Profetanakat yateqasipjjañäni: Habacuc
1. ¿Kunatsa Habacuc profetjam jikjjatastanjja?
1 Akapachanjja, sapürutjamaw kunayman jan waltʼäwinakajj jiljjattaski, ukanak uñjasajj Habacuc profetjamarakiw jikjjatastanjja, jupajj ‘kunatsa uka jan walinak utjayaskakta’ sasaw Jehová Diosar säna (Hab. 1:3; 2 Tim. 3:1, 13). Kuntï Habacuc profetajj siskäna ukat kunjamsa jupajj Diosar jan jitheqtas serviskakïna, ukaw Diosan urup puriniñapkam jan waltʼäwinak aguantaskakiñatak yanaptʼistaspa (2 Ped. 3:7).
2. Habacuc profetat yateqasisajj ¿kunjamsa Diosar jan jitheqtas loqtaraksna?
2 Diosat jan jitheqtapjjañäniti. Habacuc profetajj jan walinak taypinsa jakchïnjja, janiw aynachtʼkänti, Diosarojj jan jitheqtas loqtaskakïnwa (Hab. 2:1). Arunakajajj phoqasipuniniwa Nayar iyawsapkitu uka jaqenakas jakasipkakiniwa sasaw Jehová Diosajj Habacuc profetar säna (Hab. 2:2-4). Jichha tiempon jakir cristianonakatakejj ¿kamsañsa uka arunakajj muni? Akapachan tukusiñapajj kuna urus purinini uk yatiñat sipansa, uka urojj purinipuniniwa sasin confiyañaw jukʼamp askejja. Cheqas iyawsäwisaw jan ikjañatakisa, Diosan arunakap yatiyañatakis chʼamañchistu (Heb. 10:38, 39).
3. ¿Kunatsa Jehová Diosar kusisit chuymampi loqtaskakiñasa?
3 Kusisit chuymampi Jehová Diosar loqtapjjañäni. Kunapachatï Magog markankiri Gog sat uñisirejj Diosan markap contra saytʼani ukhajja, iyawsäwisajj yantʼataw uñjasini (Eze. 38:2, 10-12). Mä guerranjja, atipjiris jan atipjiris taqeniw jan waltʼäwin uñjasipjje. Yänakapwa aptʼasipjje, manqʼañas pistʼjjewa ukat jakañas wali chʼamäjjarakiwa. Ukhaman uñjassna ukhajja, ¿kun lurañas wakisispa? Habacuc profetajj jan walinak utjañap yatkchïnsa, Jehová Diosar kusisit chuymampi loqtañwa amtäna (Hab. 3:16-19). Jiwasarojj ‘Jehová Diosan kusisiñapaw’ yantʼanak aguantaskakiñatak yanaptʼarakistani (Neh. 8:10; Heb. 12:2).
4. Jichhürunsa ukat jutïrinsa ¿kunsa luraskakiñäni?
4 Jehová Diosajj juicio urupan jarkʼaqkani ukanakarojj yatichaskakiniwa (Hab. 2:14). Jaktanipkani ukanakasa Jehová Diosat yateqapjjarakiniwa. Ukhamajja, jan qarjtasa Diosan muspharkañ luratanakapat kawkhansa yatiyaskakiñäni (Sal. 34:1; 71:17).