“Diosaruw Pablojj yuspäräna, chʼamañchtʼatarakïnwa”

Roma markankir jilat kullakanakajj Pablon jutaskatap yatisajja, yaqhepajj 64 kilometronakwa jupamp jikisiñatak sarapjjäna. ¿Ukham lurapjjatapajj Pablotakejj kunjamakïnsa? Jupanakar uñjasajj ‘Diosaruw yuspäräna, chʼamañchtʼatarakïnwa’ (Hch 28:15). Cheqas Pablow congregacionanakar chʼamañchtʼirïna. Ukampis jichha kutinjja, carcelankatap laykojj jupaw chʼamañchtʼatäñ munäna (2Co 13:10).

Jichhürunakanjja, congregacionanak tumptʼir jilatanakajj jilat kullakanakar chʼamañchtʼañatakiw congregacionanakar visittʼapjje. Awisajj jiwasjamarakiw qarita, llakita, aynachtʼata uñjasipjje. Congregacionasar visittʼapkistani ukhajja, ¿kunsa jupanakar chʼamañchtʼañatakisa ‘purapat chʼamañchtʼasiñatakis’ lursna? (Ro 1:11, 12).

• 

  Predikir mistuñatak tantachäwejj utjki ukar yanaptʼaña. Congregacionanak tumptʼirejj visitkistu uka semanan yatiyir mistuñatak chʼamachasitasajja, jupar wal chʼamañchtʼi (1Te 1:2, 3; 2:20). Uka phajjsin precursor auxiliarat serviñatakiw chʼamachassna. ¿Congregacionanak tumptʼir jilatampi jan ukajj esposapamp predicañatakisa, Bibliat yatichktan ukanakar jupanakamp sarañatakis janit chʼamachasksna? “Jichhakiw yatiyir mistuskta, janiw sum predicañ yatkti” sasin janiw amuyañasäkiti. Jupanakajj taqenimpiw mistuñ munapjje.

• 

  Wajjtʼasirïña katoqtʼasirïña. ¿Janit utasar manqtʼasiñataki jan ukajj alojtʼañatak invitʼksna? Ukham lurasajj jupanakar munasitaswa uñachtʼayañäni. Jupanakajj janiw wali suma uñjatäñpun munapkiti (Lu 10:38-42).

• 

  Ewjjtʼanakap istʼaña ukat ukarjam sarnaqaña. Congregacionanak tumptʼir jilatajja, Jehová Diosar sum serviñatakiw munasiñamp yanaptʼistu. Awisajj inas qhana arunakampi ewjjtʼchistani (1Co 5:1-5). Jiwasatï jupar istʼañäni ukhajja, kusisitaw luräwinakap phoqani (Heb 13:17).

• 

  Munasiñ uñachtʼayaña. Congregacionanak tumptʼir jilatampina esposapampin chʼamachasitapajj qhawqsa yanaptʼawayistu ukanakat jupanakar yuspärañasawa. Jiwas pachpaw yuspärsna jan ukajj mä tarjeta toqew yuspärsna (Col 3:15).