Jehová Diosar serviñ amtañapatakejj ¿kunjamsa mä estudior yanaptʼsna?

1, 2. 1) Janïr Jehová Diosan Testigopäkasajja, ¿kunatsa yaqhep estudionakajj payachasipjje? 2) ¿Kunsa aka yatichäwin yatjjataskañäni?

TESTIGÖÑ amtkayäta ukhajja, ¿kunanakatsa payachasiyäta? Trabajojankir compañeronakasa, amigonakajasa jan ukajj familiaranakajas naya contraw saytʼapjjani sasin inas payachaschiyäta. Janipuniw Diosan mandamientonakap phoqañ puedkäti sasin inas amuyarakchiyäta. Ukhamächi ukhajja, Jehová Diosan Testigopäñat payachasipki uka estudionakarojj entiendïtawa.

² Ukham payachasiñajj Diosar serviñan maynirojj jarkʼaspawa, uk Jesusajj sum yatïna (Mat. 13:20-22). Ukampis jupan arkiripäñat payachasipkäna ukanakarojja, Jesusajj yanaptʼaskakïnwa. Jiwasatï jupat yateqasiñänejja, estudionakarojj aka toqenakanwa yanaptʼañäni: 1) Diosar serviñan kunas jupanakar jarkʼaski uk amuyasipjjañapataki, 2) Jehová Diosar jukʼamp munasipjjañapataki, 3) Diosar jakäwinakapan nayrar uchapjjañapataki, 4) jan walinakar atipjapjjañapataki. ¿Kunjamsa Jesusat yateqassna? Testigöñapatakejj ¿kunjamsa mä estudiorojj ¡Wiñayatakiw kusisit jakasisma! sat libromp yanaptʼsna?

DIOSAR SERVIÑAN KUNAS JARKTʼASKI UK AMUYASIÑAPATAK ESTUDIOMAR YANAPTʼAM

3. ¿Kunas Nicodemorojj Jesusan discipulopäñapatak jarktʼpachäna?

³ Nicodemo chachajja, judionakan wali importante mä jilïripänwa. Ukampis Jesusan discipulopäñapatakejja, mayaw jupar jarktʼaskäna. Jesusajj sojjta phajjsinakakiw predicaskäna, ukhaw Nicodemojj Jesusan Mesiasätap yatjjäna (Juan 3:1, 2). Ukhamäkchïnsa, ‘judionakar ajjsaratapat’ jamasatwa Jesusar parläna (Juan 7:13; 12:42). Jupajja Jesusan discipulopäsajj kunanaksa aptʼasispäna uka toqetwa pienspachäna.a

4. Diosajj jupan kun lurañapsa muni uk amuyañapatakejja, ¿kunjamsa Jesusajj Nicodemor yanaptʼäna?

⁴ Nicodemojj Moisesan Leyip sum uñtʼäna, ukampis Jehová Diosajj jupan kun lurañapsa muni uk amuyañapatakejja, mayniw jupar yanaptʼañapäna. ¿Kunjamsa Jesusajj jupar yanaptʼpachäna? Jupajj tiempo apstʼasïna. Arum toqer jupamp jikisiñatakis dispuestokirakïnwa. Jupan discipulopäñapatakejj kunsa lurañapäna uksa qhanwa qhanañchtʼarakïna. Jupajj juchanakapatwa arrepentisiñapäna, umanwa bautisasiñapäna, Diosan Yoqapar confiyataps uñachtʼayañaparakïnwa (Juan 3:5, 14-21).

