17 YATICHÄWI
‘Amigonaka sasaw jumanakar sapjjsma’
“Nayajj taqe kunanaktï Awkijat istʼkta ukanakwa jumanakar yatiyapjjsma, ukatwa amigonaka sasin jumanakar sapjjsma” (JUAN 15:15).
CANCIÓN 13 Cristot yateqasipjjañäni
¿KUNANAKATSA YATJJATASKAÑÄNI?a
1. ¿Maynin suma amigopäñatakejj kunsa lurañasa?
MAYNIN suma amigopäñ munstan ukhajja, kunsa pienstan, kunjamäsktansa, kunanaksa lurtan ukanakatwa parltʼasipjjañasa. Ukampis Jesusan suma amigopäñajj chʼamäkaspas ukhamäspawa. Kunatsa chʼamäkaspas ukhamäspa uk uñjañäni.
2. Mayïr toqetjja ¿kunatsa Jesusan amigopäñajj chʼamäkaspas ukham amuysna?
2 Maya, janiw Jesusar uñjktanti, ukatwa amigopäñajj chʼamäkaspas ukham amuysna. Apostolonakajj jakapkäna uka tiempon jakiri yaqhep cristianonakajj janirakiw Jesusar uñjapkänti. Ukhamäkchïnsa apóstol Pedrojj akham sänwa: “Cristorojj janis kunapachas uñjapkstajja, jupar munasipjjtawa. Janis jichhajj uñjapkstajja, juparuw confiyapjjtajja” sasa (1 Ped. 1:8). Ukhamasti Jesusan amigopäñatakejj janiw jupar uñjañapunejj wakiskiti.
3. Payïr toqetjja, ¿kunatsa Jesusan amigopäñajj chʼamäkaspas ukham amuysna?
3 Paya, janiw Jesusampi parlksnati, ukatwa amigopäñajj chʼamäkaspas ukham amuyaraksna. Orasktan ukhajja Jehová Diosaruw orastanjja. Jesusan sutipjjarus oraskstanjja, janiw Jesusar orasktanti. Niyakejjay oracionajj Jehová Diosar adorañampi sasïchejja Juparukiw orasiñasa, ukatwa Jesusajj jupar orasiñas jan munkiti (Mat. 4:10). Ukhamäkchisa Jesusan amigopäsnawa.
4. 1) Kimsïr toqetjja, ¿kunatsa Jesusan amigopäñajj chʼamäkaspas ukham amuyaraksna? 2) ¿Kunanakatsa aka yatichäwin yatjjataskañäni?
4 Kimsa, Jesusajj alajjpachanwa jaki, ukatwa jupamp jan jikisksnati. Janis Jesusamp jikiskstanjja, kunjam chuymanisa uk yatsnawa. Aka yatichäwinjja, Jesusan suma amigopäñatakejj kunanaksa lursna ukwa pusi toqet yatjjataskañäni. Ukampis kunatsa Criston suma amigopäñajj wali wakiskiri ukwa nayraqat yatjjatañäni.
¿KUNATSA JESUSAN AMIGOPÄÑAJJ WALI WAKISKIREJJA?
5. ¿Kunatsa Jesusan amigopäñasa? (“Jesusan amigopäñajj Jehová Diosan amigopäñatakiw yanaptʼistu”, “Jesusarojj kunjamäkiti ukham uñjañäni” sat recuadronak uñjjattʼäta).
5 Jehová Diosan amigopäñatakejja, Jesusan amigopäñasawa. ¿Kunatsa ukham sistanjja? Uk pä toqet yatjjatañäni. Maya, Jesusajj discipulonakapar akham sänwa: ‘Nayar munasipjjesta ukatwa alajjpachankir Awkejj jumanakar munasipjjtamjja’ sasa (Juan 16:27). Ukatsti akham sarakïnwa: “Naya taypikiw Awkin ukar puriñajj utji” sasa (Juan 14:6). Jesusan jan suma amigopäkasin Jehová Diosan amigopäñ munañajja, punknam jan pasas mä utar mantañ munañampi sasiwa. Jesusajja, uka toqet akham sarakïnwa: “Ovejanakajj mantapki uka punkojj nayätwa” sasa (Juan 10:7). Paya, Awkipajj kunjam chuymanisa uk wali qhanwa Jesusajj uñachtʼayäna. Ukatwa discipulonakapar akham säna: “Khititejj nayar uñjkitu ukajj Awkirojj uñjarakiwa” sasa (Juan 14:9). ¿Kunanak lurasas Diosar uñtʼaraksna? Jesusar uñtʼasaw Jehová Diosar uñtʼaraksna. Jesusat jukʼamp yateqasajja jukʼampiw jupar munasiñäni. Jesusar jukʼamp munasiñäni ukhajja, jukʼampirakiw Awkipar munasiñäni.
