Wali wakiskir nayra profecía

1. ¿Adanampi Evampejj juchachasipkäna ukat mä jukʼa tiempot kunsa Jehová Diosajj luräna? (Génesis 3:15).

ADANAMPI Evampejj juchachasipkäna ukat mä jukʼa tiempotjja, Jehová Diosajj mä profecía toqew wawanakapar mä suytʼäwi churäna. Diosajj kamsänsa ukjja Génesis 3:15 (liytʼäta) textonwa jikjjatsna.

2. ¿Kunatsa Génesis 3:15 texton jikjjataski uka profeciajj wali wakiskirejja?

² Uka profeciajj Biblian nayrïr libropanwa jikjjatasi. Ukampis Biblian mayni libronakapajj uka profeciampi mayachtʼatäpjjewa. Kunjamtï mä wiskhajj phäñanak mayachthapkejja ukhamarakiw Génesis 3:15 texton jikjjataski uka arunakajj Biblian taqpach libronakapar mayachthapi ukat mä pachpa yatiyäwinikiwa. ¿Kunas uka yatiyäwejja? Diosajj mä Salviri khitaniñapäna, ukhamat Diablompiru taqe jan wali arkirinakapampir tukjañataki.b ¡Jehová Diosar munasktan ukanakatakejja ukajj mä suma yatiyäwiwa!

3. ¿Kunanakatsa aka yatichäwin yatjjataskañäni?

³ Aka yatichäwinjja Génesis 3:15 textot kuna jisktʼanakatï utjki ukanakaruw qhanañchtʼaskañäni: ¿uka profecian parlki ukanakajj khitinakäpjjesa?, ¿kunjamsa uka profeciajj phoqasiski?, ¿kunjamsa uka profeciajj jichha tiempon yanaptʼistu? 

¿UKA PROFECIAN PARLKI UKANAKAJJ KHITINAKÄPJJESA?

4. ¿Khitis asirojja, ukat kunjamatsa uk yattanjja?

⁴ Génesis 3:14, 15 textonjja, mä ‘asirumpita’ asirun ‘wawapampita’, ukat mä ‘warmimpita’ warmin ‘wawapampitwa’ parli. Jupanakajj khitinakäpjjesa uk yatiñatakejj Bibliaw yanaptʼistaspa.c Asirut nayraqat parltʼañäni. Janiw mä cheqpach asirükpachänti, kuna laykutejj Diosajj Edén jardinan juchañchkäna uk janiw amuykaspänti. Amuytʼasiri mä espiritüñapänwa. ¿Khitïpachänsa? Apocalipsis 12:9 textojja uka “nayra asirojj” Supayawa, mä arunjja Diablowa sasaw qhanañchi. Ukampis ¿khitis asirun wawapajja?

5. ¿Asirun wawanakapajj khitinakäpjjesa?

⁵ Kunapachatï Biblian “wawanaka” sasin siski ukhajja, khitinakatï awkipjam amuyapki, lurapkaraki ukanakatwa parlaski. Ukhamajja asirun wawanakapajj Supayat yateqasis Jehová Dios contra, markap contra saytʼasipki uka angelanakampi ukat jaqenakampiwa. Noé chachan urunakapan alajjpachan utjäwinakap apanukusin aka oraqer saraqanipkäna uka angelanakasa, Supay awkipat yateqasis jan walinak lurapki uka jaqenakas uka taypinkapjjarakiwa (Gén. 6:1, 2; Juan 8:44; 1 Juan 5:19; Jud. 6).

6. Génesis 3:15 texton parlki uka ‘warmejj’ ¿kunatsa jan Eva warmïkaspa?

⁶ Jichhajj ‘warmit’ parltʼañäni. ¿Jupajj Eva warmïpachati? Janiwa. Ak amuytʼañäni. Profeciajja warmin wawapaw asirur pʼeqet ‘takjjatani’ sasaw qhanañchi. Kunjamtï yatjjataniwayktanjja, asirojj mä espirituwa, mä arunjja Supayawa. Ukhamasti janiw Eva warmit jutir mä wawajja, mä arunjja jucharar mä jaqejj Supayar tukjkaspati. Ukhamajj ¿kunjamatarak Supayajj tukjatäspasti?