5. Jehová Diosar serviñatakejj kunas jarktʼaski uk amuyasiñapatakejj ¿kunjamsa mä estudior yanaptʼsna?

⁵ Mä estudiojj Bibliat sum yatiskaspa, ukampis Jehová Diosar serviñatakejj kunas jupar jarktʼaski uk amuyasiñapatakejja, mayniw jupar yanaptʼañapa. Inas jupajj walja horanak trabajchi, jan ukajj inas familiapajj jupan jan Testigöñap munapjjchi. ¿Kunjamsa Jesusat yateqasisma? Estudiomar yanaptʼañatakejj tiempwa apstʼasiñama. Inas juparojj café umtʼasiñataki jan ukajj paseytʼir sarañatak invitchisma. Ukanaktï lurätajja, kuna jan walinakansa uñjasi ukwa cuenttʼiristam. Ukhamatwa kuna cambionak lurañapas wakisi uk amuytʼayasma, uka cambionakjja janiw jumar kusisiyañatakik lurañapäkiti, jan ukasti Diosar munasitapatwa lurañapa, ukwa jupar amtayañama.

6. Kuntï yateqki ukarjam lurañapatakejja, ¿kunjamsa mä estudior yanaptʼasma? (1 Corintios 16:13).

⁶ Mä estudiojj kuntï yateqaski ukarjam sarnaqañapatakejja, Jehová Diosaw mandatonak phoqañatakejj yanaptʼitani sasaw confiyañapa (1 Corintios 16:13 liytʼäta). ¿Kunjamsa jupar yanaptʼasma? Ak amuytʼañäni: escuelan mä suma yatichirejja, janiw kunjamsa lurañapa ukak yateqeripar yatichkiti, jan ukasti “uk lurañ puedïtawa” sasaw chʼamañchtʼi. Jumajj ukham yatichirïñatak chʼamachasim. Janiw estudiomarojj kuntï Diosajj lurañap munki ukak yatichañamäkiti, jan ukasti “jupaw cambionak lurañatakejj yanaptʼaskätam” sasaw sañama. Estudiomar yanaptʼañatakejj ¿kunampsa lurasma?

JEHOVÁ DIOSAR JUKʼAMP MUNASIÑAPATAK ESTUDIOMAR YANAPTʼAM

7. Jehová Diosar jukʼamp munasipjjañapatakejj ¿kunjamsa Jesusajj jaqenakar yanaptʼäna?

⁷ Jesusajj ak yatïnwa: discipulonakapatï Diosar munasipjjaspäna ukhajja, kuntï yateqapki ukarjam sarnaqañajj janiw chʼamäkaspänti, ukatwa jupajj kunanakatï alajjpachankir Awkipar munasiñatak jukʼamp yanaptʼkaspa ukanakat parlirïna. Sañäni, Jehová Diosajj wawanakapar sumanak churir mä awkïkaspas ukhamwa Jesusajj Diosat parläna (Mat. 7:9-11). Jupar istʼir yaqhep jaqenakajja, janiw munasir mä awkinïpkpachänti, ukhamajj kunapachatï Jesusajj mä sinttʼasir awkit parlkäna ukhajj ¿kunjamakis jikjjatasipjjpachäna? Uka sinttʼasir awkejja, jan wal sarnaqer yoqapajj wali arrepentisit kuttʼanïna ukhajj wali kusisitaw katoqtʼäna. Jesusan ukham parlatapajja, Jehová Diosajj qhawqsa jaqenakar munasi uk amuyapjjañapatakiw jupar istʼirinakar yanaptʼäna (Luc. 15:20-24).

8. ¿Kunjamsa Jehová Diosar jukʼamp munasiñapatak mä estudior yanaptʼasma?

⁸ Jumajj estudiomar yanaptʼarakismawa. Yatichkasatï Jehová Diosajj kunja suma chuymanisa uk qhanstayäta ukhajja, Jehová Diosar jukʼamp munasiñapatakiw yanaptʼäta. Sapa kut yatjjatasajja, kunjamsa yateqapkta ukajj Jehová Diosan munasirïtap uñachtʼayi uk amuyañapatakiw yanaptʼañama. Kunjamsa Jesusajj juchampit jiwañampit kutsuyistu uk yatjjatapjjäta ukhajja, ukajj jupatak Diosan churat mä suma regalötap amuyañapatakiw yanaptʼañama (Rom. 5:8; 1 Juan 4:10). Mä yateqeritï Diosajj qhawqsa jupar munasi uk amuyani ukhajja, jukʼampiw Jehová Diosar munasini (Gál. 2:20).

