Janipuniw qheptʼat puriñasäkiti
1. Horasapar puriñ toqetjja, ¿kunsa Jehová Diosat yateqassna?
1 Jehová Diosajj taqe kunsa horasaparupuniw luri. Amuytʼañäni, servirinakaparojj yanapa munapki ukhapuniw yanaptʼi (Heb. 4:16). Ukat ajay toqet manqʼanaksa “horasapar[uw]” churarakistu (Mat. 24:45). Ukhamajja, colerasiñ jachʼa urupasa ‘horasaparuw purinirakini’ (Hab. 2:3). Ukham taqe kuns horasapar lurirïtapajj wal yanaptʼistu (Sal. 70:5). Pantjasirïtas layku ukat jan tiemponi sarnaqatas laykojja, horasapar kun lurañas chʼamakïspawa. ¿Kunatsa horasapar puriñataki, jan ukajj jan qheptʼat puriñataki chʼamachasiñasa?
2. Horasapar puriñajj ¿kunatsa Jehová Diosar jachʼañchi?
2 Aka qhepa urunakanjja, jaqenakajj jupanakan askipakwa thaqjjapjje, ukhamïpansti janiw horasapar sarnaqañajj utj-jjeti (2 Tim. 3:1-3). Cheqas trabajosaru tantachäwinakaru, ukat yaqha ukhamanakar horasapar purtan ukjja, jaqenakajj amuyapjjestuwa, ukat ukajj Jehová Diosaruw jachʼañchi (1 Ped. 2:12). Inas trabajosarojj horasaparu purirïstan, ukampis Diosan markapan utjki uka tantachäwinakar qheptʼatapun puriñ yatstan. Jiwasatï tantachäwinakar qʼochumpi ukat mayisïwimpi janïr qalltkipan puriñäni ukhajja, Jehová Diosat yateqasiñ munataswa uñachtʼayañäni (1 Cor. 14:33, 40).
3. Horasapar puriñajj ¿kunatsa mayninakar respetatas uñachtʼayi?
3 Horasapar sarnaqañajja, mayninakar respetataswa uñachtʼayaraki (Fili. 2:3, 4). Tantachäwinakaru, yatiyañ mistuñataki tantachäwinakar horasapar puriñäni ukhajja, jilat kullakanakarojj janiw mayjtʼaykañäniti. Maysa toqetjja, jiwasatï qheptʼat puriñar yatintatästan ukhajja, mayninakat sipansa jiwasan tiemposas jukʼamp wakiskirïkaspa ukhamwa amuyaysna. Ukhamajj horasapar purisajja, taqe kuns sum phoqerïtasa, irnaqtʼirïtasa ukat cofiykayätaswa uñachtʼayañäni, jilat kullakanakas uk wali askit uñjapjjarakini.
4. Horasapar puriñatï jiwasatak chʼamächi ukhajja, ¿kunas yanaptʼistaspa?
4 Jiwasatï kawkharus qheptʼatapuni puriñ yatstan ukhajja, kunatsa ukham qheptʼat purtan uk amuykiptʼasiñasawa. Lurañanakas horasapar phoqañatakejja, tiempos sum wakichtʼasiñasa (Ecl. 3:1; Fili. 1:10). Jehová Diosaruw yanaptʼa mayisiñasa (1 Juan 5:14). Ukhamajj horasaparu purisajja, Jehová Diosaru ukat jaqe masisar munasitaswa uñachtʼayañäni, kunattejj uka pä mandamientow taqe Leyit sipansa jukʼamp askejja (Mat. 22:37-39).