7. ¿Génesis 3:15 texton parlki uka warmejj khitisa uk yatiñatakejj kunjamsa Apocalipsis 12:1, 2, 5, 10 textojj yanaptʼistu?

⁷ Génesis 3:15 texton parlki uka warmejj khitisa ukjja, Apocalipsis libronwa qhanañchi (Apocalipsis 12:1, 2, 5, 10 liytʼäta). Uka warmejj janiw jañchini chʼakhani warmïkiti. Uka warmin kayup aynach toqenjja phajjsiw utjäna, pʼeqeparusti 12 warawaranakani mä coronampi asjjatatarakïnwa. Mä yoqall wawaruw ususïna, mä arunjja Diosan Reinoparu. Niyakejjay Diosan Reinopajj alajjpachankchejja, warmejj alajjpachankirïñaparakiwa. Ukhamasti warmejj alajjpachankir Jehová Diosan organizacionapawa, Diosat jan jitheqtir angelanakaw uka taypinkapjje (Gál. 4:26).

8. ¿Khitis warmin wawapan parte principalajja, ukat kunapachas parte principalar tukjjäna? (Génesis 22:15-18).

⁸ Warmin wawapan parte principalajj khitisa uk Bibliaw qhanañchistu. Jupajj Abrahán chachat jutirïñapänwa (Génesis 22:15-18 liytʼäta). Profeciajj ukarjamapuniw phoqasïna, kuna laykutejj Jesusaw Diosat jan jitheqtiri Abrahanat jutir wawänjja (Luc. 3:23, 34). Ukampis warmit jutir wawajj Supayar tukjañatakejj jaqet sipans jukʼamp chʼamanïñapänwa. Jesusajj 30 maranëjjäna ukhajja, espíritu santompi ajllitäjjänwa, ukhamatwa espíritu santomp ajllit Diosan wawapäjjäna. Uka horasanwa warmin wawapan parte principalapar tukjjäna (Gál. 3:16). Jesusajj jiwjjäna ukat jaktjjarakïna uka qhepatjja, Diosajj “kʼajkiriruw” tukuyäna, jachʼañcharakïnwa. Alajjpachans oraqens taqe autoridad churarakïna, ukanakat mayajj ‘Diablon luratanakap tʼunjañatak’ autoridadwa churäna (Heb. 2:7; Mat. 28:18; 1 Juan 3:8).

9, 10. 1) ¿Khitinakas warmin wawap taypinkapjjaraki, ukat kunapachas warmin wawap taypinkjjapjje? 2) ¿Kunanakatsa jichhajj yatjjataskañäni?

⁹ Warmin wawapan parte secundariaw utjañaparakïna. Warmin wawapan parte secundariajj khitïnsa ukjja, judío ajllit cristianonakampiru yaqha markanakankir ajllit cristianonakampir apóstol Pablojj qellqkäna ukhaw qhanañchäna, jupajj akham sänwa: “Jumanakatï Cristonkirïpjjstajja, Abrahanan wawanakapäpjjtawa, kuntï Diosajj Abrahanar arskäna uksa katoqapjjarakïtawa” sasa (Gál. 3:28, 29). Kunapachatï Jehová Diosajj mä cristianor espíritu santompi ajlljje ukhajja, warmin wawap taypinkjjewa. Ukhamasti Jesucristosa, jupamp chik apnaqapkani uka 144.000 ajllit cristianonakas warmin wawap taypinkapjjewa (Apoc. 14:1). Taqe jupanakaw Jehová Dios Awkipjam amuyañataki ukat lurañatak chʼamachasipjje.

¹⁰ Niyakejjay Génesis 3:15 textojj khitinakatsa parli uk yatjjstanjja, jichhajj uka profecian phoqasiñapatakejj kunsa Jehová Diosajj luraski, kunjamsa uka profeciajj jichha tiempon yanaptʼarakistu ukwa mä qhawqhanak yatjjataskañäni.

¿KUNJAMSA UKA PROFECIAJJ PHOQASISKI?

11. ¿Kunjamsa warmin wawapajj ‘kayu talonat’ achjatäna?