9. ¿Kunas Michael jilatarojj jakäwipan cambionak lurañatakejj yanaptʼäna?

⁹ Indonesia markankir Michael jilatat parltʼañäni. Jupajj wawatpachaw Bibliat yatjjäna, ukampis janiw bautisaskänti. 18 maranëjjäna ukhajja, yaqha markaruw camionanak apnaqasin trabajiñatak sarjjäna. Qhepatjja, Indonesia markaruw casarasiñatak kuttʼäna, mä imill wawanëjjarakïnwa, ukampis yaqha markan trabajiskakïnwa. Ukañkamasti esposapasa phuchapas Bibliat yateqañwa qalltapjjäna, jakäwinakapan cambionakwa lurapjjarakïna. Michael jilatan mamapajj jiwjjäna ukhajja, jupajj tatapar cuidañatakiw utapar kuttʼaniñ amtäna, ukat Bibliat yateqañwa qalltarakïna. ¡Wiñayatakiw kusisit jakasisma! sat libron 27 yatichäwip yatjjatkasajja, kuntï “Jukʼamp yatjjatañataki” sat seccionan yateqkäna ukajj chuymaparupuniw purtʼäna. Yoqapar tʼaqesir uñjasajj kunjaksa Jehová Diosajj jikjjataspachäna uk amuyasajja, jupajj jachaqtʼasïnwa. Jehová Diosasa Yoqapas qhawqsa jupar munasipjje uk amuyasajja, walpun yuspäräna, jakäwipan cambionak lurasajj bautisasjjarakïnwa.

JEHOVÁ DIOSAR NAYRAR UCHAÑAPATAK ESTUDIOMAR YANAPTʼAM

10. Jakäwinakapan Jehová Diosar nayrar uchapjjañapatakejj ¿kunjamsa Jesusajj nayrïr discipulonakapar yanaptʼäna? (Lucas 5:5-11; dibujo uñjjattʼarakïta).

¹⁰ Nayrïr discipulonakajja, Jesusajj jutañapäkäna uka Mesiasätap jankʼakiw amuyapjjäna, ukampis predicañajj qhawqha wakiskirisa uk amuyañatakejja, yanaptʼwa necesitapjjäna. Pedrompi Andresampejj Jesusan discipulopäjjapjjänwa, ukhaw Jesusajj jupanakar taqe kun jaytapjjañapataki, jupar sapüru arkapjjañapatak mayïna (Mat. 4:18, 19). Jupanakasa Santiagompi Juanampisa, chawlla katuñ negocionïpjjänwa, uka trabajompis nayraruw sartasipkäna (Mar. 1:16-20). Pedrompi Andresampejj “chawlla katuñ qänanakap jaytasajja”, Jesusaruw arkapjjäna. Ukampis familianakapar jan kunas faltañapatakejj encargasisipkakïnwa. ¿Kunatsa negociop jaytañatakejj dispuestokïpjjäna? Lucas qellqatarjamajja, Jesusajj mä milagro luräna, ukaw “Jehová Diosajj janipuniw kuns faltaykistaniti” sasin confiyañatak jupanakar yanaptʼäna (Lucas 5:5-11 liytʼäta).

11. ¿Kunsa yateqerisan Diosar jukʼamp confiyañapatakejj lursna?

