Janipuniw sapäktanti

1, 2. 1) Kunayman jan walinakan uñjaskasas janipuniw sapäkti sasajj ¿kunatsa sissna? 2) ¿Kunsa aka yatichäwin yatjjataskañäni?

KUNAYMAN jan waltʼäwinakan uñjasisajja, sapakis thayampi jallumpi jawqʼsut mä botenksna ukhamwa amuyassna. Ukampis janiw sapäktanti. Alajjpachankir wali munasir Awkisaw qhawqsa tʼaqesisktan uk uñjaski, jiwasar yanaptʼañwa arsuwayaraki. Jehová Diosajj “nayaw jumarojj yanaptʼäma” sasaw jupat jan jitheqtir sapa mayni servirinakapar saraki (Is. 41:10).

² Aka yatichäwinjja, kunjamsa Jehová Diosajj aka pusi toqenakat yanaptʼistu ukwa yatjjataskañäni: 1) jupajj irpistuwa, 2) kuntï jakañatak necesittan ukwa churistu, 3) jarkʼaqestuwa, 4) chuymachtʼistuwa. Kunayman jan walinakansa uñjaskchiñänejja, Jehová Diosajj janipuniw jiwasat armaskaniti, janirakiw kunapachas jaytjkistaniti ukwa jupajj arsuwayi. Ukhamajj janipuniw sapäktanti.

JEHOVÁ DIOSAW IRPISTU

3, 4. ¿Kunjamsa Jehová Diosajj irpistu? (Salmo 48:14).

³ (Salmo 48:14 liytʼäta). Jehová Diosajj ak sum yati, jaqenakajj janiw jiwas pachpa apnaqasir lurtʼatäktanti. ¿Kunjamsa Jehová Diosajj jichhürunakan jupat jan jitheqtir servirinakapar irpi? Mä toqetjja, Bibliampiw yanaptʼistu (Sal. 119:105). Jehová Diosajj Biblia toqew suma amtanakar puriñatakisa, jupjam amuyañatakisa, suma chuymanïñatakis yanaptʼistu. Biblian yatichäwinakapar istʼtan ukhajja, kusisitaw jakastanjja, wiñay jakañ suytʼäwinirakïtanwa.a Janiw ukakïkiti, mayninakar perdonañsa, jan chuyma ustʼatäskakiñsa, taqe kunan honradöñsa, maynit maynikam chuymatpach munasiñs yaticharakistuwa (Sal. 37:8; Heb. 13:18; 1 Ped. 1:22). Cheqas ukhamäñaw suma awk taykäñatakisa, suma esposöñatakisa, suma esposäñatakisa, suma amigöñatakis yanaptʼistu.

⁴ Jehová Diosajj jiwasjam jaqenakan problemanakapsa llakinakapsa Bibliaruw qellqayäna (1 Cor. 10:13; Sant. 5:17). Sarnaqäwinakap liytʼañasa kuntï yateqktan ukarjam sarnaqañasa, aka pä toqenakanwa yanaptʼistu. Maya, janiw jiwasakejj jan walinakan uñjasiwayktanti; yaqhanakajj jiwasjamarakiw uka pachpa jan walinakan uñjasipjjäna, ukampis Jehová Diosan yanaptʼapampejja, uka jan walinakarojj saykatapjjarakïnwa uk amuyañatakiw yanaptʼistu (1 Ped. 5:9). Paya, kunayman jan walinakar saykatañatakiw yanaptʼistu (Rom. 15:4).

5. ¿Khitinak toqes Jehová Diosajj irparakistu?

⁵ Jehová Diosajj jilat kullakanakas toqew irparakistu.b Circuito jilatanakajj sapa kutiw congregacionanak visitapjje, Diosar jukʼamp confiyañasatakiw discursonak arstʼapjje, mayachtʼatäñatakis yanaptʼapjjarakistuwa (Hech. 15:40-16:5). Ancianonakajj taqe chuymaw sapa mayni jilat kullakanakat llakisipjje (1 Ped. 5:2, 3). Awk taykanakajj Jehová Diosar munasipjjañapataki suma amtanakar puripjjañapatakiw wawanakapar yatichapjje, Biblia liyipjjañapatakisa tantachäwinakaru predicacionar sarapjjañapatakis yatichapjjarakiwa (Prov. 22:6). Experienciani kullakanakajj ukhamarakiw sum sarnaqatapampisa ewjjtʼanakapampis tawaq kullakanakar yanaptʼapjje, munasiñampiw chʼamañchtʼapjjaraki (Tito 2:3-5).

