¿Kunjamsa Jehová Diosajj uñjpachïstu?
1. Bibliajj mä espejoru uñtasitaw sasajja, ¿kunatsa sissna?
1 ¿Qawqha kutis espejot uñkatasirïta? Niya taqeniw sapüru uñkatastanjja, ukaw sum askichtʼasiñatak yanaptʼistu. Bibliajj mä espejompi sasiwa. Liyisajja, kunjam jaqëtansa, kunjamsa Jehová Diosajj uñjistu uk amuyañatakiw yanaptʼistu (1 Sam. 16:7; Sant. 1:22-24). Diosan Arupajja, “lupʼïwinaksa, chuyman amtäwinakapsa qhanstayarakiwa” (Heb. 4:12). Biblia sapüru liyiñasa ukat ukanakat lupʼiñasa, Diosan arunakap jukʼamp sum yatiyañatakiw yanaptʼistaspa. ¿Kunatsa ukham sistanjja? (Sal. 1:1-3.)
2. ¿Kunjamatsa Bibliajj sum uñakiptʼasiñatak yanaptʼistaspa?
2 Bibliajj espejosäkaspas ukhamäñapawa. Jehová Diosajj kunjam jaqeñassa muni uk sum amuyañatakejja, Jupar jan jitheqtas servirinakapat Biblian qellqatäki uka sarnaqäwinakaw yanaptʼistani. Amuytʼañataki, David reyejj Diosan sutipjja walpun jachʼañchäna (1 Sam. 17:45, 46). Isaías profetajj kawkhantï yatiyañajj chʼamäki ukhanakan yatiyañatakejj jankʼakïnwa (Isa. 6:8, 9). Awkipar munasitap laykuw Jesusajj Diosan arunakap yatiykasajj wali chʼamañchtʼatäna ukat kusisitäna, janiw chʼamäkaspas ukham uñjkänti (Juan 4:34). Nayrïr cristianonakajj Jehová Diosar confiyasa ukat jan aynachtʼasaw taqe chuyma yatiyapjjerïna (Hech. 5:41, 42; 2 Cor. 4:1; 2 Tim. 4:17). Ukanakat lupʼiñaw kunjamäsktansa uk sum uñakiptʼasiñatak yanaptʼistani, ukhamat Jehová Diosar jukʼamp sum serviskakiñataki.
3. ¿Kunatsa jankʼaki jan walinak jaytjjañasa?
3 Jan walinakjja jaytjjañasawa. Espejot uñkatasis kuna jan walsa uñjassna ukat janirak sumaptayañatak kuns lurksnati ukhajja, espejot uñkatasitasajj inamayakïspawa. Sum uñakiptʼasiñatakis ukat jan walinak jaytjjañatakis Jehová Diosaruw yanaptʼa mayiñasa (Sal. 139:23, 24; Luc. 11:13). Akapachajj niya tukusiñampiwa, ukhamajja, jankʼakiw kunatï askïki uk lurañatak chʼamachasiñasa (1 Cor. 7:29; 1 Tim. 4:16).
4. Maynitï Diosan Aruparjam sum uñakiptʼasisin jan wali luräwinakap apanukjje ukajja, ¿kunjamasa?
4 Kunjam isthaptʼatäktantï ukat sipansa Jehová Diosatakejj chuymasaw jukʼamp wakiskirejja (1 Ped. 3:3, 4). Ukat maynitï Diosan Aruparjam sum uñakiptʼasisin jan wali luräwinakap apanukjje ukajja, ¿kunjamasa? ‘Jupajj janiw armtʼaskiti kuntejj istʼki ukjja, jan ukasti ukarjamaw sum sarnaqe, phoqaraki, ukat kusisitarakiwa’ (Sant. 1:25). Ukham lurasajja, wali kusisitäpjjañäniwa ukat “mä espejor uñtatjamaw Tatitun jachʼa kankañapatjja kʼajta[pjjañäni]” (2 Cor. 3:18).