Revistanak sapa kuti yatktan ukanakar Bibliat yatichañatak chʼamachasipjjañäni
1. ¿Kunatsa Jehová Diosan markapajj revistanak sapa phajjsi jaytañatak wal chʼamañchistu?
1 Walja jaqenakaw jiwasamp Bibliat jan yatjjatañ munapkiti, ukampis revistanakas wal liyiñ munapjje. Ukatwa Jehová Diosan markapajj sapa phajjsi revistanak jaytañasatak walja maranak chʼamañchaskistu. Ukhamatwa jaqenakajj revistanak liytʼasajj Diosan Arupat yatjjatañ munjjapjjaspa (1 Ped. 2:2). Ukat inas revistan mä aski yatichäwipajj maynin chuymapar purtʼchispa ukat Bibliat yatjjatañ munjjchispa.
2. Revistanak sapa phajjsi jaytktan ukanakan Bibliat yatjjatañ munapjjañapatakejj ¿kuns lursna?
2 Diosan Arupat parltʼapjjapuniñäni. Revistanak aleq jaytawayasin sarjjañat sipansa, jupamp parltʼañatakiw chʼamachasiñasa. Ukhamatwa kunas jupar llakisiyi, kuns amuyi, kunjamsa jikjjatasi ukanak yatsna. Ukat ukarakiw kuna toqenakatsa ukat kunjamsa jupamp parltʼsna uk amuyañatak yanaptʼistani (Pro. 16:23). Ukatakejj sum wakichtʼasiñasawa. Revistanakan mä yatichäwipwa ajlltʼañasa ukat Biblian kawkïr jiskʼa tʼaqapsa qhanstaysna uksa ajlltʼañasarakiwa. Ukhamatwa Biblian cheqa yatichäwinakapajj chuymapar jukʼat jukʼat purtʼañapatak yanaptʼañäni (1 Cor. 3:6). Ukat kuna urus visittʼawaytan, kuna qellqatanaksa jaytawaytan, kuna toqets parlawaytan ukat Biblian kawkïr jiskʼa tʼaqapatsa qhanañchtʼawaytan ukanak qellqtʼasiñ janiw armañasäkiti.
3. Revistanak sapa phajjsi jaytktan ukanakarojj ¿qawqha tiempotsa visittʼir kuttʼañasa?
3 Qawqha tiempotsa kuttʼañasa. Revistanak apañatakejja, phajjsin may kutiw kuttʼañasa. Ukampis jupanakatï Bibliat jukʼamp yatjjatañ munapjjani ukhajja, phajjsin walja kutis kuttʼaraksnawa. Inas revistanak jaytatasat mä semana jan ukajj pä semana qhepat kuttʼasin akham sissna: “Jaytawayksma uka revistan mä aski yatichäwip liytʼaskayäta, ukwa uñachtʼayañ munaskayäsma” sasa. Ukhamatwa revistan utjki uka yatichäwinakapat yatjjatañ munaspa. Ukat ‘nayajj uka yatichäwi liytʼjjtwa’ sistani ukhajja, kunsa uka yatichäwit amuyi ukwa jisktʼsna, ukat uka toqetwa mä jukʼa parltʼaraksna. Bibliat apstʼat qellqatanakas wal liyiñ munapki ukanakarojja, uka phajjsin kawkïr librompisa, folletompisa jan ukajj tratadompis yatiyasiski ukwa churaraksna.
4. Revistanak sapa phajjsi jaytktan ukanakar Bibliat yatichañ qalltañatakejj ¿kuns lursna?
4 Bibliat yatichañatakejj jiwasaw nayraqat arjjayañasa, janiw jupanakan mayipjjañap suyañasäkiti. Ukat Bibliat qalltan jan yatjjatañ munapkäna ukanakarojja, Yatiyañataki sat revistan “Biblia toqet jisktʼanaka” siski uka yatichäwitwa awisajj qhanañchtʼaraksna. Inas ukhamat uta punkupan Bibliat yatichañ qalltsna. Jan ukhamäkani ukhajja, revistanak apaskakiñasawa ukat Bibliat yatjjatañ munapjjañapatakis yanaptʼaskakiñasawa.