Biblia liykasajj yanaptʼkir yatichäwinak thaqapjjañäni

1. ¿Kunatsa Jesusatakejj Diosan Arupaw wali importantën sasin sistanjja?

¿JESUSAN yatichäwinakap istʼañajj kunja sumäpachänsa uk amuyirïtati? Jupajj Diosan Arupat aytapunirïnwa, pʼeqepatakwa mä texto aytirïna. Ukaw bautisaskäna uka qhepat arskäna uka nayrïr arunakapan amuyasi, janïr jiwkäna uka qhep qhepa arunakapansa ukaw amuyasiraki (Deut. 8:3; Sal. 31:5; Luc. 4:4; 23:46).b Jesusajj kimsa mara chikatani aka oraqenkkäna ukhajja, Diosan Arupatwa jilapartejj liytʼirïna, mä texto aytasajj qhanañchtʼarakirïnwa (Mat. 5:17, 18, 21, 22, 27, 28; Luc. 4:16-20).

2. ¿Jesusajj jilsuskäna ukhajj kunas Diosan Arup sum uñtʼañapatak yanaptʼäna? (Nayrïr paginankir dibujo uñjjattʼäta).

² Jesusajj janïr yatiyañ qalltkäna uka nayrajj Diosan Arupat liytʼapunirïnwa, yaqhanakajj Diosan Arup liytʼapkäna ukhasa, ukjjat parlapkäna ukhas istʼapunirïnwa. Mariampi Joseampejj familian parltʼasipkäna ukhajja, jupanakarojj Diosan Arupat aytirwa istʼirïpachäna (Deut. 6:6, 7).c Sapa sábado urunakaw familiapampejj sinagogar sarirïpachäna, Diosan Arupat liytʼaskäna uksa wali sumwa istʼarakpachäna, janiw ukat payachasktanti (Luc. 4:16). Tiempompejja, jupa pachpaw Diosan Arupat liytʼañ qalltarakïna. Ukham luratapatjja, janiw kuntï Diosan Arupajj siski ukak yatkänti, jan ukasti Diosan Aruparojj munasïnwa, yanaptʼayasirakïnwa. Ukatakejja, 12 maranïkäna ukhajj kunas templon pasäna uk amuytʼañäni. Moisesan leyip wali sum uñtʼapkäna uka yatichirinakajja, “wali amuytʼasirïtapatsa jisktʼanakar qhanañchatapatsa wal musparapjjäna” (Luc. 2:46, 47, 52).

3. ¿Kunanakatsa aka yatichäwin yatjjataskañäni?

³ Jiwasatï Diosan Arupat sapa kuti liytʼañänejja, Diosan Arup jukʼamp sumwa uñtʼañäni, munasirakiñäniwa. Ukampis Biblia liytʼkasin yanaptʼkir yatichäwinak jikjjatañatakejj ¿kunsa lursna? Uk yatiñatakejja, Ley wali sum uñtʼir escribanakarusa, fariseonakarusa, saduceonakarus Jesusajj kamsänsa uk yatjjatañäni. Uka religión pʼeqtʼirinakajj sapürus Biblia liyipkchïnjja, janiw yanaptʼkir yatichäwinak jikjjatapkänti. Kunsa ukatakejj lurapjjañapäna ukjja, Jesusajj kimsa toqetwa qhanañchäna. Jesusan arunakapajj akanakatakiw yanaptʼarakistani: 1) Kuntï liyktan ukat jukʼamp sum amuyañataki, 2) wali valorani yatichäwinak jikjjatañataki, 3) Diosan Arupampi jukʼamp sum yanaptʼayasiñataki.