6. ¿Kunatsa Jesusan amigopäñasaraki?
6 Diosajj oracionas istʼañapatakejja, Jesusan amigopäñasawa. Ukampis janiw mä oración tukuyasajj “Jesusan sutipjjaruw mayissma” sasin aleq ukhamak tukuyañasäkiti. Jan ukasti, Jehová Diosajj kunjamsa Jesús taypejj oracionanakas istʼistu ukwa amuyañasa. Jesusajj apostolonakapar akham sänwa: “Kunanaktï sutij-jjar mayipkäta ukanakwa nayajj lurarakëjja” sasa (Juan 14:13). Jehová Diosaw oracionas istʼasajj kuntï mayktan uk churistu, ukampis kuntï jupajj amtki uk lurañatakejj Jesús Yoqaparuw chʼam churi (Mat. 28:18). Ukhamajj janïr oracionasar jayskasajja, Jesusan ewjjtʼapar istʼasktanti janicha ukwa nayraqat uñji. Mä kutejja Jesusajj akham sänwa: “Jumanakatejj jaqenakan juchanakap perdonapjjäta ukhajja, alajjpachankir Awkimajj perdonapjjarakïtamwa; jumanakatejj jaqenakan juchanakap jan perdonapkäta ukhajja, janirakiw alajjpachankir Awkimajj juchanakam perdonapkätamti” sasa (Mat. 6:14, 15). Jehová Diosasa Jesusasa suma chuymampiw uñjapjjestu, mayninakar uka kikpa uñjañajj wali wakiskiriwa.
7. ¿Jesusan jiwatapat kuna bendicionanakatï utjki uk katoqañatakejj kunsa lurañasa?
7 Jesusan suma amigonakapakiw jiwatapat kuna bendicionanakatï utjki ukanak katoqapjjani. ¿Kunjamatsa uk yattanjja? ‘Amigonakaj laykuw jakañaj churäjja’ sasaw Jesusajj säna (Juan 15:13). Jupajj janïr aka oraqer jutkäna uka nayra jakiri jaqenakasa, ukhamarakiw Jesusat yateqapjjañapäni, jupar munasipjjañaparakïni. Abrahán, Sara, Moisés, Rahab ukat cheqapar sarnaqeri yaqha jaqenakas jaktanipjjaniwa, jupanakajj ukhamarakiw wiñay jakañ katoqañatakejj Jesusan amigopäñatak chʼamachasipjjañapäni (Juan 17:3; Hech. 24:15; Heb. 11:8-12, 24-26, 31).
8, 9. Juan 15:4, 5 textorjamajja, ¿kunsa Jesusan amigopäsajj lursna, kunatsa Jesusamp mayakïñasa?
8 Reinon suma yatiyäwinakap predicasasa, yatichasasa Jesusaruw yanaptʼasktanjja, ukham lurañajj kusiskañawa. Jesusajj aka oraqenkkäna ukhajja cheqa yatichäwinakwa Diosat yatichäna. Alajjpachar kutʼjjasajja, congregacionan pʼeqepjamajj jichhakamaw predicasiñapatakis yatichasiñapatakis pʼeqtʼaski. Jesusampiru Awkipampiru uñtʼapjjañapatak jaqenakar yanaptʼktan ukjja, Jesusajj uñjaskiwa wali valoranitwa uñjaraki. Cheqas Jehová Diosampina Jesusampin yanaptʼapampikiw jaqenakar prediksna yaticharaksna (Juan 15:4, 5 liytʼañataki).
9 Jehová Diosar kusisiyañ munstan ukhajja, Jesusaruw munasiñasa sasaw Bibliajj qhan yatichistu. Ukhamasti, Jesusan amigopäñatakejj kunanaksa lurañasa ukwa pusi toqet yatjjataskañäni.
¿KUNANAKAS JESUSAN AMIGOPÄÑATAK YANAPTʼISTASPA?
