“Jumanakan qhanamax jaqinakatakix qhantʼarakpan”
1. ¿Kuna aski luräwinïtansa?
1 Alwat jaypʼukamaw Intin suma kʼajkir qhanapax Jehová Diosar jachʼañchi. Ukampis janiw Jesusax uka kasta qhananïpxañapatak arkirinakapar chʼamañchkänti, jan ukasti ‘jakañ qhananïpxañapatakiw’ chʼamañchtʼäna (Juan 8:12). Uka kasta qhananïñax Diosan mä aski churäwipawa, ukat akham sasaw Jesusax iwxtʼäna: “Ukhamaraki jumanakan qhanamax jaqinakatakix qhantʼarakpan” sasa, mä arunxa, jaqinakan askipatakiw qhantʼañasa (Mat. 5:16). Jichhürunakaw uk lurañax jukʼampi wakiskirixa, kuna laykutix akapachankirinakax Diosar yupaychañ tuqitx chʼamakanwa jikxatasipxi. ¿Kunjamsa ukx Jesusjam lursna?
2. ¿Kunjamsa Jesusax Diosan chiqa yatichäwinakap wali askïtap uñachtʼayäna?
2 Yatiyasa: Jesusax tiempopsa, chʼamapsa ukat qullqipsa Diosan chiqa yatichäwip yatiyañatakiw apstʼasïna, ukatwa utanakaru, plazanakaru, qullunakaru... kawkhantï jaqinakax jikxatasipxäna uka chiqanakar yatiyir saräna. Ukax jupanakatak wali askïtap jupax sum yatïna (Juan 12:46). Ukampis uka yatiyäwinakax jukʼamp jaqinakar yatiyasiñapatakixa, arkirinakaparuw ‘akapachar qhantʼapxañapataki’ wakichäna (Mat. 5:14). Uka luräwxa jupanakax sumwa phuqapxarakïna, kunattix jaqinakaruw yanaptʼapxäna ukat Diosan chiqa yatichäwinakapsa yatiyapxarakïnwa.
3. Diosan chiqa yatichäwinakapax wali askïtapxa, ¿kunjamsa jiwasax uñachtʼaysna?
3 Jichhürunakanxa, ukhamarakiw Diosan yupaychirinakapax “qhanankirinakjama jaka[pxi]”, ukatwa kawkhantï jaqinakax jikxatasipki uka chiqanakan yatiyapxi (Efe. 5:8). Awisaxa, mayninakan uñjkat Biblia liytʼasa jan ukax Bibliat apstʼat qillqatanak liytʼasakiw samartʼañ horasan escuelansa jan ukax irnaqäwinsa parltʼañ qalltsna. Ukhamwa mä kullakitax maynir Bibliat yatichañ qalltatayna ukat 12 yatiqir masinakaparuw libronak churarakitayna.
4. ¿Kunatsa qhantʼañatakix sum sarnaqañasax wakisi?
4 Suma luräwinaka lurasa: Qhantʼañatakixa, sum sarnaqañasarakiwa (Efe. 5:9). Irnaqäwinsa, escuelansa jan ukax yaqha chiqanakansa, suma sarnaqatasxa jaqinakax qhan amuyapxi, ukhamatwa Biblian chiqa yatichäwinakapat yatiysna (1 Ped. 2:12). Amuytʼañataki, phisqa marani mä jiskʼa wawan suma sarnaqatap uñjasawa yatichiripax awk taykapar jawsayatayna. Jupax akham sänwa: “¡Janipuniw mä jiskʼa wawar ukham kunatï walïki ukat jan walïki uk qhan amuyatap uñjirïkti!” sasa. Chiqasa, yatiyatasata ukat suma sarnaqatas uñjasaw jaqinakax ‘jakañ qhanaru’ jutapxi ukat Diosarus jachʼañchapxaraki.