KUNTÏ LIYTʼKTAN UK ENTIENDIÑASAWA

4. Lucas 10:25-29 textojj ¿kunsa liytʼktan ukjjat yatichistu?

⁴ Kuntï Bibliat liytʼktan uk entiendiñatakiw chʼamachasiñasa, janitï ukham lurksnajja, janiw yanaptʼkir yatichäwinak jikjjatksnati. Jesusajj ‘Ley sum uñtʼir mä jaqemp’ parlkäna uk amuytʼañäni (Lucas 10:25-29 liytʼäta). Uka jaqejj wiñay jakañ jikjjatañatakejj kunsa lurañapäna ukwa yatiñ munäna, jisktʼapar qhanañchañatakejja, Jesusajj Diosan Arupatwa amuytʼayäna. Akham sänwa: “¿Kunatï Leyin qellqatäki ukajj kamsisa? ¿Jumajj kunjamsa uk amuyta?” sasa. Uka jaqejj Jesusan jisktʼaparojj cheqaparuw jaysäna. Qellqatanakat aytasinjja, Diosampiru jaqe masisampir munasiñasawa sasaw säna (Lev. 19:18; Deut. 6:5). Ukampis akham sasaw Jesusar jisktʼarakïna: “¿Khitipunis cheqpach jaqe masijajja?” sasa. Ukham jisktʼasajja, kuntï Qellqatanakat liytʼkatayna uk jan sum amuyatapwa uñachtʼayäna. Ukatwa kuntï liykäna ukarjam jan lurañ puedkänti.

5. Biblia liytʼañatak orasiñasa, jan ratuk liyirpayañasa, ¿kunjamsa Diosan Arup jukʼamp sum entiendiñatak yanaptʼistu?

⁵ Biblia sapür liyiñajja, Diosan Arup jukʼamp sum entiendiñatakiw yanaptʼistu. Ukatakejj waljanakwa lursna. Nayraqatjja, janïr liykasajj orasiñasawa. Jehová Diosan jan yanaptʼapampejj janiw kuntï Bibliajj siski uk amuyañ puedksnati, ukatwa Biblia liyktan ukar chuym uchañatakejj espíritu santop mayisiñasa. Ukat liykasajja, janiw ratuk liyirpayañasäkiti, jan ukasti kuntï liytʼktan uk sum amuytʼañatakjamaw liytʼañasa. Biblia jachʼat liytʼaña, jan ukajj Bibliat liytʼaski uka grabacionanakamp arktañaw yanaptʼarakistaspa. Ukham lurañäni ukhajja, Biblian parlki uka jaqenakamp chikäksnas ukhamwa amuyasiñäni, Biblian yatichäwinakapajj amuyusarus chuymasarus mantarakiniwa (Jos. 1:8). Liyiñ tukuyasajja, arunakapat yuspärañatakejj wasitatwa Jehová Diosar orasiñasa, liytʼatarjam sarnaqañatak yanaptʼita sasaw mayisiñasaraki.

6. ¿Kunatsa Biblia liykasin jisktʼasiñasa mä qhawqhanak qellqtʼasiñas wali wakiskirejja? (Fotonak uñjjattʼäta).

⁶ Kuntï Biblian liytʼktan uk jukʼamp sum entiendiñatakejj ¿kunas yanaptʼarakistani? Kuntï liyktan uka toqet jisktʼasiñaw yanaptʼistani. Akhamwa jisktʼassna: “¿Khitinakatsa jilapartejj parli? ¿Khitis parlaski? ¿Khitirus parli, ukat kunatsa? ¿Kawkinsa ukat kunapachas taqe kunas pasaski?” sasa. Ukaw jukʼamp sum entiendiñatakisa, jukʼamp wakiskir yatichäwinakar chuym uchañatakis yanaptʼistani. Mä qhawqhanak qellqtʼasiñasawa. Kuntï liyktan uk qellqtʼasiñajja, liyktan ukjjat jukʼamp lupʼiñataki, jukʼamp sum amuyañataki, kuntï liyktan uk jan armasiñatakiw yanaptʼistu. ¿Kunsa qellqtʼassna? Jisktʼasktan ukanaka, yatjjatktan ukanaka, wakiskir yatichäwinakwa qellqtʼassna, ukatjja kuntï liyktan ukampejj kunjamsa yanaptʼayasiñ muntan, jan ukajj kuntï liyktan ukajj kunjamsa chuymasan jikjjatasiyistu ukanakwa qellqtʼasiraksna. Biblia liykasin ukham lurañäni ukhajja, Jehová Diosas sapa mayni jiwasanakar parlkistaspa ukhamwa amuyañäni.

7. ¿Kunas Biblia liytʼañatakejj wakisi, ukat kunatsa? (Mateo 24:15).

