¿Yatiyañatakejj wakichtʼatätanti?
1. Akapachan mayjtʼäwinakap uñjasajj ¿kun lurañasas wakisi?
1 Akapachajj ‘mä teatror uñtatawa [NM]’ ukanjja irnaqerinakasa ukhamarak kʼachachtʼäwipasa sapa kutiw mayjtʼi janiw wiñayatakïkiti sasaw 1 Corintios 7:31 qellqatajj qhanañchi. Ukhamajj niyakejjay akapachajj mayjtʼaskchejja, awisajj kuna toqenakats parltʼañäni, kuna horasanakas yatiyañäni ukanak mayjtʼayañas wakisirakispawa. Ukhamajj ¿uk lurañatakejj wakichtʼatätanti?
2. Jehová Diosan markapampi chika sarañatakejj ¿kunsa lurañasa?
2 Kunjamanakatsa yatiyasiski. Cristian tamajj Diosan arunakap yatiyañatakejj kunjamatsa chʼamachasipjjapunirïnwa. Amtañäni, kunapachatï Jesusajj arkirinakapar yatiyapjjañapatak khitkäna ukhajja, ‘janiw qollqsa ni bolssa apapjjätati’ sasaw säna (Mat. 10:9, 10). Ukampisa, jan waltʼäwinakan uñjasipjjañap yatisa ukat taqe cheqan yatiyasiñap yatisajj kuntï qalltan arkirinakapar siskäna ukajj mayjtʼayasjjänwa (Luc. 22:36). Jehová Diosan markapajj akapachan mayjtʼäwinakaparjamaw kunayman toqenakat yatiyapjjerïna. Sañäni, tarjetanak toqe, radio toqe ukat autonakar jachʼa parlantenakamp uskusaw yatiyapjjerïna. Jichhürunakan jaqenakarojj janiw utanakapan jikjjatañjamäjjeti, ukatwa callenakana, plazanakana ukat kawkinkkasas yatiyañasapuni. Ukhamatwa utat uta yatiyatasarojj yanaptʼarakiñäni. Ukat jurnalpach trabajipki ukanakar jikjjatañatakejj arum toqeruw yatiyasirakispa sasaw ewjjtʼasirakïna. Jehová Diosan alajjpachankir carropajj kawkirutï sarañ munki uksaruw sari. ¿Jiwasajj ukham lurañatak chʼamachasiskaraktanti? (Eze. 1:20, 21.)
3. Yatiyäwisajj jukʼamp sumäñapatakejj ¿kun lurañatakis chʼamachasiñasa?
3 ¿Kunjamsa yatiyasktan? Yatiyktan uka cheqanakan ¿kunas jaqenakarojj llakisiyi? ¿Qollqe, familia jan ukajj akapachan jan waltʼäwinakacha? Jiwasanakatï taqe ukanak sum yatiñäni ukat kunanakas akapachan pasaski ukanak sum yatirakiñänejja, jaqenakar sum yatiyañatakiw yanaptʼistani (1 Cor. 9:20-23). Ukat kunaratutï parltʼapjjestani ukhajja, janiw kuntï parltʼañatak wakichtʼatäkayätan ukak parlaskakiñasäkiti jan ukasti kunatï utanir llakisiyki uk istʼañasawa, ukhamatwa jupampejj uka toqet parltʼsna.
4. ¿Kunatsa mayjtʼäwinak katoqañatakejj jankʼakïñasa?
4 Niyakejjay akapachajj mä teatror uñtatächejja, niyaw luräwinakapajj tukusjjani ukhaw jachʼa tʼaqhesïwi urojj qalltarakini, kunattejj “jukʼa tiempokiw utj-jjestu.” (1 Cor. 7:29.) Ukhamajj Diosan arunakap yatiyañatakejj kunanakay mayjtʼayaschini ukatakejj jankʼakïñasawa. Ukhamatakwa tiempos jan ina chʼusar aptʼaskañäniti.