¹¹ Génesis 3:15 textojja, warmin wawaparojj “kayu talonatwa” asirojj achjani sasaw qhanañchi. Kunapachatï Supayajj judionakampiru ukhamarak romanonakampir Jehová Diosan Yoqapar jiwayapjjañapatak amtaykäna ukhaw uka profeciajj phoqasïna (Luc. 23:13, 20-24). Maynejj kayu talonat usuchjatäki ukhajja, janiw mä qhawqha tiempojj sarnaqañ puedkaspati. Ukhamarakiw Jesusajj jiwatäkäna ukhajj mä qhawqha tiempojj jan kuns lurirjamäkänti, jupajj niya kimsa urunakaw sepulturankäna (Mat. 16:21).

12. ¿Kunapachasa ukat kunjamsa asirojj pʼeqet takjjatatäni?

¹² Génesis 3:15 texton phoqasiñapatakejj janiw Jesusajj wiñayatak sepulturankañapäkänti, kuna laykutejj profeciarjamajj warmin wawapaw asirur pʼeqet takjjatañapäna. Ukhamajj Jesusan kayu talonapajj jakjjañapänwa. Ukajj ¡ukhamapuniw pasäna! Kimsïr urunwa Jesusajj jan jiwiri espiritjam jaktjjäna. Diosan amtat tiempojj purinjjani ukhajja, wiñayatakiw Jesusajj Supayar tukjani (Heb. 2:14). Jesusasa jupamp chik apnaqapkani ukanakas Diosan enemigonakaparuwa, mä arunjja asirun wawanakaparuw chhaqtayapjjani (Apoc. 17:14; 20:4, 10).d

¿KUNJAMSA UKA PROFECIAJJ JICHHA TIEMPON YANAPTʼISTU?

13. ¿Kunjamsa uka profecian phoqasitapajj yanaptʼistu?

¹³ Jumatï Diosan serviripäjjsta ukhajja, uka profecian phoqasitapajj jakäwiman yanaptʼjjpachätamwa. Jesusajj aka oraqer jutkäna ukhajja, Awkipajj kunjam chuymanisa uk wali qhanwa uñachtʼayäna (Juan 14:9). Jesusat yateqasiñajj Diosar uñtʼañataki, jupar munasiñatakiw yanaptʼawayistu. Jesusan yatichäwinakapasa, kunjamsa cristiano congregacionar pʼeqtʼaski ukasa wal yanaptʼarakistu. Jehová Diosar kusisiykiri jakasiñasatakiw yatichawayarakistu. Asirun Jesusar kayu talonapat achjatapajja, mä arunjja Jesusan jiwatapajj taqeniruw yanaptʼarakistaspa. Jiwatat jaktjjäna ukhajja wali valorani wilapwa Jesusajj perfecto sacrificiot loqtäna, uka sacrificiow taqe ‘juchanakasat qʼomachistu’ (1 Juan 1:7).

14. Jehová Diosajj Edén jardinan arskäna uka profeciajj janiw uka tiempon phoqasiñapäkänti, ¿kunjamatsa uk yattanjja?

¹⁴ Jehová Diosajj Edén jardinan arskäna uka profeciajja, janiw uka tiempon phoqasiñapäkänti. Jutañapäkäna uka wawan nasiñapatakisa, Diablojj arkirinakapar tantachthapiñapatakisa, uka pä gruponakan enemigor tukupjjañapatakis tiempow pasañapäna. Uka profeciat yatiñajj aka toqet amuyasiñatakiw yanaptʼistu: Supayan apnaqat akapachajj Jehová Diosan servirinakaparuw uñisiñapäna. Walja maranak qhepatjja, Jesusajj niya uka pachparakwa discipulonakapar säna (Mar. 13:13; Juan 17:14). Uka profecian mä partep phoqasir uñjawayjjtanwa, jukʼampis aka qhepa 100 maranakanwa phoqasir uñjawaytanjja. ¿Kunatsa ukham sistanjja?

15. 1) ¿Kunatsa akapachankirinakajj nayrat sipans jukʼamp uñisjjapjjestu? 2) ¿Kunatsa Supayar jan ajjsarañasäki?

