Agosto phajjsin yatiyañajj wali askipunïniwa
Oraqpachanwa mä machaq tratado lakiraskañäni
1. Diosan Reinop uttʼayasitapat patak maranak niya phoqasiñampïkipanjja, Oraqpachan ¿kunas lakirasiskani?
1 Diosan Reinop uttʼayasitapat patak maranakaw niy phoqasjjani. Ukhamajja, Jehová Diosar jachʼañchañatakejj agosto phajjsin Oraqpachanwa mä machaq tratado lakiraskañäni, pʼeqeñchäwipajj akham siwa: ¿Khitis jisktʼanakasar qhanañchaspa? sasa. Uka tratadojja, kuntï jaqenakajj jisktʼasipki uk Biblian thaqapjjañapatakiw chʼamañchtʼi, ukat kunjamsa jw.org sat cheqajj jupanakar yanaptʼaspa uksa qhanañcharakiwa.
2. Jehová Diosarojj ¿kunjamsa agosto phajjsin jukʼamp jachʼañchsna?
2 Jukʼampiw Jehová Diosar jachʼañchañäni. Jilat kullakanakan jukʼamp yatiyapjjañapatakejja, precursor auxiliarjam 30 horanak irnaqtʼañaw agosto phajjsin mayampi utjani. Uka phajjsinjja, viernesas, sabados, domingos phesqaw utji, ukhamajj trabajapki jan ukajj escuelankapki uka jilat kullakanakatjja, waljaniw precursorjam irnaqtʼapjjaspa. Bibliat yatichaskta ukanakata jan ukajj wawanakamat inas maynis yatiyañatak wakichtʼatäjjchi, ukhamächejja, jankʼakiw irpir chuymaninakat sarayki uka jilatampi parltʼañama. Uka phajjsin yatiyirjam irnaqtʼañ qalltapkani ukanakatakejj wali askïniwa. Walja precursor regularanakajja, marpachan qawqha horanaktï lurapjjañapäki uk phoqjjasajja, agosto phajjsejj samartʼapjjewa. Ukampis uka phajjsin jukʼamp yatiyañatak horariop mayjtʼayapjjaspa ukajj wali askïspawa. Familianakajja, Jehová Diosar kunjamsa jukʼamp jachʼañchañatakejj ‘artʼapjjani’ mä arunjja, yatiyapjjani uk jichjatpachwa parlakiptʼasipjjaspa (Esd. 3:11; Pro. 15:22).
3. Agosto phajjsin ¿kuna askinak utjañapsa suytanjja?
3 Pasïr maranakan ukhamarakiw wal irnaqtʼawaytanjja, ukampis agosto phajjsin ukat sipans jukʼamp irnaqtʼsna ukajj wali askïspawa. Ukat walja horanaka, machaq yatiyirinaka, precursor auxiliaranakas jukʼamp jiljjattaspa ukajj askipunïspawa. Aka mara tukuya agosto (año de servicio 2014) phajjsin Oraqpachan taqe chuyma irnaqtʼañatak chʼamachasitasjja, ¡Jehová Diosajj bendicistaniwa! (Mat. 24:14).