Grabacionanakajj ¿kunjamsa yanaptʼistaspa?
1. Internetan jw.org cheqanjja, ¿kuna yanaptʼas utjarakistu?
1 Internetan jw.org sat cheqanjja, waljaniw chuymar purtʼkir suma arunaka ukat cheqa yatichäwinak liytʼapjje (Ecl. 12:10). Cheqas Bibliat apstʼat qellqatanakajj waljaw uka cheqan utji, ukampis istʼañatak grabacionanakas utjarakiwa. ¿Jumajj Bibliat apstʼat grabacionanak istʼjjtati? ¿Kunjamsa ukajj yanaptʼistaspa?
2. ¿Kunjamsa Bibliat apstʼat grabacionanakajj yanaptʼistaspa?
2 Familjama ukat sapak yatjjatañataki. Kawki cheqar sarkasasa jan ukajj utan kunanak lurkasasa, Biblia, revistanaka jan ukajj Bibliat apstʼat yaqha qellqatanakwa istʼaraksna, ukhamtï lurañäni ukhajja, tiempos janiw ina chʼusar aptʼaskañäniti (Efe. 5:15, 16). Yaqhasti, familjam Bibliat yatjjatkasaw Bibliat apstʼat grabacionanak istʼaraksna, ukampis kuna qellqattï istʼkañäni ukjja, qellqatasampiw arktañasa. Bibliat sapak yatjjatkasajj grabacionanak istʼaraksnawa, ukajj sum liyiñataki jan ukajj yaqha aru yateqäskstan ukhas yanaptʼarakistaspawa.
3. Yatiyktan uka cheqanakanjja, ¿khitinakarus grabacionanakajj yanaptʼaspa?
3 Yatiyir sarañataki. Yatiyktan uka cheqanakanjja, jaqenakajj janis liyiñatak tiemponïpkaspa ukham amuyasipjje, ukampis grabacionanak inas istʼañ munapjjchispa. Yaqhepanakajj yaqha arwa parlapjje, ukhamajj ‘pachpa arupat’ istʼaysna ukhajja, inas Diosan Reinopat yatiñ munapjjchispa (Hech. 2:6-8). Yaqhep cheqanakanjja, istʼañ wali askit uñjapjje. Sañäni, hmong markan costumbrenakaparjamajja, awk taykanakajj wawanakaparuw costumbrenakapat parlapjjañapa, ukhamat wawanakapan jan armapjjañapataki. África uksa cheqanakanjja, sarnaqäwinakat istʼasaw jaqenakajj wali sum yateqapjje.
4. Grabacionanakampi janïr yatiykasajja, ¿kunanaksa nayraqat jisktʼasiñasa?
4 Yatiyktan uka cheqanakanjja, ¿janit jaqenakar pachpa arupat grabacionanak istʼayañajj wakiskaspa? Mä yatichäwitï maynir wal yanaptʼirjamächi ukhajja, ¿janit Internet toqejj grabación aptʼayksna? Bibliat yateqañ munirinakatakejja, ¿janit grabacionanak mä CD ukar apaqtʼas Bibliat apstʼat qellqatanakampi chik jaytksna? Kuna grabacionanaktï (libro, folleto, revista jan ukajj tratado) jaytkañäni ukanakjja, informe papelaruw qellqantjjañasa, ukampis phoqatpacha jaytstan ukhaw qellqantjjañasa. Grabacionanakajj janiw Bibliat sapak yatjjatañatakikïkiti, jan ukasti jaqenakan Bibliat yatjjatañ munapjjañapatakis yanaptʼarakistaspa (1 Cor. 3:6).