jan ukax Yatiyañataki Tantachäwin mä demostracionanïchi ukhaxa, kunjamsa arstʼapxaspa uk taqiniw amuytʼapxaspa, jan ukax familia nayraqatan yatsupxaspa

Familiatakjama:

• Kunsa wayn tawaqunakax yatiñ munapxi jan ukax Aprendamos del Gran Maestro sat libronakan mä qhawqha yatichäwinakapat yatxataña

• Kuna jan waltʼäwtï yatiqañ utana utjaspa ukhax kunjamsa parlaspa uk yatsuña

• Awk taykax wawanakäpkaspasa ukat wawanakax awk taykäpkasapas ukhamwa lurapxaspa. Ukanxa, wawanakaw mä yatichäwit yatxatasin awk taykapar amuytʼayapxi

Yatiyir saraña:

• Sabadompi domingompix kuna tuqinakats yatiyapxani uk sum yatsuña

• Jesusan jiwäwip amtañataki phaxsina jan ukax vacacionansa kunjamsa familianxa jukʼampi yatiyir sarapxaspa uk amuykiptʼaña

• Kunjamsa yatiykasax mä jisktʼar qhanañchtʼapxaspa uk familiapachat sapa mayni yatxatapxañapataki ukat yatsuñatak mä qhawqha minutonak apstʼasiña

Yaqha amuytʼanakampi:

• Jichhak purinki uka revistanakat mä yatichäw familpacha liytʼaña

• Jichhak purinki uka revistanakatxa, sapa mayniw kuna yatichäwis jupatakix aski uk liytʼaspa ukat uka tuqit familiar qhanañchtʼaspa

• Uka arumatakix awisax yaqha jilat kullakanakaruw familiamamp yatxatapxañapatak invittʼaspa, ukat inas entrevistarakchispa

• Kawkïr videonakatï utjkistu uk uñjaña ukat uka tuqit amuykiptʼaña

• “Los jóvenes preguntan” jan ukax “Actividades para la familia” siski uka wakichäwinak ¡Despertad! sat revistat familpach yatxataña

• “Wawanakar yatichañataki” jan ukax “Wayn tawaqunakataki” siski uka wakichäwinak Yatiyañataki sat revistat yatxataña

• Anuario librota jan ukax kimsa uru jachʼa tantachäwin mistki uka qillqatanakat mä yatichäw liytʼaña ukat amuykiptʼaña

• Jachʼa tantachäwinakar sartan uka qhipat aski yatichäwinak amtaña

• Jehová Diosan luratanakap uñjaña ukat kunsa ukax Jupat yatichistu uka tuqit parltʼaña

• Inas familpachax mä maqueta, mä mapa jan ukax mä dibuj lurapxchispa