Akanak lurasaw Jesusan amigopäsna: 1) Jupar sum uñtʼasa, 2) jupjam amuyasa, jupjamarak kuns lurasa, 3) Jesusan jilanakapar yanaptʼasa, 4) Diosan markapajj kunanaktï amtki ukanakar istʼasa. (Párrafos 10-14).b
10. ¿Kunsa Jesusan amigopäñatak lurañasa?
10 Maya, Jesusar uñtʼañasawa. Ukatakejj Bibliankiri Mateo, Marcos, Lucas, Juan libronakwa liytʼañasa. Jesusan sarnaqäwipat Biblian liytʼasasa, kunja suma chuymampis jaqenakar uñjäna ukanakat amuytʼasasa, juparojj munasiñäniwa, respetarakiñäniwa. Sañäni, Jesusajj discipulonakapan Uywiripäkasas janiw esclavonakarjam jupanakar uñjkänti. Antisas amigonakaparjamaw uñjäna, jupajj kunanaksa piensäna, chuyma manqhapan kunjamäskänsa ukanaksa discipulonakapar yatiyarakïnwa (Juan 15:15). Discipulonakapajj jachapkäna ukhajja jupanakamp chikaw jacharakïna (Juan 11:32-36). Jesusajj khitinakatï jupar istʼapkäna ukanakan amigopänwa, enemigonakapajj uk amuyapjjänwa (Mat. 11:19). Kunjamtï Jesusajj discipulonakapar uñjkäna uka pachparaki jaqenakar uñjañäni ukhajja, jukʼamp sumaw jupanakamp apasiñäni, jukʼamp kusisitarakiñäniwa, Jesusarus jukʼampwa munasiñäni respetarakiñäni.
11. ¿Kunsa Jesusan amigopäñatak lurañasa, kunatsa ukham lurañajj wali wakiskirejja?
11 Paya, Jesusjamaw amuyañasa, jupjamarakiw kuns lurañasa. Kunjamtï Jesusajj amuyki uk sum yatiñäni ukat jupjam amuyañatak chʼamachasiñäni ukhajja, jupan suma amigopäñäniwa (1 Cor. 2:16). Kunjamsa Jesusat yateqassna uk amuytʼañäni. Munañap lurañat sipansa mayninakar yanaptʼañaw jupatak nayrankäna (Mat. 20:28; Rom. 15:1-3). Ukham jaqëtapatjja, mayninakar yanaptʼañatakejj kuns lurakïnwa, pantjasitanakapsa perdonarakïnwa. Jaqenakajj jan walsa jupat parlapkchïnjja janiw facilak coleraskänti (Juan 1:46, 47). Jaqenakarojj janiw nayra pantjasitanakap amtayirïkänti (1 Tim. 1:12-14). Jesusat yateqasis sarnaqañajj wali wakiskiriwa, ¿kunatsa? Jupajj akham sänwa: “Jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:35). Ukhamajj akham jisktʼasiñäni: ¿Jesusat yateqasisa jilat kullakanakamp sumankañatak chʼamachasiskti? sasa.
12. ¿Kunsa Jesusan amigopäñatak lurañasa, kunjamsa uk lursna?
12 Kimsa, Jesusan jilanakaparuw yanaptʼañasa. Ajllit cristianonakar yanaptʼtan ukhajja, Jesusajj juparus yanaptʼksna ukhamwa uñji (Mat. 25:34-40). Taqe chuyma predicasa, ukhamarak yatichasaw ajllit cristianonakar jukʼamp yanaptʼtanjja, Jesusaw ukham lurañas mayïna (Mat. 28:19, 20; Hech. 10:42). Oraqpachan predicasiñapatakiw ajllit cristianonakajj wal chʼamachasipjje, uk phoqañatakejj ‘yaqha ovejanakan’ yanaptʼapaw munasi (Juan 10:16). Jiwasatï yaqha ovejanak taypinkstanjja, predicasajj ajllit cristianonakampiru Jesusampiru munasitaswa uñachtʼayasktanjja.
13. Lucas 16:9 texton Jesusan mä ewjjtʼapaw uñsti, ¿kunjamsa ukarjam lursna?
13 Oraqpachan predicasiñapatak qollqemp yanaptʼasarakiw Jehová Diosampin Jesusampin amigopar tuktanjja (Lucas 16:9 liytʼañataki). Sañäni, obra mundial ukar qollqe donasaw yanaptʼsna. Uka qollqejj jaya cheqanakan predicasiñapataki, construccionar yanaptʼañataki, Diosar adorañatak utanakajj utjki ukanak askichañataki, jan waltʼäwinakan uñjasipki uka jilat kullakanakar yanaptʼañatakiw aptasi. Congregacionan kuna gastonakatï utjki ukaruw qollqemp yanaptʼaraksna, yanaptʼa munapki uka jilat kullakanakarus yanaptʼaraksnawa (Prov. 19:17, TNM). Taqe ukanak lurasaw Jesusan jilanakapar yanaptʼtanjja.