¹⁵ Jesusajj 1914 maranwa Reyit uttʼayatäjjäna. Mä jukʼa tiempotjja Supayaruw alajjpachat aka oraqer jaqoqanjjäna. Jichhajj Supayajj aka oraqenakwa jan walinak lurjjaspa, tukjatäñakwa suyjjaraki (Apoc. 12:9, 12). Ukampis janiw Supayajj jan kun lurasakejj suykiti. Wali colerataw Diosan markapar jan waltʼayaski (Apoc. 12:13, 17). Ukatwa akapachankirinakajj nayrat sipans jukʼamp uñisjjapjjestu. Ukampis janiw Supayarusa ni arkirinakaparus ajjsarañasäkiti. Jan ukasti apóstol Pabljamaw taqe chuyma confiyañasa, jupajj akham sänwa: “Diosatejj jiwasampïskchejja, ¿khitirak jiwas conträspasti?” sasa (Rom. 8:31). Kunjamtï yatjjataniwayktanjja, Génesis 3:15 textonkir profeciajj jilapartew phoqasjje, ukhamajj taqe chuymaw Jehová Diosar confiysna.

16-18. Génesis 3:15 textot amuytʼañajj ¿kunjamsa Curtis, Ursula ukat Jessica jilat kullakanakar yanaptʼawayi?

¹⁶ Jehová Diosajj Génesis 3:15 texton mä promesa arskäna ukajja, taqe jan walinakar saykatañatakiw yanaptʼistu. Guam markan misionerot serviri Curtis sat jilatajj akham siwa: “Kunayman jan walinakanwa jakäwijan uñjasiwayta, ukanakaw Jehová Diosat jitheqtayañ munitäna. Ukampis Génesis 3:15 textonkir profeciat lupʼiñaw alajjpachankir Awkijar confiyaskakiñatak yanaptʼitäna” sasa. Jehová Diosajj taqe jan walinak chhaqtayjjani uka urun puriniñapwa Curtis jilatajj taqe chuyma suytʼaski.

¹⁷ Baviera (Alemania) markankir Ursula sat mä kullakarojja, Génesis 3:15 textot amuytʼañaw Bibliajj Diosan arupäskapuniwa sasin confiyañatak yanaptʼäna. Biblian mayni profecianakapajj kunjamsa Génesis 3:15 textompejj mayachtʼatäpjje uk amuyañaw Ursula kullakan chuymapar purtʼäna. Jupajj akham siwa: “Jiwasar mä suytʼäwi churañatakejj jankʼakiw Jehová Diosajj kuns luräna, uk yatiñajj chuymarupuniw purtʼitäna” sasa.

¹⁸ Micronesia markankir Jessica kullakajj akham siwa: “Biblian cheqa yatichäwinakap yateqasajj kunjamas jikjjatasiyäta uk janiw armaskti. ¡Génesis 3:15 textonkir profeciaw phoqasiskäna! Akapachan jakasktan ukajj janiw cheqpach jakäwïkiti, ukwa uka profeciat amuytʼañajj amtayitu, Jehová Diosar serviñajj jichha tiempon kusisit jakasiñatakiw yanaptʼistu, jutïrin jukʼamp kusisitäñatakiw yanaptʼarakistani, ukat jan payachasiñatakiw uka profeciajj yanaptʼitu” sasa.

19. ¿Génesis 3:15 textonkir profeciajj taqpachaw phoqasini sasajj kunatsa confiytanjja?

¹⁹ Kunjamtï yatjjataniwayktanjja, Génesis 3:15 textonkir profeciajj phoqasiskiwa. Warmin wawapasa asirun wawapas khitinakäpjjesa uk sum yatjjtanjja. Warmin wawapan parte principalajj Jesusawa, kayu talonat achjatäkchïnsa, jichhajj jan jiwiri wali chʼamani Reyëjjewa. Jehová Diosajja wawapamp chika alajjpachan apnaqapkani ukanakar ajlliñ niyaw tukuyjjani. Génesis 3:15 textonkir profeciajj mä partejj phoqasjjewa. Ukhamajj taqpach profeciaw phoqasjjani sasajj taqe chuymaw confiytanjja. ¡Asirojj pʼeqet takjjatatäniwa! Supayajj tukjatäkani ukhajja, Diosan servirinakapajj wal kusisipjjani. Uka uru puriniñapkamajj jan qarjtapjjañäniti, Diosar confiyapjjañäni. Warmin wawap toqew “oraqenkir taqe markanakajj” walja bendicionanak katoqapjjani (Gén. 22:18).