Pascuajja, janiw kunjamsa Jesusan jiwatapajj amtasiñapäna uk uñachtʼaykänti. Ukampis kunatï ukan luraskäna ukanakat wal yateqsna. Apóstol Pablojja, “Cristow sacrificiotjja jakañap loqtasïna, ukhamatwa jiwasan Pascua corderosar tukuwayi” sasaw säna (1Co 5:7). Corderon wilapa uta punkun marconakapar uchapkäna ukajja, israelita wawanakan jan jiwapjjañapatakiw yanaptʼäna. Jesusajj wilapajj ukhamarakiw jakaskakiñatak yanaptʼistu (Éx 12:12, 13). Pascuan manqʼaskäna uka corderorojja, janiw chʼakhanakap pʼakirapjjañapäkänti. Chʼakkatat jiwapkäna uka jaqenakan kayunakap pʼakirapkchïnsa, janiw Jesusan ni mä chʼakhapsa pʼakirapkänti (Éx 12:46; Jn 19:31-33, 36).