¹¹ Jiwasajj janiw Jesusjamajj milagronak lurktanti, ukampis “Jehová Diosar jakäwipan nayrar uchapki ukanakarojja, Diosajj yanaptʼapuniwa” sasaw yateqerisar cuenttʼsna. Inas jumajj tantachäwinakar sarañ qalltkayäta ukhajj kunjamsa Jehová Diosajj yanaptʼayätam uk amtassta. Inas jefemamp parlchiyäta, “trabajotï tantachäwinakajar sarañ jarkʼitani ukhajja, janiw jukʼamp horanak trabajkäti” sasin inas jupar sischiyäta. Uka cambionak lurayäta ukhajja, kunjamsa Diosajj qhanpachapun yanaptʼayätam, kunjamsa jupar confiyatamajj jukʼamp jiltarakïna uk yateqerimar qhanañchtʼam.

12. 1) Estudiosar sarkañäni ukhajja, ¿kunatsa yaqha jilat kullakanakar irpañasa? 2) Estudiomajj Jehová Diosar nayrar uchañapatakejj ¿kunampsa lurasma? Uk qhanañchtʼam.

¹² ¿Kunas yateqerirojj yanaptʼarakispa? Kunsa yaqha jilat kullakanakajj Jehová Diosar nayrar uchañatakejj lurawayapjje uk jisktʼañaw yanaptʼaspa. Mä estudior sarkañäni ukhajj ¿janit yaqha jilat kullakar irpksna? Jupanakarojja, kunjamsa Jehová Diosar uñtʼawayapjje, Jehová Diosar jakäwinakapan nayrar uchañatakejj kunsa lurawayapjje uk cuenttʼapjjañapatakiw mayisma. Ukat ¡Wiñayatakiw kusisit jakasisma! sat libronkir “Jukʼamp yatjjatañäni”, jan ukajj “Jukʼamp yatjjatañamataki” sat seccionanakankir videonakjja, estudiomamp uñtañatakis tiemp apstʼasirakismawa. Sañäni, 37 yatichäwi yatjjatapkäta ukhajja, Jehová Diosaw kunatï wakiski ukanak churistani sat videojj kuna askinaks qhanstayi uka toqetwa parltʼapjjasma.

JAN WALINAKAR ATIPJAÑAPATAK ESTUDIOMAR YANAPTʼAM

13. Jan walinakar saykatapjjañapatakejj ¿kunjamsa Jesusajj discipulonakapar wakichtʼäna?

¹³ Jesusajj walja kutiw discipulonakaparojj jumanak contra saytʼirinakaw utjani sasin säna, cheqas familiaranakapas jupanak contraw saytʼapjjañapäna (Mat. 5:11; 10:22, 36). Jiwañapatak mä qhawqha urunakak faltjjäna ukhajja, Diosar servipjjatamat jakäwinakam niyaw aptʼasipjjäta sasaw Jesusajj sarakïna (Mat. 24:9; Juan 15:20; 16:2). Amuytʼasirïpjjañapatakisa, chʼikïpjjañapatakisa, jupanak contra parlirinakar jan saykatapjjañapatakis ewjjtʼarakïnwa, ukhamat predicasipkakiñapataki.

14. Jupa contra saytʼapkani ukatak wakichtʼatäñapatakejj ¿kunjamsa estudiosar yanaptʼsna? (2 Timoteo 3:12).

¹⁴ Jiwasajj Jesusat yateqasiraksnawa, inas estudiosarojj trabajopankir compañeronakapasa, amigonakapasa jan ukajj familiaranakapas Bibliat yateqaskatap laykojj kuns sapjjchispa jan ukajj kuns lurapjjchispa, ukampis jiwasatï uka toqet jupamp parltʼjjañäni ukhajja, wakichtʼatäjjaniwa (2 Timoteo 3:12 liytʼäta). Trabajopankir compañeronakapat yaqhepajja, inas jan nayrjamäjjatap laykojj jupat burlasipjjchispa. Jan ukajj jakʼa familiaranakaparojja, kuntï Bibliat yateqaski ukajj janiw gustkaspati, ukatwa kuna jan walinsa uñjasini uk jankʼak parlañama. Ukhamatwa kun lurañatakisa, jan ukajj kun sañatakis wakichtʼatäjjani.

