Jesusan jiwäwip amtañatak wakichtʼasiñäni
1. Jesusan jiwäwip amtaskani uka phajjsejja, ¿kuns lurañäni?
1 Aka marajja, Jesusan jiwäwipajj marzo phajjsin 26 uru saraqataruw amtasini, ukhaw kuntï Diosajj jaqenakar qhespiyañataki lurawayki ukjjat wali kusisit chuymampi yuspärañäni (Isa. 61:10). Janïra uka uru purinkipana kusisit chuymampi wakichtʼasiñaw wal yanaptʼistani, ¿kunatsa?
2. Kuna luräwinaktï Santa Cena amtañataki luraskani ukanakjja, ¿kunatsa lurañäni?
2 Santa Cena amtañatak wakichäwinaka. Cheqansa, Santa Cena amtañajj janiw wali jachʼäñapäkiti, ukampis wali wakiskir uruwa, ukhamajj taqe kun sum mistuñapatakejja, janïr uka uru purinkipanwa sum wakichtʼasiñasa (Pro. 21:5). Uka tantachäwejj kuna horänisa ukat kawkhankanisa ukjja janïräkipanwa amtasjjañapa. Ukat ukürutakejj uka cheqajj qʼomäñapawa ukat suma waktʼayatäjjañaparakiwa. Tʼantʼas vinos ukankjjañapawa. Ukatjja, arstʼir jilatajj wakichtʼasiñaparakiwa. Tʼantʼampi vinompi pasayapkani uka jilatanakasa, katoqtʼirinakasa wakichtʼatäpjjañaparakiwa. Cheqas taqe ukanakajj tamaman niya waktʼayatäjjpachawa. Ukhamajj Jesusan qhespiyäwipar wal yuspäratas laykuw taqe ukanak sum wakichtʼañäni (1 Ped. 1:8, 9).
3. ¿Kunjamsa Santa Cena amtañatakejj chuymas wakichtʼsna?
3 Chuymas wakichtʼañäni. Chuymas wakichtʼañajj wali wakiskirirakiwa (Esdras 7:10). Ukhamatwa Jesusan jiwäwip amtañajj kunja wakiskirisa uk amuyañäni. Ukhamajj Biblia liyiñatak waktʼayasiwayki ukanak liytʼañatak tiempo apstʼasiñasawa, ukat Jesusajj kunjamsa niya jiwañampëjjäna ukhajj jikjjatasina uka toqet lupʼiñasarakiwa. Jïsa, kuntï Jesusajj jiwas layku lurawayki uka toqet lupʼiñäni ukhaw jupat yateqasiñatak chʼamachasirakiñäni (Gál. 2:20).
4. Jesusan qhespiyäwipampejj kuna askinaktï jikjjatasiwayki ukanakatjja, ¿kawkïris wal kusisiytam?
4 Criston jiwatapaw Jehová Diosan taqe kunjjar Munañanïtap uñachtʼayi. Ukat juchampita jiwañampitsa qhespiyarakistuwa. Ukat Diosamp sum apasiñataki ukat wiñay jakañatakis mä thakhi jistʼarawayi (Col. 1:21, 22; 1 Juan 2:2). Jesusan jiwäwipat lupʼiñaw Jehová Diosar jakäwis katuyasiwaytan ukamp phoqhañataki ukat Cristot yateqasiñasatak yanaptʼistani (Mat. 16:24). Cheqansa, Jesusan jiwäwip amtañatak wakichtʼasisawa ukat uka tantachäwir sarasaw wali kusisit jikjjatasiñäni.