Invitktan ukanakar sum katoqtʼapjjañäni

Marzo phajjsit 23 urunak saraqatarojj mä 12 waranq waranqanaka Jesusan jiwäwip amtañataki jutapjjaspa ukwa suytʼasktanjja. Ukanjja, Jehová Diosajj kunsa jaqenakar qhespiyañatak lurawayi ukat kunjamsa askinak jikjjatsna uka toqetwa arstʼir jilatajj qhanañchtʼaskani (Isa 11:6-9; 35:5, 6; 65:21-23; Jn 3:16). Ukampis uka urojja, janiw arstʼir jilatakejj sum katoqtʼkaniti. Jan ukasti jiwasanakaw taqe jutirinakarojj sum katoqtʼapjjañasa (Ro 15:7). Uka toqet mä qawqha ewjjtʼanak uñjañäni.

• Tantachäwi qalltañap aleqaki suyañat sipansa, khitinakarutï invitktan ukanakarusa, jan yatiyir mistjjapjje ukanakarus sum katoqtʼañasa. Jupanakarojj wali kusisita, munasiñampiw katoqtʼapjjañasa.

• Khitinakarutï invitktan ukanakarojj sum uñjañasa, ukhamarak yaqhanakarus yanaptʼañasarakiwa. Ukat jiwasamp chika qontʼasiñapatakiw jawstʼsna, Bibliassa qʼochuñ librossa maytʼaraksnawa.

• Tantachäwi tukuyarojja, inas kuna jisktʼapas utjchi uk jisktʼaraksna. Tamasatï jankʼaki mistjjañapächi ukhamat yaqha taman tantachasiñapataki ukhajja, yaqha uru visittʼañatakiw jupampi amtawaysna. Inas akham sissna: “Tantachäwejj jumatak kunjamakïnsa uk yatiñ munirista. ¿Kunjamatsa wasitampi parltʼsna?” sasa.