¿Khitinakas aka toqet yatjjatañ munapjjaspa?
1. Revistanak liytʼkañäni ukhajja, ¿kuna toqetsa lupʼiñasa ukat kunatsa?
1 Yatiyañataki ukat ¡Despertad! revistanakajj taqe oraqpachankir jaqenakatak wakichtʼatawa. Ukat kunayman yatichäwinakaw uka revistanakan utji. Ukat revistanak liytʼkañäni ukhajja, ¿khitinakas aka yatichäwit yatjjatañ munapjjaspa?, sasaw jisktʼasiñasäspa. Ukat mä aski yatichäwi jikjjatasajj khitirutï yanaptʼkaspa ukaruw uñachtʼayaraksna.
2. Revistanakasan pʼeqeñchäwinakapat ¿kawkïrinakatsa maynejj yatjjatañ munaspa?
2 ¿Trabajomankir masimamp parlawayapkta uka toqetti Yatiyañataki sat revistan parli?, jan ukajj familiaranakamar yanaptʼañatak ¿mä aski yatichäwich utji? ¿Kawkïr markanakatï ¡Despertad! sat revistan uñstkäna uka markar maynin sarañapti yatta? Ukat kawkhantï yatiyktan uka cheqan negocionak utjchi jan ukajj marka apnaqerinakan oficinanakap utjchi ukhajja ¿kawkïr revistanaksa jupanakajj munapjjaspa? Amuytʼañataki, mä revistantï kuna jan waltʼäwinakans chuymankipstatanakajj jikjjatasipjje uka toqet parlaspa ukhajja, kawkhantï chuymankipstatanakar apapki, ukanwa uka revista wal munapjjaspa. Ukat markachirinakar yanaptʼapki ukanakarojj jan waltʼäwinakat parlki uka revistanak inas munapjjchispa.
3. Revistanakasan yatichäwinakapatjja, ¿khitinakas jukʼamp yatjjatañ munapjjaspa?, uk mä experienciamp qhanañchtʼam.
3 Kuna askinakas jikjjatasiwayi. Sudáfrica markankir mä casarat chacha warmejja. Kunapachatï ¡Despertad! de octubre de 2011, “Cómo criar hijos responsables”, sat pʼeqeñchäwin revista katoqapkän ukhajja, kawkhantï yatiyapkän uka cheqankir 25 escuelanakaruw telefonot jawsapjjäna. Ukanakat 22 escuelanakaw revistanak katoqañ munapjjäna. Katoqasinsti, uka escuelanakan yateqerinakaparuw lakirapjjatayna. Yaqha chacha warmisti uka pachparakwa lurapjjäna. Ukat uka escuelan yatichirinakapajj revistat sapa semanan sum yatjjatapjjañapatakiw yateqerinakar chʼamañchtʼapjjäna. Ukat uka jilat kullakajj tamanak tumptʼir jilataruw kuntï lurapkäna uk yatiyapjjäna. Jupasti, kawkïr tamanaktï tumptʼkäna ukanakarojj ukham lurapjjañapatakiw chʼamañchtʼäna. Walja tamanakarakiw sucursalar mayampi uka revista mayipjjäna, ukat wasitatwa uka revistajj lurasirakïna.
4. ¿Kunatsa revistanakas taqenir churañatak chʼamachasiñasäspa?
4 Kunjamsa jichhürunakan jan walinakar saykatsna ukwa revistanakasajj qhanañchi. Ukatakejj Diosan Reinoparu ukat Bibliarupuniw sum yatjjatañatak api. Uka revistanakakiw Oraqpachan “qhespiyasiñ yatiyäwinak” yatiyaski (Isa. 52:7). Ukhamajj revistanakas taqenir churañatak chʼamachasiñäni. Ukatakejj akham jisktʼasiñasaw wakisispa ¿khitinakas aka toqet yatjjatañ munapjjaspa?, sasa.