Profetanakat yateqasipjjañäni: Sofonías
1. ¿Kunjam tiemponsa Sofoniasajj profetäna, ukat kunatsa jiwasatakejj wali yateqaskaya?
1 Niya 700 nayrïr pacha maranakanjja, Judá markanjj Baal sat diosarukiw yupaychjjapjjäna. Jan walinak luriri Amón reyirojj jiwayapjjänwa, ukat Josías waynaw reyjam uttʼayatäjjäna (2 Cró. 33:21–34:1). Uka tiemponwa Jehová Diosajj juchañchäwi arunak yatiyañapatak Sofonías profetar ajllïna. Inas Sofoniasajj Judá marka reyinakan familiapat jutchïna, ukampis Diosan arunakapjja, jan ajjsartʼasaw uka marka pʼeqtʼirinakar yatiyäna (Sof. 1:1; 3:1-4). Jiwasajj jupjamarakiw jan ajjsarañatak chʼamachastanjja, Diosar serviñanjja, janiw familiaranakasan jan wali luräwinakapamp apayasktanti (Mat. 10:34-37). ¿Kunsa Sofoniasajj yatiyäna, ukat kunanaksa jikjjatäna?
2. ‘Jehová Diosan jachʼa colerasiñ’ urupat jarkʼaqatäñatakejj ¿kunanaksa lurañasa?
2 “Diosaruy thaqtapjjam.” Jehová Diosakiw Jupan jachʼa colerasiñ urupat jaqenakar qhespiyaspa. Ukatwa Sofonías profetajj Judá markankirinakarojj tiempo utjkipan Jehová Diosaru ukat kunatï cheqäki, llampʼu chuymamp sarnaqañäki uk thaqapjjañapatak chʼamañchäna (Sof. 2:2, 3). Jichhürunakanjja, Sofonías profetjamarakiw Diosar thaqapjjañapatak jaqenakar chʼamañchtanjja, jiwasas ukhamarakiw thaqañasa ukat Jehová Diosat jan jitheqtas serviñatakiw amtañasa (Sof. 1:6). Biblia wali amuyump liyisa ukat yanaptʼap mayisaw Jehová Diosar thaqtanjja. Qʼañu lurañanakan jan sarnaqasaw kunatï cheqäki uk thaqtanjja. Jehová Diosan markapar taqe chuyma istʼasaw llampʼu chuymanïñ thaqaraktanjja.
3. ¿Kunatsa Diosan arunakap yatiyañatak chʼamachasiskakiñasa?
3 Kuna askinakas utjawayi. Sofonías profetan yatiyäwinakapajj Judá markan yaqhepanakarojj yanaptʼawayänwa, jukʼampis Josías waynaruw yanaptʼäna, jupajj waynitutpachwa Jehová Diosar thaqäna. Qhepatjja, Judá markan taqe jan walinak tukjañatakiw chʼamachasïna (2 Cró. 34:2-5). Jichhürunakanjja, Reino toqet suma yatiyäwinakajj thakiwjaru, qalawjaru, chʼaphi taypiru ukat suma laqʼawjaruw puri. Suma laqʼar purki ukajj achoqewa (Mat. 13:18-23). Jehová Diosajj Reino toqet suma yatiyäwinak yatiyañatak chʼamachasitasjja bendicipuniniwa (Sal. 126:6).
4. ¿Kunatsa Jehová Diosar ‘suytʼaskakiñasa’?
4 Jehová Diosajj janiw arsutaparojj phoqkaniti sasaw Judá markan yaqhepajj amuyapjjäna. Ukampis Jehová Diosajj ‘jachʼa urujajj jakʼankiwa’ sasaw jupanakar säna (Sof. 1:12, 14). Jupar imantasipkaspäna ukanakakiw qhespiyasipjjaspäna (Sof. 3:12, 17). Ukhamajja, Jehová Diosar ‘suytʼasa’ Jupar kusisita serviskakiñäni jilat kullakanakasamp chika (Sof. 3:8, 9).