Jehová Diosajj oración toqe yanaptʼkistu uk katoqasipjjañäni

Jehová Diosaw mä jaqen chuymapar cheqa yatichäwinakan jathanakap saphintayaspa jiltayarakispa (1Co 3:6-9). Ukatwa yateqerisan nayrar sartañap munstan ukhajja, “Diosaw nayarusa yateqerijarus yanaptʼasipkitani” sasin confiyañasa.

Qhana arunakampiw Diosar mayisiñama. Yantʼanakar saykatañapatakisa, jan walinakar atipjañapatakisa yateqerinakamatak orarapim (Flp 1:9, 10). Kunanaktï jumajj pienskta lurkarakta ukanakatakis espíritu santo mayisirakim (Lu 11:13). Kunjamsa orapjjañapa uk yateqerinakamar yaticham, orasipjjañapatakis chʼamañchtʼarakim. Jupanakamp chika oración luram, ­sutinakapsa oracionan aytarakim.

JESUSAN DISCIPULOPAR TUKUYAÑAJJ KUSISKAÑAWA. JEHOVÁ DIOSAN YANAPTʼAP KATOQAPJJAÑÄNI: ORACIÓN SAT VIDEO UÑTASAJJA, AKA JISKTʼANAKARUW QHANAÑCHTʼÄTA:

• Rositampi Bibliat yateqaskäna ukhajja ¿kuna jan walirus Ritajj saykatañapäna?

• ¿Kunjamsa 1 Corintios 3:6 textojj Ritar yanaptʼäna?

• ¿Kunjamsa uka jan walejj askichasïna?