15. Familiapatï jupa contra saytʼani ukhajja, ¿kunsa estudiosar yanaptʼañatakejj lursna?

¹⁵ Estudiosan familiapatï jupa contra saytʼapjjani ukhajja, kunatsa jupa conträpjje uk amuytʼañapatakiw chʼamañchtʼañama. Inas familiapajj Testigonakajj kʼarinaks yatichapkaspa jan ukajj jan wali jaqenakäpkaspas ukham amuychi. Jesusajj niya ukhamanwa uñjasirakïna. Yaqhep familiaranakapajja, loqheratäkaspas ukham amuyapjjäna (Mar. 3:21; Juan 7:5). Ukhamajj mä estudiojja, paciencianïñwa yateqañapa, amuyumpiw mayninakarusa familiaranakaparus parlañ yateqañaparaki.

16. Kuntï yateqawayki uka toqet wali amuyump parltʼañapatakejj ¿kunjamsa estudiosar yanaptʼsna?

¹⁶ Estudiosan mä familiarapatï kunsa jupajj yateqaski uk yatiñ munchi ukhajja, janiw kuntï yateqawayki uk taqpach qhanañchañapäkiti, ukhamtï luraspajja janiw kuns yatiñ munjjaspati. Jukʼa arunakampiki, fácil amuykañak parltʼañapatakiw estudiomar chʼamañchtʼañama. Ukhamtï luranejja, familiarapajj Bibliat jukʼamp yatiñ munaskakiniwa (Col. 4:6). Mä estudiojj jw.org. cheqat familiaranakaparojj parltʼarakispawa, ukhamatwa Testigonakat jukʼamp yatiñ munapjjani ukhajj ukar mantapjjaspa.

17. Testigonakjjat jisktʼanakar qhanañchañapatakejja, ¿kunanakampis estudiomar yanaptʼasma? (Foto uñjjattʼarakïta).

¹⁷ Familiaranakapasa jan ukajj trabajopankir compañeronakapas jisktʼapjjani ukhajja, ¿kunjamsa estudiomarojj fácil qhanañchtʼañapatakejj yanaptʼasma? Jw.org. cheqankir “Preguntas frecuentes sobre los testigos de Jehová” siski uka seccionampiw yanaptʼasma (2 Tim. 2:24, 25). ¡Wiñayatakiw kusisit jakasisma! sat libron sapa yatichäwi tukuyarojja, “Yaqhepanakajj akham sapjjewa” sat recuadrow utji. Uka cheqajja, pachpa arupamp qhanañchtʼañapatakiw estudior chʼamañchtʼi. Kunjamsa uka cheqan uñskti uka jisktʼar qhanañchtʼaspa ukatakis yanaptʼarakismawa. Practicañajja, kunarutï creyki ukanak jan ajjsartʼas arjjatañapatakiw yanaptʼani.

18. Congregacionamp chik predicañapatakejj ¿kunjamsa estudiomar chʼamañchtʼasma? (Mateo 10:27).

¹⁸ Jesusajja, taqe jaqenakar predicapjjañapatakiw discipulonakapar mayïna (Mateo 10:27 liytʼäta). Mä estudiotï predicañ qalltjjani ukhajja, kunjamsa Jehová Diosajj jupar yanaptʼi uk uñjasajj jukʼampiw jupar confiyani. ¿Kunjamsa estudiomarojj congregacionamp chik predicañapatakejj chʼamañchtʼasma? Predicañatak mä campañajj utjkani ukhaw estudiomarojj publicadoräñapatakejj kunsa lurañapa uka toqet parltʼasma. “Mä campañajj utjki ukhajj predicañajj jukʼamp facilakiwa” sasaw jupar qhanañchtʼasma. Semanan apaski uka tantachäwin “Sum yatichañatak chʼamachasiñäni” sat cheqan asignacionanakanïñaw yanaptʼarakispa. Ukhamatwa kunarutï creyki ukanakat jan payachasis parlañ yateqani.

