Taqe jan waltʼäwinakajj tukusirikiwa

Jan walinakan uñjasisajj facilakwa aynachtʼsna, jukʼampis walja tiempo ukhaman uñjassna ukhaw aynachtʼsna. Davidajj Saúl chachampi jan waltʼayaskäna ukajj janiw wiñayatakïñapäkänti, Jehová Diosan arsutaparjamajj reyëjjañapänwa, ukwa jupajj yatïna (1Sa 16:13). Diosar confiyañaw Davidarojj paciencianïñataki, Jehová Diosaw taqe kuns askichani sasin suytʼañatak yanaptʼäna.

Jan waltʼäwinakan uñjasktan ukhajja yatiñampi, sum amuytʼasisa kuns lurañaw uk askichañatak yanaptʼistaspa (1Sa 21:12-14; Pr 1:4). Ukampis yaqhep jan walinakajja, wal chʼamachaskasasa, Biblian wiñay yatichäwinakaparjam lurkasas janiw chhaqtkiti. Ukhamanakan uñjasisajja, paciencianïñasawa, Jehová Diosan askichañapwa suytʼañasaraki. Niyaw Jehová Diosajj taqe kunanakatï tʼaqesiykistu ukanak tukjani, ukatjja ‘taqe jachanakaswa nayranakasat pichararakini’ (Ap 21:4). Inas jan waltʼäwinakajj Jehová Diosan yanaptʼapampi jan ukajj yaqhanak pasatapat tukuschispa, ukampis akwa amtañasa: taqe jan waltʼäwinakajj tukusirikiwa. Uk yatiñajj wal chuymachtʼistu.

AKAPACHAN TʼAQA TʼAQA SARNAQER JAQENAK TAYPINJJA, DIOSAN MARKAPAJJ MAYACHTʼATAWA SAT VIDEO UÑTASAJJA, AKA JISKTʼANAKARUW QHANAÑCHTʼÄTA:

• ¿Sur de Estados Unidos cheqanjja Jehová Diosan Testigonakapajj kuna jan walinakansa uñjasipjjäna?

• ¿Kunanak lurasas paciencianïpjjatapa munasirïpjjatap uñachtʼayapjjäna?

• ¿Kunas jilat kullakanakatakejj jukʼamp wakiskirïna? (Flp 1:10).