Profetanakat yateqasipjjañäni: Joel
1. Diosan arunakap yatiyir sarkasajj ¿kunjamatsa Joel profetan altʼat chuymanïtapat yateqassna?
1 ¿Khitïnsa Joel profetajja? Sutip apki uka libron ‘Petuel jaqen yoqapänwa’ sasaw qhanañchi (Joel 1:1). Jupajj wali altʼat chuymanïnwa, ukatwa jupan lurañanakap luraskañat sipansa, Jehová Diosan arunakap yatiyäna. Uka pachparakwa jiwasajj luraraktanjja. Wali uñtʼatäña ukat jachʼañchatäña thaqhaskañat sipansa, Jehová Diosaru ukat arunakaparu istʼapjjañapatakiw yatiyir sarkasajj chʼamachastanjja (1 Cor. 9:16; 2 Cor. 3:5). ¡Cheqas wali chʼamañchkir arunakwa yatiyasktanjja! Jichhajj Joel profetan profeciapat mä qawqha toqenakat yatjjatañäni, ukaw taqe chuyma ukat jan ajjsaras yatiyañatak yanaptʼistani.
2. Jehová Diosan urup wali jakʼankjjatap yatisajj ¿kuns lurañasa?
2 ‘Jehová Diosan urupajj jakʼankjjewa.’ (Joel 1:15.) Uka arunakan qellqasitapat walja maranakas pasjjchejja, jichhürunakanwa sumpach phoqhasini. Akapachajj urut urutjamaw jukʼamp jan walir saraski, jaqenakar yatiyir sarktan ukhajja, phiskasipjjewa ukat janiw istʼañ munapkiti. Ukanakaw qhep qhepa urunakan jakaskatas qhan uñachtʼayistu (2 Tim. 3:1-5; 2 Ped. 3:3, 4). Niyakejjay akapachan tukusïwipajj wali jakʼankjjchejja, Diosan arunakap yatiyañaw jakäwisan nayrankañapa (2 Ped. 3:11, 12).
3. Niyakejjay jachʼa tʼaqhesïwi urojj wali jakʼankchejja ¿kunatsa yatiyaskakiñasapuni?
3 ‘Jehová Diosajj markaparojj arjjataniwa.’ (Joel 3:16.) Ukat jiskʼa tʼaqajj sarakiwa “alajjpachas, akapachas khathati[ni]wa” sasa, uka arunakajj kunaratutï Jehová Diosajj jachʼa tʼaqhesïwi urun akapachar tukjkani ukhaw phoqhasini. Ukat ukhajja, Jehová Diosajj taqe chuyma Jupar servirinakaparojj arjjataniwa (Apo. 7:9, 14). Jïsa, yatiyaskakiñasawa, ukat kunjamsa Jehová Diosajj yanaptʼistu ukanakaw iyawsäwis chʼollqhëñapataki ukat jan qarjtas sarantaskakiñatak yanaptʼistani, cheqas ukanakarakiw jachʼa tʼaqhesiñ urut qhespiñatakejj yanaptʼarakistani.
4. Jutïr urunak wali kusisitaw suytanjja sasajj ¿kunatsa sistan?
4 Joel profetan arunakapajj janiw chuymachtʼir arunakäkiti sasin inas maynejj sischispa, ukampis janiw ukhamäkiti, antisas Diosan markapatakejj suma chuymachtʼäwi ukat qhespiyasiñ arunakawa (Joel 2:32). Ukhamajj jutïr urunakat jan llakisis Diosan Reinopat suma yatiyäwinak yatiyasipkakiñäni, ukat kuntï Joel 2:23 jiskʼa tʼaqan siski ukarjam sarnaqapjjapuniñäni, ukan akham siwa: “Kusisipjjam Tatitu [Jehová] Diosamana” sasa.