Profetanakat yateqasipjjañäni: Miqueas
1. ¿Kunsa Miqueas profetajj jisktʼaspachäna, ukat kunatsa yatiykäna ukajj jan inamayäkpachäna?
1 ¿Kunapachas aka jan wali pachajj tukuspachäni? Miqueas profetajj Israel markana ukat Judá markan tukjäwipat yatiykäna ukhajja, niya ukhamarakwa jisktʼaspachäna. Ukampis kuntï yatiykäna ukajj janiw inamayäkänti. Kunattejj Jehová Diosajj Samaria markataki arsuwaykäna ukjja, 740 nayrïr pacha maranwa Miqueas profetajj phoqasir uñjawayäna (Miq. 1:6, 7). Qhepatjja, Jerusalén markajj 607 nayrïr pacha maranwa tukjat uñjasirakïna (Miq. 3:12). Jehová Diosan akapach tukjañapatak suyañkamajja, ¿kunjamsa Miqueas profetat yateqassna?
2. ¿Kunatsa Diosan urup pacienciamp suytʼañasa, ukat kunsa lurañasa?
2 Paciencianïñasawa. Miqueasajj akham sänwa: “Nayajj [Jehová] Tatiturukiw suytʼä, qhespiyiri Diosajjarukiw taqe confiansajja uskusirakï, jupasti nayarojj istʼitaniwa” sasa (Miq. 7:7). Jupajj janiw jan kun lurasak suykänti, jan ukasti kuntï profetjam lurañapäkäna uk sum phoqäna. Jiwasajj ukhamarakiw Jehová Diosan urupjja, ‘Dios chuyma jupar wali katuyasita’ suyañasa (2 Ped. 3:11, 12). Ak amtapuniñäni, Jehová Diosajj paciencianïtap laykuw jaqenakar arrepentisiñapatak tiempo churaski (2 Ped. 3:9). Ukhamajj kunjamtï Bibliajj ewjjtʼkistojja, profetanakatwa paciencianïñ yateqasiñasa (Sant. 5:10).
3. ¿Kunatsa Jehová Diosarojj qollan ajayup mayiskakiñasa?
3 Jehová Diosaw yanaptʼistani. Kuna lurañtï Miqueas profetajj katoqkäna ukajj chʼamakïnwa, ukatwa jupajj Jehová Diosar yanaptʼa mayïna (Miq. 3:8). Jehová Diosajj Jupan yanaptʼap munatasjja sum yati, ukatwa Bibliajj oracionan yanaptʼap mayiñasatak chʼamañchistu. Qarjtañäni ukhajja, markapan kuna luräwinaktï katoqtan uk phoqañatakejj Jupaw yanaptʼistani (Sal. 84:5, 7; Isa. 40:28-31). Kunjamsa Jehová Diosajj Jupar yupaychkasajj yanaptʼawayistu uk taqeniw sum yattanjja. Ukhamajj qollan ajayup mayiskakiñäni (Luc. 11:13).
4. Miqueas profetan sarnaqäwipat ¿kunsa jichhürunakan yateqassna?
4 Miqueas profetatakejja, Jehová Diosan munañap lurañapuniw nayrankäna. Uka tiempon jan wali lurir jaqenakas utjkchïnjja, Jehová Diosar taqe chuyma yupaychañwa jupajj amtäna. Jichhürunakanjja, niya ukhamanwa jikjjatasiraktanjja, ukatwa Jehová ‘Diosasarupuni jaysañataki’ amtapjjañasa (Miq. 4:5).