6. ¿Kunsa Jehová Diosamp irpayasiñatak lursna?

⁶ Jehová Diosajj kunayman toqetwa jiwasar irpañatakejj yanaptʼistu. ¿Kunsa jupamp irpayasiñatakisa yuspäratas uñachtʼayañatakis lursna? Proverbios 3:5, 6 texton akham siwa: “Jehová Diosar taqe chuymamamp confiyam, jan pachpa amuyumarojj confiyasimti” sasa. Ukhamtï lurañänejja, Diosajj ‘cheqa thak uñachtʼayistani’. Mä arunjja, jan waltʼäwinakan jan uñjasiñasatakiw yanaptʼistani, kusisitaw jakasirakiñäni. Qhawqsa Jehová Diosajj munasistu sapa maynir ewjjtʼarakistu ukanakat ¡walpun jupar yuspärtanjja! (Sal. 32:8).

JEHOVÁ DIOSAW KUNTÏ NECESITKTAN UK CHURISTU

7. ¿Filipenses 4:19 textorjamajj kunjamsa Jehová Diosajj yanaptʼistu?

⁷ (Filipenses 4:19 liytʼäta). Jehová Diosajj janiw jupamp sum apasiñasatakik yanaptʼkistuti, jan ukasti manqʼañanaksa isinaksa, jakañatak mä lugar jikjjatañatak chʼamachasktan ukarus yanaptʼarakistuwa (Mat. 6:33; 2 Tes. 3:12). Ukanakat llakisiñajj walikïskchisa, Jehová Diosajj jan sinti llakisiñaswa muni (Biblia de estudion Mateo 6:25 liytʼasajja, nayrïr notap liytʼäta). ¿Kunatsa ukanakat jan llakisiñasäki? Kuna laykutejj jupat jan jitheqtir servirinakaparojj janipun jaytanukuñwa alajjpachankir Awkisajj arsuwayi (Mat. 6:8; Heb. 13:5). Ukhamajj janiw akat payachasktanti, jupajj arupar phoqapuniniwa, kuntï necesitktan uks churapunistaniwa.

8. ¿Kunjamsa Jehová Diosajj Davidar yanaptʼäna?

⁸ Saúl reyit escapaskäna ukhajj kunjamsa Jehová Diosajj Davidar yanaptʼäna uk amuytʼañäni. Uka chʼama tukuña maranakanjja, Jehová Diosajj Davidarusa jaqenakaparus kunanakatï jakañatak wakiski taqe ukanakwa churäna. Uka tiempot amtasisajj akham sasaw Davidajj qellqäna: “Nayasti waynäskayätwa, jichhasti awkëjjtwa, ukampis cheqap sarnaqer jaqerojj janiw ni maynirusa apanukut uñjkti, janirakiw wawanakaparus tʼantʼa thaqaskir uñjkti” sasa (Sal. 37:25). Jumajj ukhamarakiw kunjamsa Jehová Diosajj jumarusa jan ukajj jilat kullakanakarus kuntï necesitapki uk wali munasiñamp churir uñjpachätajja.

9. ¿Kunjamsa Jehová Diosajj mä desastre natural utjki ukhajj servirinakapar yanaptʼi? (Fotonak uñjjattʼarakïta).

⁹ Desastres naturales ukanak utjki ukhajja, ukhamarakiw Jehová Diosajj kunanaktï servirinakapajj necesitapki ukanak churi. Nayrïr patak maranakan manqʼat pistʼat uñjasipkäna uka Jerusalén markankir jilat kullakanakarojja, yaqha lugaranakan jakir jilat kullakanakajj yanaptʼanakwa jupanakar apayapjjäna (Hech. 11:27-30; Rom. 15:25, 26). Jichhürunakan Diosan markapajj yanaptʼasirïskakiwa. Mä jan waltʼäwejj utjki ukhajja, kawkjantï yanaptʼajj munaski uka cheqanakar manqʼañanaka, uma, isi, medicamentonak chuymapat apapjjañapatakiw Jehová Diosajj servirinakapar yanaptʼi. Jan waltʼayat Salonanaka, utanaka askichir jilat kullakanakas utjarakiwa. Khitinakatï utanakapsa, jan ukajj familiaranakapsa jan ukajj munat amigonakapsa aptʼasipki ukanakarojja, jankʼakirakiw Diosan Arupamp chuymachtʼapjje.c

10, 11. ¿Kunsa Boris chachan experienciapat yateqsna?

