Jukʼamp sum yatiyañataki: yateqerinakasar yanaptʼañäni

Kunatsa uk lurañajj wakisi. Jesusan machaq arkirinakapajja, ‘taqe kuntï’ Jesusajj yatichkäna ukanak phoqañatakiw chʼamachasipjjañapa. Ukanakat mayajj akawa, yaqhanakar Bibliat yatichaña (Mat. 28:19, 20). Waljaniw Diosan Arupat Yatiyañataki Escuelar mantañatak mayitanaka phoqapjje, ukat inas jupanakajj familiaranakaparusa, amigonakaparus Diosat parlapjjarakchi. Inas kuntï yateqapki ukanakar jukʼamp munasjjapjjchi, ukhamaraki Jehová Diosajj taqe jaqenakar suma yatiyäwinakajj yatiyasispa uk munatapsa amuyjjapjjarakchi, ukatwa jiwasampi chika yatiyir mistuñ amtapjjaspa (Rom. 10:13, 14). Yateqerisatï Diosan arunakap yatiyir mistuñataki mayitanak phoqani ukhajja, jupanakar sum wakichtʼañaw wakisini, ukaw jan ajjsaras yatiyañataki yanaptʼani (Luc. 6:40).

Kunjamsa uk lursna:

Bibliat apstʼat kawkïr qellqatanakas yatiyañatakisa, jaqenakar yatichañatakisa munasi ukanak apsuñapatakiw machaq yatiyirir yanaptʼañama. Kunjamsa maletinamarusa, jan ukajj bolsamarusa qellqatanak uchta uk uñachtʼayam, ukatjja sapa qellqatajj kunatak wakichtʼatasa uksa yatichtʼarakim.
Diosan Apnaqäwipat Yatiyañataki sat qellqatan yatiyañatak yanaptʼanaka utjki ukanakat maya ajllisma, ukatjja ukarjamaw jupampi yatsupjjañama. Ukjjarusti, pachpa arunakapampi arstʼañapatakiw chʼamañchtʼañamaraki. Benefíciese sat libron 82 janapan kunjam yatiyañas territoriosan jilapart utji ukarjam yatiyañatakiw yatsupjjañama. Ukhamarak kunatsa cristianjam isthaptʼasiñajj wali wakiskiri uksa sum qhanañchtʼarakim (2 Cor. 6:3, 4).
Territorion mapanakapsa uñachtʼayañamarakiwa, ukatjja Registro de casa en casa satäkis uka formularior kunjams phoqantaspa uksa yatichtʼañamarakiwa. Kunjamsa Internetan jw.org sat cheqampisa, Buenas nuevas para gente de todas las naciones sat folletompis jaqenakar yatiysna uksa yatichañamarakiwa. Bibliat yateqañ munirinakar yanaptʼapjjañapatakiw yateqerimar chʼamañchtʼañama (1 Cor. 3:6).
Pacienciampiw yatichtʼañama, walik ukham lurta sasinsa chʼamañchtʼañamarakiwa (Pro. 25:11). Jupanakatakejj yateqaskayaw sarnaqañama. Diosar taqe chuym servitamasa, jupat llakisitamas yateqerimar walpun yanaptʼani.

Aka phajjsejj ak lurañatak chʼamachasiñäni:

Yateqerisampi utat uta yatiyir sarañatakiw chʼamachasiñasa. Revisitasaru, jan ukajj Bibliat yatichiris jupanakampi sarañatak chʼamachasiñäni. Jumantï Bibliat yateqerimajj jan utjkchejja, jichhaki yatiyir mistusipki ukanakampi yatiyir mistuñatak chʼamachasim.