‘Taqenimpis sumankapjjam’
1. Utanitï Diosan arunakapat parlatajj coleraschi ukhajja, ¿Biblian kawkïr ewjjtʼapsa istʼañasa?
1 Jehová Diosan markapajj sumankañ muniriwa, ukat sumankañ toqetwa yatiyapjjaraki (Isa. 52:7). Ukampis Diosan arunakap yatiyktan ukhajja, awisajj yaqhepanakajj colerasipjjewa. Ukhamäni ukhajja, ¿kunas sumankañatakejj yanaptʼistaspa? (Rom. 12:18.)
2. ¿Kunatsa amuytʼasirïñajj wali wakiskiri?
2 Amuytʼasiriñasawa. Cheqas yaqhepanakajja, Diosan arunakap jan istʼañ munasaw colerasipjje, ukampis janiw taqenejj ukatpun colerapkiti. Jan ukasti familiapan inas kuna jan walis utjchi ukatwa coleratäsipkaspa, mä arunjja, jan wali horasaruw pursna. Ukat Diosat jan istʼañ munasapun coleratäsipkchi ukhajja, ak amtañasawa, jupanakajj jiwasanakat jan wali parlir istʼasaw ukham colerasipjjaspa (2 Cor. 4:4). Jiwasatï taqe ukanak sum amuyañäni ukhajja, janiw jankʼak chuym ustʼayaskañäniti (Pro. 19:11).
3. ¿Utanirojj kunjamsa respeto uñachtʼaysna?
3 Respetañasawa. Diosan arunakap yatiyktan ukhanakanjja, yaqhepanakajj janiw costumbrenakap armirjamäpkiti (2 Cor. 10:4). Cheqas istʼapjjestaniti janicha ukajj jupanakatäjjewa. Jiwasanakajj kuntï creyipki ukanakarojj janiw jiskʼachañasäkiti ni jiwasas wal yatksna ukham amuyayañasäkiti. Ukat jan istʼañ munasin sarjjam sistani ukhajja, respeto uñachtʼayasinjja sarjjañasawa.
4. ‘Suma’ arunakamp parlañajj ¿kunasa?
4 Suma arumpiw parltʼañasa. Jan wali arunakamp toqjjapkchistani ukhasa, pacienciampi ukat ‘suma’ arunakampiw parljjayañasa (Col. 4:6; 1 Ped. 2:23). Toqesiskañat sipansa, kunansa jupajj jiwasjam amuyi uka toqet parlañasawa. Ukat kunatsa jan istʼañ munki uk inas suma arunakampi jisktʼaraksna. Ukampis jan jukʼamp coleraskañapatakejja, awisajj janiw parljjayañajj wakisjjaspati (Pro. 9:7; 17:14).
5. Yatiykasajj suma arunakampi parljjayañäni ukhajja, ¿kuna askinaksa jikjjatañäni?
5 Jiwasatï suma arunakamp parljjayañänejja, utanejj uk amtasisajj khititï mayan visittʼkani ukhajja, inas sum istʼjjchispa (Rom. 12:20, 21). Ukat janiw costumbrenakap jaytkaspati sañjamäkchi ukhasa, qhepatjja Jehová Diosan loqtiripaw tukjjaspa (Gál. 1:13, 14). Janis ukhamäkchinejja, jiwasanakatï jan jankʼak coleraskañäni ukat suma arunakamp parljjayañäni ukhajja, Jehová Diosaruw jachʼañchañäni ukat kuntï yatiyktan ukarus askit uñjayarakiñäni (2 Cor. 6:3).