¹⁰ Jehová Diosajj wali yanaptʼasiriwa, jupar janïr servipki ukanakarus necesitapki ukanak churarakiwa. Jiwasajj Jehová Diosjamarakiw khitinakatï jupar jan servipki ukanakar yanaptʼañatak chʼamachastanjja (Gál. 6:10). Ukhamatwa jiwasanakampiru Jehová Diosampir uñtʼapjjañapatak yanaptʼtanjja. Ucrania markan jakasiri Boris chachat amuytʼañäni. Jupajj mä escuelan directorapawa, janis Testigökchejja, Testigöpki uka yateqerinakarojj munasiñampi respetompipuniw uñjäna. Guerrajj qalltäna ukhajja, kawkjantï markapan segurökäna uka cheqaruw escapjjäna, ukanwa jilat kullakanakajj yanaptʼapjjarakïna. Mä qhawqha tiempotjja, Jesusan jiwatap amtaski uka tantachäwiruw saräna. Qhawqsa jupar yanaptʼapjjäna uk amtasajja, Boris chachajj akham siwa: “Testigonakajj wal nayat llakisipjjäna, sum cuidapjjarakitäna. Walpun jupanakar yuspärta” sasa.

¹¹ Janisay Testigöpkchejja, yanaptʼa munapki ukanakar yanaptʼasajj taqeniw alajjpachankir Awkisat yateqasisajj khuyaptʼayasirïsna (Luc. 6:31, 36). Jupanakar munasiñ uñachtʼayasajj Jehová Diosat jukʼamp yateqañ munapjjaspa, jiwasamp chik jupar serviñ munapjjaspa ukwa muntanjja (1 Ped. 2:12). Janisay ukhamäkchinejja, jupanakar yanaptʼasajj kusisitäñäniwa (Hech. 20:35).

JEHOVÁ DIOSAJJ JARKʼAQESTUWA

12. ¿Jehová Diosajj markapar kunjam jarkʼaqañsa arsuwayi? (Salmo 91:1, 2, 14).

¹² (Salmo 91:1, 2, 14 liytʼäta). Jehová Diosajj markapar sum apasitaparojj jarkʼaqañwa arsuwayi. Supayajj Jehová Diosaruk adorasiñap jarkʼañsa munkchinejja, Diosajj janipuniw uk permitkaniti (Juan 17:15). ‘Jachʼa tʼaqesiñajj’ qalltkani ukhajja, Jehová Diosajj markapar jarkʼaqapuniniwa, jupar confiyasipkakiñapatakis yanaptʼarakiniwa, janiw ukat payachasktanti (Apoc. 7:9, 14).

13. ¿Kunjamanakatsa Jehová Diosajj sapa mayni servirinakapar jarkʼaqe?

¹³ Jehová Diosajj kunaymanitwa sapa mayni servirinakapar jarkʼaqe. Mä toqetjja, kunatï walïki kunatï jan walïki uk amuyañasatakejj Biblia churistu (Heb. 5:14). Biblian wiñay yatichäwinakaparjam sarnaqañajja, Diosamp sum apasitaswa jarkʼaqe. Kusisita sum jakasiñasatakejj suma amtanakar puriñasatakiw yanaptʼarakistu (Sal. 91:4). Maysa toqetjja, Jehová Diosajj congregación toqew jarkʼaqarakistu (Is. 32:1, 2). Jehová Diosar munasirinakampi jupar istʼirinakamp chikachastan ukhajja, jupanakajj chʼamañchtʼapjjestuwa, kunatï jan walïki ukanak jan lurañasatakiw yanaptʼapjjarakistu (Prov. 13:20).

