¿Mayni pachpar confiyasiñajj walikïskpachati?
Suma amtanakaruw puriñasa ¿Kunarukis waljanejj istʼapjje?
Kunatï walïki jan walïkaraki uk niya taqeniw amuyapjje. Jila parte jaqenakatakejja, maynir violañasa, jiwayañasa, wawanakar abusañasa janiw walïkiti. Antisas jupanakarojj cheqaparjam taqe kunas lurasitapaw gusti. Ukampis ¿ikintasiñ toqetsa, kʼarisiñ toqetsa, wawanak uywañ toqetsa kamsaraksnasa? Waljanitakejja maynimp ikintasiñasa kʼarisiñas walikïskiwa, wawanakaparus kunatï cheqapäki uks janirakiw yatichapkiti. Ukatwa walja jaqenakajj amtanakar puriñatakejj chuymanakaparuk istʼapjje, jan ukajj kuntï mayninakajj sapki ukarukiw istʼapjje. ¿Ukham lurapjjatapajj walikïskpachati?
¿MAYNEJJ KUNA AMTARUS PURIKISPATI?
Mä kuns concienciasarjamaw amttanjja. Concienciasaw kunatï walïki jan walïkaraki uk amuytʼayistu (Romanos 2:14, 15). Jiskʼa wawanakas kunatï cheqapäki uk amuyapjjarakiwa, ukatwa awisajj mä jan wal lurasajj juchanïpkaspas ukham amuyasipjje. Ukampis marat mararjamajja, kunjam familianïtansa, khitinakampis chikachastan, profesoranakajj kunsa yatichapjjestu, kawkinsa jakastan, kuna religionarus sartan, jan ukajj kunjam costumbrenïtansa ukarjamaw concienciasajj yatichasi. Ukatwa concienciasajj mä amtar purktan ukhajja, uka amtar puritasajj walikïskiti janicha uk amuyañatak yanaptʼistu.
Concienciasajja mayninakat sinttʼasiñataki, khuyaptʼayasiñataki, yuspärasir chuymanïñataki, cheqaparjam kuns lurañatakiw yanaptʼistaspa. Maysa toqetjja khitirutï munasktan ukar jan chuym ustʼayañatakiw yanaptʼistaspa, jan jiskʼachat uñjasiñatakisa sumak jikjjatasiñatakisa yanaptʼarakistaspawa.
¿Mayni pachpar confiyasiñajj walikïskiti? Waynäkäna ukhajja, Garrick chachajj amtaparjamakiw sarnaqäna. Ukampis tiempompejja, ukham sarnaqasajj jan walinakaruw purtʼasïna. Jupajj uka toqet akham siwa: “Mä chʼamak thakirus mantkirista ukhamänwa. Qʼañu juchanakwa lurjjayäta, droganakampiw qolljasiyäta, wal machantasiyäta, chʼajjwañanakampi nuwasiñanakampiw wal gustjjetäna” sasa.
JANIW MAYNINAKAN AMTAPAMPIKEJJ APAYASIÑASÄKITI
Awisajj concienciasarjamas mä amtar purkstanjja, mayninakajj uka toqet kuns amuyapjjani sasaw llakissna. Ukham llakisiñajj walikïskiwa, kuna laykutejj mayninakan experienciapat waljanakwa yateqsna. Kunapachatï familiarasaru, amigonakasaru, markasankirinakar istʼas kunatï cheqapäki uk lurtan ukhajja, respetompiw jupanakajj uñjapjjestu.
¿Mayninakar confiyañajj walikïskiti? Tawaqökäna ukhajja, Priscila warmejj amigonakapjamarakiw jan casaratäkasin mayninakamp ikintasirïna. Ukampis ukham luratapat janiw kusisitäkänti, uka toqet jupajj akham siwa: “Mayninakajj kuntï lurapkäna ukham luratajat janiw sum jikjjataskayätti, jan wali amtanakaruw purtʼasirakiyäta” sasa.
¿SUMA AMTANAKAR PURIÑATAK MÄ YANAPTʼAJJ UTJPACHATI?
Mä amtar puriñatakejj wali sumwa amuytʼasiñasa, kunsa mayninakajj uka toqet amuyapjjani uka toqetsa lupʼiñasarakiwa. Ukampis ukham lurañajj janiw taqe kunanpun yanaptʼaskiti. Awisajja, mä amtar puritasajj jiwasarusa mayninakarus yanaptʼaniti janicha uk janiw yatkapunsnati (Proverbios 14:12). Maysa toqetjja, mä kun lurañajj jiwasatakisa mayninakatakis walikjamakïspawa. Ukampis awisajj pantjassnawa, kuna laykutejj amuyunakasajj janiw tiempompejj pachpapunëjjeti, ¿kunatsa ukham sistanjja? Waljanitakejj kunatï nayrajj jan walit uñjatäkäna ukajja, janiw jichha tiempon jan walit uñjatäjjeti. Ukatjja kunatï nayrajj walïkäna ukajj jichha tiempon jan walit uñjatäjjärakiwa.
¿Mayninakajj kuntï amuyapki ukanakamp apayasiñajj walikïskpachati?
Suma amtanakar puriñatakejja, ¿confiykañ yanaptʼanakajj utjpachati? Mä amtar puritasat jutïrin jan amtasiñatakejja, ¿suma yanaptʼanakajj utjpachati?
Jïsa utjiwa, wali confiykañarakiwa. Maynitï ukarjam sarnaqaspa ukhajja, cheqpach kusisiñwa jikjjataspa. Jutïr yatichäwinjja, kunas suma amtanakar puriñatakejj yanaptʼistaspa uka toqetwa yatjjataskañäni.