Congregacionat jitheqtatäpki ukanakar yanaptʼapjjañäni

Abril 11, martes urojj congregacionat jitheqtatäpki ukanakat waljaniw Jesusan jiwatap amtañatakejj jutapjjani. Jupanakajj wiñay jakañaru apir thakinjamsa tʼijupkchïnjja, kunaymaninakan uñjasisaw jitheqtawayjjapjje, kunjamtï Jehová Diosajj kuttʼaniñamwa muni sat folletojj siski ukhama (Heb 12:1). Ukampis Diosajj jupanakar munasiskakiwa, cheqansa Jupaw Yoqapan wilapampejj jupanakar alasiwayi (Hch 20:28, NM; 1Pe 1:18, 19). Ukhamajj ¿kunjamatsa congregacionar kuttʼanipjjañapatak yanaptʼsna?

Kunjamtï mä ovej awatirejj chhaqat ovejanakapar jankʼak thaqtkejja, ukhamarakiw jilïr irpirinakajj congregacionat jitheqtat jilat kullakanakar thaqtapjje, yanaptʼañatakis wal chʼamachasipjje (Lu 15:4-7). Ukhamatwa Jehová Diosajj kunja munasirisa uk amuytanjja (Jer 23:3, 4). Ukampis janiw jilïr irpirinakakejj congregacionat jitheqtat jilat kullakanakar yanaptʼapkaspati, taqeniw yanaptʼsna. Jiwasatï jupanakar munasiñamp yanaptʼañäni ukhajja, Jehová Diosaruw kʼuchisiyañäni, janirakiw inamayäkanisa (Pr 19:17; Hch 20:35). Ukhamasti, khitirus yanaptʼasma uk amuykiptʼas jankʼak yanaptʼañatak chʼamachasim.

CONGREGACIONAT JITHEQTATÄPKI UKANAKAR YANAPTʼAÑÄNI SAT VIDEO UÑTASAJJA, AKA JISKTʼANAKARUW QHANAÑCHTʼAPJJÄTA:

• Congregacionat jitheqtat mä kullakar uñtʼasajja, ¿kunsa Abigail kullakajj luräna?

• Congregacionat jitheqtatäpki ukanakar janïr yanaptʼkasajja, ¿kunatsa jilïr irpirinakamp parltʼañasajj wakisispa?

• Lauran ukar wasitat sarañatakejja, ¿kunjamsa Abigail kullakajj wakichtʼasïna?

• ¿Kunjamanakatsa Abigail kullakajj pacienciampi ukat munasiñamp Laura kullakar yanaptʼäna?

• Lucas 15:8-10 qellqatan Jesusajj parlkäna uka uñachtʼäwejja, ¿kunsa yatichistu?

• Laura kullakar taqeni yanaptʼapjjatapatjja, ¿kuna bendicionanakas utjäna?