JUPAR CONFIYATAM ESTUDIOMAR UÑACHTʼAYAM

19. ¿Kunjamsa Jesusajj discipulonakapar confiyatap uñachtʼayäna, ukat kunsa jiwasajj jupat yateqassna?

¹⁹ Janïr jiwayatäkasin alajjpachar sarkasajja, mayampiw jikisiñäni sasaw Jesusajj discipulonakapar säna. Uka horasajja, Jesusajj alajjpachar sarañatsa parlkaspa ukham janiw discipulonakapajj amuyapkänti. Jupanakajj janis taqe kuns sum amuyapkchïnjja, Jesusajj jupar arkañ munapjjatap sum amuyäna (Juan 14:1-5, 8). Yaqhep yatichäwinak amuyapjjañapatakejj tiempow munasïna, uk Jesusajj sum yatïna, ukanakat mayajj alajjpachar sarañat parlkäna uka suytʼäwïnwa (Juan 16:12). Jiwasajj Jesusjamarakiw estudiosan Jehová Diosar taqe chuym serviñ munatapar confiysna.

20. Malaui markankir mä kullakajj ¿kunjamsa estudiopar confiyatap uñachtʼayäna?

²⁰ Estudiojajj kunatï cheqapäki ukpunwa lurañ muni sasin taqe chuym confiyañasajj wali wakiskiriwa. Malaui markankir Chifundo kullakat parltʼañäni, jupajj Alinafe sat católica tawaqor Bibliat yatichañwa qalltäna. ¡Wiñayatakiw kusisit jakasisma! sat libron 14 yatichäwi yatjjatasipkäna ukhajja, kullakajj “¿Diosar adorañatakejj idolonak apnaqañajj walikïskiti?” sasaw estudiopar jisktʼäna. Alinafe tawaqojj wal colertʼasïna, akham sarakïnwa: “¡Ukajj sapa maynitäjjewa!” sasa. Ukhajja, janiw Bibliat yateqañ munjjaniti sasaw Chifundo kullakajj amuyäna. Ukampis jupajj Alinafe tawaqorojj pacienciampiw yatichaskakïna. Tiempompejj idolonakamp Diosar adorañajj jan walïtap amuyjjaniwa sasaw kullakajj suyäna. Mä qhawqha phajjsinakatjja, 34 yatichäwin uñstki uka jisktʼwa jisktʼäna, ukan akham siwa: “Bibliat yatjjatañasa cheqpach Diosar uñtʼañasa, ¿kunjamsa jichhakamajj yanaptʼawaytam?” sasa. Chifundo kullakajj akham siwa: “Alinafe tawaqojj wali sum arstʼasïna, ‘Testigonakajj Bibliarjamapuniw kuns lurapjje’ sasaw sarakïna” sasa. Mä qhawqha tiempotjja, Alinafe warmejj janiw idolonak apnaqjjänti, qhepat bautisasjjarakïnwa.

21. Jehová Diosar serviñ amtañapatakejj ¿kunsa estudiosar yanaptʼañatakejj lursna?

²¹ Jehová Diosas estudiosar ‘jiltaykchejja’, jiwasajj estudiosar yanaptʼaraksnawa, ukhamat Jehová Diosar serviñapataki (1 Cor. 3:7). Janiw kunsa Jehová Diosajj lurañap muni ukak estudiosar yatichktanti, jan ukasti Diosar wal munasiñapatakiw yanaptʼaraktanjja. Ukat jupar munasitap laykojj jupar jakäwipan nayrar uchañapatakiw chʼamañchtʼtanjja, jan walinakan uñjaskasas Jehová Diosar confiyañwa yaticharaktanjja. Estudiosatï jupar confiyatas amuyani ukhajja, Jehová Diosar taqe chuym serviñapatakiw jupar yanaptʼañäni.