⁷ Kuntï Bibliat liyktan uk sum entiendiñatakejja, wali amuyumpi liytʼañaw wakisi, ukwa Jesusajj sarakïna (Mateo 24:15 liytʼäta). ¿Amuytʼasirïñajj kamsañs muni? Kunjamsa mä yatichäwejj yaqha yatichäwimp mayachtʼasi, kunansa uka yatichäwinakajj jan kikpäpkaraki ukanak amuytʼaña sañ muni. Kunatï jan fácil amuyañjamäki uk amuyaña sañ munaraki. Jesusan arunakaparjamajja, suma amuytʼasirïñaw kunanakatï pasaski ukanakajj Biblian profecianakaparjam phoqasiskatap amuyañatak yanaptʼistani. Amuytʼasirïñajj wali wakiskiripuniwa, ukhamatwa Biblia liytʼkasajj yanaptʼkir yatichäwinak jikjjatañäni.

8. ¿Kunsa wali amuyump liytʼañatakejj lurañasa?

⁸ Jehová Diosaw servirinakaparojj amuytʼasirïñ churi. Ukatwa jupar orasisajj amuytʼasirïñatak yanaptʼa mayiñasa (Prov. 2:6). Ukampis janiw orasiñakejj wakiskiti, jan ukasti kuntï liyktan uk kʼachitatwa amuykiptʼañasa, ukat kunjamsa kuntï yatktan ukampejj mayachtʼasi ukwa amuytʼañasaraki. Uk lurañasatakejj Bibliat apstʼat qellqatanakajj waljaw utjistu, Jehová Diosan Testigonakapan Bibliat yatjjatapjjañapataki sat librompiw yanaptʼasiraksna. Uka qellqatanakamp yanaptʼasisajja, Biblian utjki uka sarnaqäwinakajj kamsañs muni uk amuytʼañäniwa, kunjamsa liytʼktan ukarjamajj sarnaqsna uks amuytʼarakiñäniwa (Heb. 5:14). Wali amuyump Biblia liytʼasajja, sapa kutiw kuntï liytʼktan uk jukʼamp sum amuyjjañäni.

WALI VALORANI YATICHÄWINAK JIKJJATAPJJAÑÄNI

9. ¿Kuna cheqa yatichäwsa saduceonakajj jan sum amuyapkäna?

⁹ Saduceonakajj Hebreo Arut Qellqatanakan nayrïr phesqa libronakap sumsa uñtʼapkchïnjja, Diosan amuytʼayat uka phesqa libronakan cheqa yatichäwinakap janiw amuyapkänti. Saduceonakajj jiwatat jaktañat jisktʼapkäna ukhajj kamsasas Jesusajj jupanakar jaysäna uk amuytʼañäni. Jesusajj akham sasaw jupanakar jisktʼäna: “¿Janit Moisesan libropanjja aqaskir chʼapit parlki uka cheq liytʼapkta? Diosajj akham sasaw Moisesar säna: ‘Nayajj Abrahanana, Isaacana ukhamarak Jacobun Diosapätwa’” sasa (Mar. 12:18, 26). Saduceonakajj walja kutiw uka cheq liytʼapjjpachäna, ukampis Jesusan ukham jisktʼatapajja, jiwatat jaktañat Biblian yatichaski uk jan sum amuyapjjatapwa qhanstayäna, ukajj Biblian wali importante yatichäwipawa (Mar. 12:27; Luc. 20:38).d

10. ¿Bibliat liytʼkasajj kun amuyañatakis chʼamachasiñasa?

¹⁰ ¿Kunsa jiwasajj ukat yateqsna? Biblia liytʼktan ukhajja, mä versiculosa jan ukajj mä sarnaqäwis kunsa yatichañ munistu uk sum amuytʼañatakiw chʼamachasiñasa. Janiw kunanakatï faciläki ukanakak amuytʼañasäkiti, jan ukasti Biblian yaqha cheqa yatichäwinakapatsa wiñay yatichäwinakapatsa amuytʼañasarakiwa, taqe ukanakajj Biblian wali valorani yatichäwinakapawa, janirakiw fácil jikjjatañjamäkiti.