14. 1) ¿Kunatsa Jehová Diosajj yantʼanakas awisajj jan chhaqtayki? 2) ¿Kunsa Salmo 9:10 textojj qhanañchistu? (Nota liytʼarakïta).

¹⁴ Nayra tiemponjja, Jehová Diosajj servirinakapar usuchjatäñatsa jiwañats awisajj jarkʼaqänwa, ukampis janiw sapa kutejj uk lurkänti. Bibliarjamajj taqeniw mä ‘akatjamat jan waltʼäwinakan uñjastanjja’ (Ecl. 9:11). Nayra tiemponsa jichha tiemponsa, Jehová Diosajj janiw awisajj arknaqatäñatsa jiwañatsa servirinakapar jarkʼaqkiti, kuna laykutejj ukhamatwa Supayan kʼarïtap uñachtʼayi (Job 2:4-6; Mat. 23:34). Jehová Diosajj janis yantʼanakas chhaqtaykapunchinejja, janipuniw jupar munasirinakarojj apanukkistaniti, janiw ukat payachasktanti (Sal. 9:10).d

JEHOVÁ DIOSAJJ CHUYMACHTʼISTUWA

15. ¿Kunjamsa Jehová Diosajj oración toqesa, Biblia toqesa, jilat kullakanak toqes chuymachtʼistu? (2 Corintios 1:3, 4).

¹⁵ (2 Corintios 1:3, 4 liytʼäta). Taqeniw awisajj llakinakan uñjastanjja, chuyma ustʼatas uñjasiraktanjja. Inas jichhpachajj mä llakinïsta, sapakjam amuyasiraksta. Kunja llakitätansa uk janis khitis entiendkistaspa ukhamsa amuyaskstanjja, Jehová Diosajj sum yatistu. Janiw ukakïkiti, “jupaw taqe llakinakasan chuymachistu”. ¿Kunjamsa uk luri? Jupajj oración toqe, Biblia toqe, jilat kullakanakas toqew chuymachistu. Orasktan ukhajja, ‘Diosajj sumankañapwa churistu, uka sumankañapajj kuntï jaqejj amuyki ukat sipans jukʼampiwa’ (Filip. 4:6, 7). Biblia liytʼasajj qhawqsa jupajj munasistu ukwa uñjtanjja, yatiñan ewjjtʼanakapats yateqaraktanwa, jutïritakis mä suytʼäwi churistu. Jilat kullakanakamp tantachäwinakanktan ukhajja, munasiñampiw uñjapjjestu, Bibliarjamaw chʼamañchtʼapjjarakistu.

16. ¿Kunsa Nathan jilatampin Priscilla kullakampin experienciapat yateqsna?

¹⁶ Kunjamsa Jehová Diosajj Biblia toqe chuymachtʼistu chʼamañchtʼarakistu uk amuyañatakejja, Nathan jilatampit Priscilla kullakampit parltʼapjjañäni, jupanakajj Estados Unidos markanwa jakapjje. Mä qhawqha maranak nayrajja, jupanakajj kawkjantï jukʼamp predikirinakajj munaski uka cheqar jakiriw sarjjapjjäna. Nathan jilatajj akham siwa: “Jehová Diosaw yanaptʼistani sasaw confiyapjjayäta” sasa. Ukampis machaq congregacionapar puripjjäna ukhajja, jupanakajj usuntjjapjjänwa, qollqet pistʼataw uñjasipjjarakïna, jupanakajj janiw ukhaman uñjasiñ suyapkänti. Qheparusti markaparuw kutʼjjapjjäna, ukampis ukan qollqet pistʼat uñjasisipkakïnwa. Jilatajj akham sarakiwa: “Kunatsa Jehová Diosajj kunjamtï munapkayäta ukham jan bendisipkpachïtu sasaw amuyjjayäta. Kuna jan walch lurpachätjja sasaw piensarakirïta” sasa. Ukampis tiempompejja, Diosajj jupanakar jan apanukutapwa amuyasipjjäna. Jilatajj akham saskakiwa: “Uka llakinakan uñjasisajja, Biblia liytʼañajj mä suma amigos chʼamañchtʼkitaspa, yatiñamp ewjjtʼkitaspa ukhamänwa. Ukanakat sinti llakisiñat sipansa, kunjamsa Jehová Diosajj ukanak aguantañatak yanaptʼasipkitäna ukwa yateqapjjayäta, ukaw jutïrin Jehová Diosaw jan waltʼäwinak aguantañatak yanaptʼistani sasin confiyañatak yanaptʼapjjetäna” sasa.