14. Efesios 4:15, 16 textorjamajja, ¿kunsa Jesusan amigopäñatak lurañasaraki?
14 Pusi, Diosan markapajj kunanaktï amtki ukanakar istʼañasawa. Jesusajj congregacionan pʼeqtʼiripawa, jupaw munasiñamp cuidapkistu uka jilatanakar uttʼayi. Uka jilatanakar istʼtan ukhajja, Jesusan jukʼamp suma amigopätanwa (Efesios 4:15, 16 liytʼañataki). Sañäni, Diosan markapajja, Tantachasiñ Utanak jukʼamp sum apnaqañatakiw chʼamachasi. Ukatakejja, yaqhep congregacionanakajj mayachthapisïnwa, predicapki uka territorionakas mayjtʼayasirakïnwa. Ukham lurasaw donacionanakajj ina chʼusar jan aptʼaskiti. Maysa toqetsti, uka cambionakar jilat kullakanakan yatinoqtapjjañapaw wakisïna. Diosar taqe chuyma serviri uka jilat kullakanakajja, nayrajj inas mä congregacionan walja maranak tantachasipjjchïna, ukankir jilat kullakanakampis wali yatitäpjjchïna. Ukampis yaqha congregacionan servipjjañapatakiw jupanakar mayisiwayi. Diosan markapajj kunanaktï amtki ukanakar jilat kullakanakajj istʼapjje ukhajja, Jesusajj wal kusispacha.
WIÑAYATAKIW JESUSAN AMIGOPÄSNA
15. ¿Kunas Jesusan amigonakapampejj jutïrin pasani?
15 Espíritu santomp ajllit cristianonakajja, Jesusamp chika Diosan Reinopan apnaqañwa suyasipki. Jupanakajj wiñayatakiw Jesusamp parltʼasipjjani, suma amigöpjjarakini (Juan 14:2, 3). Aka oraqen jakañ suyasipki ukanakarojja, Jesusajj munasiñampiw uñjani, cuidarakini. Jehová Diosampi Jesusampejj jupanakatak wakichapki uka paraison wali kusisit jakasisajja, Jesusarojj janis uñjapkchinejj jukʼamp suma amigoparuw tukupjjani (Is. 9:6, 7).
16. ¿Jesusan amigopäsajj kuna bendicionanaksa katoqtanjja?
16 Jesusan amigopäsajja, walja bendicionanakwa katoqtanjja. Sañäni, jupajj wal munasistu, yanaptʼarakistuwa, jutïrinsa wiñay jakañwa katoqaraksna. Taqe ukanakat sipansa, Jesusan amigopäsajj Jehová Diosan amigopäñäniwa, ukaw jukʼamp wakiskirejja. Ukhamasti, Jesusan amigopäñajj wali kusiskañawa.
CANCIÓN 17 Nayaw yanaptʼäma
a Jesusajj aka oraqenkaskäna ukhajja, apostolonakajj jupamp chikäpjjänwa, sum parltʼasipjjäna, taqe kun lurapjjäna, suma amigonakaruw tukupjjarakïna. Jiwasajj amigopäsna ukwa Jesusajj munaraki, ukampis apostolonakapat sipansa jupan amigopäñajj jiwasatak chʼamakïspawa. ¿Kunatsa? Aka yatichäwinjja, kunatsa chʼamäspa, kunanaksa amigopäñatak lurañasa ukanakwa yatjjataskañäni.
b DIBUJOMPIT FOTONAKAMPIT JUKʼAMP QHANAÑCHTʼAÑATAKI: 1) Familiampi Bibliat yatjjatktan ukanjja, Jesusan jakäwipampita predicatapampitwa yatjjattanjja. 2) Congregacionanjja, jilat kullakanakamp sumankañatakiw chʼamachastanjja. 3) Taqe chuym predikir sarasajja Jesusan jilanakaparuw yanaptʼasktanjja. 4) Congregacionanakajj mayachthapisjje ukhajja, kuntï jilïr irpirinakajj amtapki ukaruw yanaptʼtanjja.