11. 2 Timoteo 3:16, 17 textorjamajj ¿kunjamsa Biblian wali valorani yatichäwinakap jikjjatsna?

¹¹ ¿Kunjamsa Biblian uka wali valorani yatichäwinakap jikjjatsna? Ukatakejj 2 Timoteo 3:16, 17 (liytʼäta) textot amuytʼañäni. Uka textorjamajj “taqpach Qellqatajj […] sumarakiw” aka pusi toqenakataki: 1) yatichañataki, 2) cheqañchañataki, 3) kunatejj jan walïki ukanak askichañataki, 4) kunatï walïki ukarjam yatichañataki. Biblian libronakapan kawkïrinakatï jan añcha aytatäki ukanakas taqe ukanakatak yanaptʼarakistuwa. Liytʼktan ukhajja, kunsa Jehová Diosatsa, amtapatsa, wiñay yatichäwinakapats yatichistu uk amuytʼañasawa. Biblian versiculonakapampi cheqañchayasiñatakejj ¿kunsa thaqañasa? Kunatï jan wali luratanakatsa jan wali amuyunakats amuyasiñataki ukhamarak apanukuñatak yanaptʼkistaspa ukwa thaqañasa, kunatï Jehová Diosar jan jitheqtas serviskakiñatak yanaptʼkistaspa ukwa thaqañasaraki. Kunjamsa Biblian versiculonakapajj kunatï jan walïki ukanak askichañataki jan ukajj pantjat amuyunak cheqañchañatak yanaptʼkistaspa ukwa amuyañasa, inas predicacionan ukham pantjat amuyunak sapjjchistu. Kunatï walïki ukarjam yatichayasiñatakejj ¿kunsa lurañasa? Taqe kunanakatï Jehová Diosjam amuyañatak yanaptʼkistaspa ukanakwa Biblian thaqañasa. Uka pusi ewjjtʼarjam lurañäni ukhajja, Biblia liytʼkasajj yanaptʼkir wali valorani yatichäwinakwa jikjjatañäni.

KUNTÏ BIBLIAN LIYTʼKTAN UKARJAM LURAÑÄNI

12. ¿Kunatsa Jesusajj kuntï Qellqatanakajj siski uk janit liytʼapkta sasin fariseonakar jisktʼäna?

¹² Fariseonakajj janiw Diosan Arup suma amtamp liyipkänti. Kuntï Qellqatanakan siski uk janit liytʼapkta sasin jisktʼasaw Jesusajj jan wali amtampi liyipjjatap qhanstayäna (Mat. 12:1-7).e Ukapachaw fariseonakajj Jesusan discipulonakaparojj sábado urutak utjki uka ley pʼakintapjjatapat juchañchapjjäna. Jupanakar qhanañchañatakejja, Qellqatanakan pä uñachtʼäwinakapatwa Jesusajj parläna, Oseas libron mä versiculopatwa aytarakïna. Ukham lurasinjja, uka leyejj kuna amtampis utjäna uk fariseonakajj jan amuyapjjatapa jan khuyapayasirïpjjatapwa qhanstayäna. Uka jaqenakajj Diosan Arup liyipkchïnsa, janiw ukamp yanaptʼayasipkänti. ¿Kunatsa jan yanaptʼayasipkäna? Kuna laykutejj jachʼa jachʼaw tukupjjäna, mayninak contra parlañatakikiw liyipjjäna. Jan wali amtampi Biblia liyipjjatapatjja, kuntï liytʼapkäna ukajj kun sañs muni uk janiw amuyapkänti (Mat. 23:23; Juan 5:39, 40).

13. ¿Kunjam chuymampis Biblia liytʼañasa, ukat kunatsa?

¹³ ¿Kunsa Jesusan arunakapat yateqsna? Suma chuymampiw Biblia liytʼañasa. Janiw fariseonakat yateqasiñasäkiti. Jan ukasti humilde chuymanïñasawa, Jehová Diosampiw yatichayasiñasaraki. Santiago 1:21 textojj akham siwa: “Diosan arunakapjja llampʼu chuymampi katoqasipjjam, chuymanakamar saphintarakpan” sasa. Jiwasatï llampʼu chuymanïñänejja, Diosan arunakapajj chuymasar saphintaniwa. Biblia liytʼktan ukhajj janiw jachʼa jachʼa tukuñasäkiti, janirakiw mayninakan pantjasitanakapatsa piensañasäkiti. Ukhamatwa kuntï Bibliajj khuyapayasiñatsa, sinttʼasiñatsa, munasiñatsa yatichkistu ukajj chuymasar purtʼistani.