17. ¿Kunjamanakatsa Helga kullakajj chuymachtʼat jikjjatasirïna? (Fotonak uñjjattʼarakïta).

¹⁷ Kunjamtï uñjaniwayktanjja, jilat kullakanakajj wal chuymachtʼapjjestaspa. Hungría markan jakasir Helga kullakat amuytʼapjjañäni. Jupajj walja maranakaw sinti jan walinakan uñjasïna, janirakiw kuns kamachtʼirjamäkänti, wali llakitarakïnwa. Ukampis jichhajja, kunjamsa Jehová Diosajj congregación toq jupar chuymachtʼäna uk janiw armaskiti. Jupajj akham siwa: “Jehová Diosajj jan chʼamanjam uñjaskayäta ukhapuniw chʼam churitäna, nayajj trabajiñajänwa usut wawajar cuidañajänwa, yaqha llakinakas utjakirakïnwa, ukanakampiw wali chʼam tukuyäta. Aka 30 maranakanjja, Jehová Diosajj chuymachtʼämaw siski uk phoqapuniwa, sapürupuniw chuymachtʼitu, jilapartejj sinttʼasiri, khuyaptʼayasiri, wali munasiri jilat kullakanakan arunakapampiw chuymachtʼitu. Walja kutirakiw munkayäta ukhapun mä mensaje, mä tarjeta jan ukajj chʼamañchtʼkir arunak katoqerïta” sasa.

18. ¿Kunjamsa mayninakar chuymachtʼaraksna?

¹⁸ Jehová Diosjam mayninakar chuymachtʼañajj mä privilegiowa. ¿Kunjamsa uk lursna? Mayninakarojj pacienciampiw istʼsna, chuymachtʼkir arunak arstʼaraksna, jan ukajj yaqha toqenakatwa sum yanaptʼaraksna (Prov. 3:27). Janiw jilat kullakanakasampikejj taqe ukanak lurktanti, jan ukasti janïrasay Diosar servipkchejj taqe tʼaqesir jaqenakaruw yanaptʼtanjja. Jupanakajj inas mä sinti jan walin uñjasipjjchi, inas usutäpjjchi, jan ukajj mä munat amigopasa mä familiarapas jiwchi, jupanakarojj visittʼañasawa, istʼañasawa, Bibliampiw chʼamañchtʼañasaraki. “Taqe kunan chuymachtʼasiri” Diosat yateqasisajja, janiw jilat kullakanakasarukejj kunayman jan walinakar saykatapjjañapatak yanaptʼkañäniti, jan ukasti Jehová Diosar jan servipki ukanakan jupar uñtʼapjjañapatakis yanaptʼaraksnawa (Mat. 5:16).

JEHOVÁ DIOSAJJ JIWASAMPIPUNÏSKANIWA

19. ¿Kunjamanakatsa Jehová Diosajj yanaptʼistu, ukat kunjamsa jupat yateqasitas uñachtʼaysna?

¹⁹ Jehová Diosajj jupar munasirinakat llakisipuniwa, jan waltʼäwinakan uñjastan ukhajj janiw khitirus jaytjkistuti. Jupajj munasistuwa, kunjamtï mä munasir awkejj wawapar munaski ukhamwa uñjarakistu. Jupajj irpistuwa, kuntï necesitktan ukwa churistu, jarkʼaqestuwa, chuymachtʼarakistuwa. Khitinakatï yantʼanakan uñjasipki ukanakar yanaptʼasasa chʼamañchtʼasasa, jupat yateqasitaswa uñachtʼayañäni. Jakañ vidan kunayman jan walinakans uñjaskchiñänejja, Jehová Diosajj jiwasampipunïskaniwa, kuna laykutejj akham sasaw jupajj arsuwayi: “Jan ajjsaramti, nayaw jumampïskta” sasa (Is. 41:10). ¡Cheqas Jehová Diosampejj janipuniw sapak uñjaskañäniti, ukajj walpun chuymachtʼistu!