Profetanakat yateqasipjjañäni: Jonás
1. ¿Kunsa Jonás profetat yateqassna?
1 Jonás profetat parlir istʼasajj ¿kuns amuytanjja? Yaqhepanakajj mä llaytha ukat jan sinttʼasir jaqënwa sasaw amuyapjje. Ukampis jupajj altʼat chuymani, jan ajjsariri ukat taqe chuyma Diosar servirïnwa. Jiwasajj ¿kunsa sarnaqäwipat yateqassna? (Sant. 5:10.)
2. ¿Jonás chachan altʼat chuymanïtapat kuns yateqassna?
2 Altʼat chuymanïnwa. Kuna luräwtï Jonás chachajj katoqkäna ukar sarañat sipansa, jan istʼasisaw yaqha cheqar saräna. Kunattejj asirionakajj jan sinttʼasiripjjänwa. Yamas Nínive markajja, “jaqe jiwayir” markat uñtʼasïna (Nah. 3:1-3). Ukampis Jehová Diosajj Jonasar cheqañchänwa, ukat mayamp saram siskän ukhajj wali altʼat chuymampiw istʼjjäna (Pro. 24:32; Jon. 3:1-3). Qalltañ kuna luräwtï katoqkän uk janis lurañ munkchïnjja, qhepat Diosan munañap phoqjjänwa (Mat. 21:28-31). ¿Jiwasat kamsasirakispasa? Kuna cheqañchäw katoqkasas jan ukajj kawkhantï Diosan arunakap yatiyañajj chʼamäki ukhajj ¿yatiyaskaktanti?
3. Diosan arunakap yatiyañatakejj kunatsa ¿jan ajjsarirïña ukat taqe chuyma servirïñajj wakisi?
3 Jan ajjsariri ukat taqe chuyma servirïnwa. Jonasajj jan mä suma amtar purisajj barcon irnaqerinakaruw jan waltʼäwinakan uñjasiyäna, uk amuyasisajj jupanak laykus jakäwip aptʼasirjamänwa (Jon. 1:3, 4, 12). Ukat Nínive markar Diosan juiciopat yatiykasajj inas sum istʼayasiñatakejj uka chika markakam mantchïna. Taqe ukanakjja janiw mä llaytha jaqejj lurkaspänti, jan ukasti mä jan ajjsartʼiriw luraspäna (Jon. 3:3, 4). ¿Kunsa ukat yateqassna? Aka jan wali pachan Diosan arunakap jan ajjsaras yatiyañatakiw yanap Jehová Diosat mayiñasa (Hech. 4:29, 31). Ukat Diosan arunakapat yatiyañatakis tiempsa ukat chʼamsa apstʼasiñasarakiwa (Hech. 20:24).
4. Profetanakan sarnaqäwinakapat ¿kunatsa lupʼiñajj wakisispa?
4 Ukhamajj Diosan profetanakapat yatjjatkañäni ukhajja, jiwasas jupäksna ukhamwa amuyasiñasa. Ukat akham jisktʼasiñasarakiwa: “¿Kuns nayajj luririskayatjja? ¿Kuna askinaksa jupat yateqasiristjja?” sasa (Heb. 6:11, 12). Uka toqenakatjja, Diosan Apnaqäwipat Yatiyañataki sat aka qellqatanwa yaqha profetanakat jutïr yatichäwinakan yatjjatasiskani.