14. ¿Kunjamatsa Bibliampit yanaptʼayasisktan janicha uk yatsna? (Fotonak uñjjattʼäta).

¹⁴ Kunjamsa mayninakar uñjasktan ukaw Bibliamp yanaptʼayasisktanti janicha uk uñachtʼayi. Fariseonakajj janiw Diosan arunakap chuymanakapar katoqapkänti, ukatwa ‘jan juchaninakarojj juchañchapjjäna’ (Mat. 12:7). Jiwasampejj ukhamarakiwa, kunsa mayninakat amuytan, kunjamsa jupanakar uñjaraktan ukaw Diosan Arupampit irpayasisktan janicha uk uñachtʼayi. Akham jisktʼasiñasawa: “¿Mayninakan suma chuymanïpjjatapti parltjja, jan ukajj pantjasitanakapakcha uñchʼukisktjja? ¿Mayninakarojj jankʼakit perdontjja, jan ukajj chuyma ustʼatäskaktcha, mayninak contrach parltjja?” sasa. Kunjamjjay uka jisktʼanakar jayschiñäni ukaw amuyunakasansa, chuymasansa, luratanakasans Bibliampit yanaptʼayasisktan janicha uk uñachtʼayani (1 Tim. 4:12, 15; Heb. 4:12).

BIBLIA LIYIÑAW KUSISIÑ CHURISTU

15. ¿Kunjamsa Jesusajj Diosan Arupar uñjäna?

¹⁵ Jesusajj Diosan Arupar wal munasïna. Qhawqha valoranitsa Diosan Arupar uñjañapäna ukjja, Salmo 40:8 qellqatanwa akham sas qhanañchasjjäna: “Diosajay, juman munañam lurañajj nayatakejj wali kusiskañawa, leyimajj chuymaj manqhankiwa” sasa. Diosan Arupar wali valoranit uñjañaw Jesusarojj kusisitäñatakisa Jehová Diosar serviskakiñatakis yanaptʼäna. Jiwasatï Diosan Arup liytʼañataki Arupar munasiñatak chʼamachasiñäni ukhajja, Jesusarjamarakiw yanaptʼistani (Sal. 1:1-3).

16. Biblia liytʼkasin yanaptʼkir yatichäwinak jikjjatañatakejj ¿kun lurañsa amtta? (“Kuntï liytʼktan uk jukʼamp sum entiendiñatakejj Jesusan arunakapaw yanaptʼistu” sat recuadro liytʼäta).

¹⁶ Jesusan arunakapasa, jupat yateqasiñasa, sapür Bibliat jukʼamp sum liytʼañataki, jukʼamp yatjjatañatakiw chʼamañchtʼistu. Kuntï liytʼasktan uk jukʼamp sum entiendiñatakejja, Jehová Diosaruw orasiñasa, janiw ratuk liyirpayañasäkiti, kuntï liytʼktan uka toqet jisktʼasiñasawa, mä qhawqhanak qellqtʼasiñasarakiwa. Wali amuyumpi liytʼañatakejja, Biblian utji uka sarnaqäwinak kʼachitatwa liytʼañasa, Bibliat apstʼat qellqatanakasampis yanaptʼasiñasarakiwa. Diosan Arup jukʼamp sum uñtʼañatakejja, Biblian wali valorani yatichäwinak thaqapjjañäni, jan añcha uñtʼatäki uka sarnaqäwinakansa wali valorani yatichäwinak jikjjataraksnawa. Diosan Arupampi yanaptʼayasiñatakejja, suma chuymampipuniw liytʼañasa. Jiwasatï taqe ukanak lurañäni ukhajja, Biblia liytʼkasajj yanaptʼkir yatichäwinakwa jikjjatañäni, Jehová Diosarus jukʼampwa jakʼachasirakiñäni (Sal. 119:17, 18; Sant. 4:8).